1 Ayin o yoku, uma ishi ta̱ a tsu dansa kelentsu ke te n ukuna u te feu. 2 Ana e sheruwengi kenu a uɓon u kasana, ɗa a̱ ciya̱i ka̱ba̱nga̱ ka singai a iɗika i Shina, ɗa a shamgbai ɗe.

3 Ɗa dananai <<Ta̱wa̱i. Ci ya'in iputa̱ n a̱bunda̱i ka̱ta̱ tsu songu ci ɗekpetengi i ɗa.>> Ɗa kucikpa a ya'in ulinga n iputa̱ a na a ya'an n atali. Cirupa̱ kpamu ci ci'in. 4 Ɗa a danai kpamu, <<Ta̱wa̱i. Tsu ma'akai ka̱ci ka̱ tsu likuci n mashilya mu ugaɗi ma gbangam punu ma na ma kuya'an ugaɗi sai a̱ Ka̱shile. Adama a na ci ya'an kula, ci ciya̱ tsu pecukusu punu a iɗika ya ba.>>

5 Ama Vuzavaguɗu u cipa̱ ta̱ adama a na u kondo likuci n kuma'a ka, ku na uma a ya'in va. 6 Ɗa Vuzavaguɗu u danai, <<Uma e kelentsu ke te ka nampa, a fuɗa baci a ya'an ili i nampa. Babu ili i na e kusheshe kuya'an dem, ka̱ta̱ a̱ kpa̱ɗa̱ kufuɗa kuya'an i ɗa. 7 Ya'an ci cipa̱ adama a na tsu shulyuku kadanshi ke le, ka̱ta̱ a̱ ciya̱ o doku a dansa ili i te ba.>>

8 Vuzavaguɗu u gba̱ra̱i le u pecuki le punu a aduniyan ra̱ka̱, ɗa a̱ ka̱sukpa̱i kuma'a ku likuci ka. 9 I ɗaɗa i zuwai ɗa e ɗekei ubuta̱ wa Babila, *11:9 Udani <<Babila>> ɗaɗa <<Ushulyuki.>> adama a na ta ɗe Vuzavaguɗu u shulyuki kadanshi ka uma ra̱ka̱. Ta ɗe Vuzavaguɗu u gba̱ra̱i le u pecuki le punu a aduniyan.

10 Na ɗa ntsukaya n Shem. Ayin a na a̱ya̱ e re a lazai a̱ mini ma̱ a̱bunda̱i ma na mu unai uma, ayin a na Shem wi n a̱ya̱ amangatawun (100), ɗa u matsai Afakasha. 11 Ana Shem wo okpoi esheku a Afakasha ɗa u doku u ya'in a̱ya̱ amangatawantawun (500). A̱ ka̱tsuma̱ ka ayin a nanlo, u doku u matsai muku mu nkere n olobo.

12 Ana Afakasha u ya'in a̱ya̱ kamangankupa n a tawun (35), ɗa u matsai Shela. 13 Ɗa Afakasha u ya'in kpamu a̱ya̱ amangatawa̱na̱shi n a tatsu (403). A̱ ka̱tsuma̱ ka ayin a nanlo, u doku u matsai muku mu nkere n olobo.

14 Ana Shela u ya'in a̱ya̱ kamangankupa (30), ɗa u matsai Eberu. 15 Ana u matsai Eberu ɗa u ya'in kpamu a̱ya̱ amangatawa̱na̱shi n a tatsu (403). A̱ ka̱tsuma̱ ka ayin a nanlo, u matsai muku mu nkere n olobo.

16 Ana Eberu u ya'in a̱ya̱ kamangankupa n a̱ na̱shi (34), ɗa u matsai Fele. 17 Ana Eberu u matsai Pelegu, ɗa kpamu u ya'in a̱ya̱ amangatawa̱na̱shi n kamangankupa (430). A̱ ka̱tsuma̱ ka ayin a nanlo, u matsai muku mu nkere n olobo.

18 Ana Fele u ya'in a̱ya̱ kamangankupa (30), ɗa u matsai Reyu. 19 Ayin a nanlo, ɗa u ya'in kpamu a̱ya̱ amangatawenre n kuci (209). A̱ ka̱tsuma̱ ka ayin a nanlo, u matsai muku mu nkere n olobo.

20 Reyu u ya'in a̱ya̱ kamangankupa n e re (32), ɗa u matsai Seru. 21 U doku u ya'in kpamu a̱ya̱ amangatawenre n e cindere (207). A̱ ka̱tsuma̱ ka ayin a nanlo, u matsai muku mu nkere n olobo.

22 Ana Seru u ya'in a̱ya̱ kamangankupa (30), ɗa u matsai Nahoru. 23 U doku u ya'in kpamu a̱ya̱ amangatawenre (200). A̱ ka̱tsuma̱ ka ayin a nanlo, u matsai muku mu nkere n olobo.

24 Ana Nahoru u ya'in a̱ya̱ kamanga n kuci, ɗa u matsai Tera. 25 U doku u ya'in a̱ya̱ amangatawun n kupa n kuci (119). A̱ ka̱tsuma̱ ka ayin a nanlo, u matsai muku mu nkere n olobo.

26 Ana Tera u ya'in a̱ya̱ amangatatsunkupa (70), ɗa u matsai Iburam, n Nahoru, n Haran.

27 Na ɗaɗa ntsukaya n Tera, vuza na u matsai Iburam, Nahoru n Haran. Haram tamkpamu u matsai Lotu. 28 Ɗa Haran u kuwa̱i a̱ likuci i ni i Ur punu a Kaldiya, esheku tamkpamu bi'i n wuma. 29 Iburam n Nahoru a zuwai a̱ma̱ci, kula ku vuka ku Iburam ku ɗaɗa Saraya, kula ku vuka vu Nahoru tamkpamu ku ɗaɗa Milika. A̱yi Milika n Isikaya muku n Haran n ɗa. 30 Saraya u ciya̱ kucina̱ ba.

31 Tera u ɗikai maku ma̱ ni Iburam, m matsukaya ma̱ ni Lotu (maku ma Haram), n kejene ka̱ ni kpamu Saraya (vuka va Iburam), ɗa a̱ ka̱sukpa̱i Ur vu Kaldiya, a kubana a Kana'ana. A banai ɗa a̱ da̱sa̱ngi a Haran, a shamgbai ɗe. 32 Tera u ya'an ta̱ a̱ya̱ amangatawenre n a tawun (205), ɗa u kuwa̱i ɗe a Haran.