16
Hajara n Isuma'ilu
1 Vuka vu Iburam, Saraya, u matsaka yi muku ba. Ama vuka va wi ta̱ n kabara ka maku ma vuka, vuza va aza a Masar, kula ku ni ku ɗa Hajara. 2 Ɗa Saraya u danai vali vi ni, <<Vuzavaguɗu u ne'e mu limata ba. Yiɗa̱i i zuwai ɗa va kuvaku m maku mu usuki ma̱ va̱ ba? U ga'an ba, wi ta̱ a̱ kuciya̱ka̱ mu maku.>>
Iburam wu ushuki n ili i na Saraya u danai. 3 Ana Iburam u yongoi a Kana'ana ali a̱ya̱ kupa. Ɗa Saraya vuka vu Iburam u nekei ni kabara ka̱ ni Hajara u ya'an vuka vi ni vu gbani. 4 Wa asai n Hajara, ɗa ta na u ya'in ka̱tsuma̱. Ana u yevei u ka̱na̱ ta̱ ka̱tsuma̱, ɗa u gita̱i kugoyo Saraya a̱na̱ku a kanna a̱ ni. 5 Ɗaɗa Saraya u danai Iburam, <<Avu ɗa vu zuwai mu atakaci a na mi o kuso'o na. N zuwakai nu kagbashi ka̱ va̱ a̱ nkuta̱ n nu, gogo na a na u yevei u ka̱na̱ ta̱ ka̱tsuma̱, ɗa u goyoi mu. Ya'an Vuzavaguɗu u ya'anka tsu afada a̱ tsu n avu.>>
6 Iburam u danai, <<Maku mu usuki ma̱ nu mi ta̱ e ekiye a̱ nu. Ya'anka yi ili i na ve enei i ga'in nu.>> Ɗaɗa Saraya u takacikai Hajara, ɗa ta na u sumai u ka̱sukpa̱i ni.
7 Ɗa kalingata ka Vuzavaguɗu ka cinai Hajara ɗevu n kuyene a kakamba, kuyene ku na ki ɗevu n uye u na u banai Shuru. 8 Ɗa kalingata ka danai, <<Hajara, kagbashi ka Saraya, te ɗai vu uta̱i, te ɗai kpamu vi a kubana?>> Wu ushuki, <<Mi ta̱ a kusuma a̱ ubuta̱ u vuza gbayin vu kunu vu va̱ Saraya.>>
9 Ɗaɗa kalingata ka Vuzavaguɗu ka danai ni, <<Bono a̱ ubuta̱ u vuza gbayin vu kunu vu nu ka̱ta̱ kpamu vu tono yi.>> 10 Ɗa kalingata ka ko doku ka danai kpamu, <<Mi ta̱ a kuzuwa ntsukaya n nu n yimkpa ali n laza kukece.>>
11 Kalingata ka Vuzavaguɗu ka danai ni kpamu,
<<Gogo na vi ta̱ n ka̱tsuma̱ ka maku,
vi ta̱ a kumatsa maku mo kolobo.
Ka̱ta̱ vi ne'i kula Isuma'ilu,
adama a na Vuzavaguɗu u pana ta̱ una̱mgbi u ka̱tsuma̱ u nu.
12 Wi ta̱ o kokpo majaki ma kakamba ma uma,
wi ta̱ a kuya'an tsurala n yaba dem
ka̱ta̱ feu yaba dem u ya'an tsurala n a̱yi,
wi ta̱ o kuyongo ende'en
kau n aza a̱ ni ra̱ka̱.>>
13 U ne'i Vuzavaguɗu vu na u ya'in kadanshi n a̱yi kula ku nampa, <<Avu ɗa Ka̱shile ka na ke ci ene mu,>> adama a na u dana ta̱, <<Gogo na me ene ta̱ Ka̱shile ka na ke ci ene mu.>> 14 I ɗaɗa i zuwai ɗa uma e ci ɗeke kayinva ka na ki e mere me Kadeshi m Biya-lahi-royi, <<Kayinva ka Vuza Wuma vu na u ce ene Mu.>>
15 Hajara u matsakai Iburam maku, ɗa u ne'i ni kula Isuma'ilu.*16:15 N kadanshi ka aza a Yahuda kula <<Isuma'ilu>> ku ɗaɗa <<Ka̱shile ka pana.>> 16 Iburam wi ta̱ n a̱ya̱ amanga̱na̱shi n a̱ ta̱li ana Hajara u matsakai ni Isuma'ilu.
*16:15 16:15 N kadanshi ka aza a Yahuda kula <<Isuma'ilu>> ku ɗaɗa <<Ka̱shile ka pana.>>