1 Ana Iburam u ya'in a̱ya̱ amanga̱na̱shinkupa n kuci, ɗa Vuzavaguɗu u ta̱wa̱i wa̱ ni. U danai, <<Mpa ɗa Ka̱shile Uba̱nga̱ri. Tono kadanshi ka̱ va̱ ka̱ta̱ kpamu vi ya'an ili i singai ayin tutu. 2 N kuzuwa ta̱ uzuwakpani n avu, ka̱ta̱ n neke wu ntsukaya n a̱bunda̱i.>>

3 Iburam u kuɗa̱ngi sapu u lya'i kayala, ɗa Ka̱shile ka danai ni, 4 <<N zuwa ta̱ uzuwakpani u nampa n avu, va kuya'an ta̱ akaya a uma kakau a̱ likuci n a̱bunda̱i. 5 Kula ku nu ku buwa Iburam ba, gogo na e kuɗeke wu ta̱ Ibirahi.*17:5 N kadanshi ka aza a Yahuda, kula <<Ibirahi>> ɗaɗa <<Esheku a uma n a̱bunda̱i.>> Adama a na mi ta̱ a kuzuwa wu vo okpo akaya a uma a̱ likuci n a̱bunda̱i. 6 Mi ta̱ e kuneke wu ntsukaya n a̱bunda̱i, yeve kpamu m bonoko wu iɗika i gbayin ka̱ta̱ a̱ ciya̱ punu ngono a̱ ka̱tsuma̱ ke le. 7 N kuzuwa ta̱ uzuwakpani u nampa n avu nu ntsukaya n nu kpamu, adama a limata i le i na i kuta̱wa̱ sai uteku n uteku. Mpa ɗa Ka̱shile ka̱ nu, nu ntsukaya n nu dem. 8 Mi ta̱ e kuneke wu nu ntsukaya n nu iɗika i Kana'ana ra̱ka̱ i na yi o limoci na, yo okpo i nu, nu ntsukaya n na n kuta̱wa̱ kelime ali uteku n uteku. Mpa tamkpamu n kokpo ta̱ Ka̱shile ke le.>>

9 Ɗa Ka̱shile ka danai Ibirahi, <<Avu feu, vu ka̱na̱ uzuwakpani wa nu mpa nu ntsukaya n nu koɓolo nu ntsukaya n kelime kpamu ra̱ka̱. 10 Na ɗa uzuwakpani u na va̱ kuɓa̱na̱ avu nu ntsukaya n nu ali nu ntsukaya n na n kuta̱wa̱ ka̱ca̱pa̱ dem. Uzuwakpani u ɗaɗa yu ushuku kukiɗa muku n ali n ɗa̱ avaja ra̱ka̱. 11-12 I gita̱ kukiɗa avaja adama a na wo okpo urotu wu uzuwakpani u va̱ n a̱ɗa̱. A umaci u ɗa̱ ra̱ka̱ i kiɗa muku n ali n ɗa̱ avaja ayin a na baci a yawai ayin kunla̱i. M muku ma agbashi n na a matsai punu a kpa'a ku ɗa̱ nu n na i tsulai n ikebe a̱ ubuta̱ wo omoci ra̱ka̱, ko aza a na yi umaci u te ba. 13 Ko kagbashi ka na a matsai punu a kpa'a ku nu ko vu tsulai, dem vi le sai a kiɗa yi ukpan u tsali, na ɗaɗa u kokpo urotu wi ikyamba u na u kuyotsongu an uzuwakpani u tsu n avu u ɗa wi ta̱ babu uteku. 14 Maku ma vali ma na baci u yawai a kiɗa yi ɗaɗa u ciya̱i ukiɗi wu ukpan u tsali ba, i ta̱ e kupece yi n uma a̱ ni, u koɗo ta̱ uzuwakpani u va̱.>>

15 Ɗa Ka̱shile ka danai Ibirahi kpamu, <<Vu doku vi ɗeke vuka vu nu kula Saraya ba, ama vi ɗekushe yi Saratu.†17:15 N kadanshi ka aza a Yahuda kula ku Saratu ku ɗaɗa <<Mekere mo mogono.>> 16 N kuzuwaka yi ta̱ una̱singai. Ka̱ta̱ n neke yi kpamu maku ma na ma kuya'an ma̱ nu. N kuzuwaka yi ta̱ una̱singai, a̱yi tamkpamu u kokpo ta̱ a̱na̱ku a uma kakau a̱ likuci-likuci n a̱bunda̱i, a̱ kuciya̱ ta̱ punu ngono a̱ ka̱tsuma̱ ka ntsukaya n ni.>>

17 Ibirahi u kuɗa̱ngi sapu u lya'i kayala, ɗa u zosoi, ɗa u gita̱i kusheshe n ka̱ɗu ka̱ ni, <<Vuza u kudoku ta̱ wa matsa ayin a na baci u ya'in a̱ya̱ amangatawun (100)? Saratu u kumatsa ta̱ wana ɗai u ya'an a̱ya̱ amanga̱na̱shinkupa?>> 18 Ɗa Ibirahi u danai Ka̱shile, <<Vi ta̱ a kufuɗa kuka̱sukpa̱ Isuma'ilu wo okpo vuza na u kuɗika ili i nanlo dem.>>

19 Ama, Ka̱shile ka danai, <<A̱'a̱, vuka vu nu Saratu wi ta̱ a kumatsaka wu maku. Ka̱ta̱ vi ne'e yi kula Ishaku. ‡17:19 N kadanshi ka aza a Yahuda kula ki <<Ishaku>> ku ɗaɗa <<Izoshi.>> N kuzuwaka yi ta̱ uzuwakpani a kubana wu ntsukaya n ni koɓolo nu ntsukaya n na n kuta̱wa̱ ka̱ca̱pa̱ ka̱ ni ali a kubana uteku n uteku. 20 M pana ta̱ ufolu u nu adama a Isuma'ilu. N kuzuwaka yi ta̱ una̱singai. Ka̱ta̱ u ciya̱ muku nu ntsukaya dem. A̱yi ɗa u kokpo esheku o ngono kupa nu n re. Ka̱ta̱ kpamu ntsukaya n ni n ya'an a iɗika n a̱bunda̱i. 21 Ama n kuɓa̱na̱ ta̱ uzuwakpani n Ishaku maku ma na vuka vu nu Saratu u kumatsa ka̱ya̱ ko bono.>> 22 Ana Ka̱shile ko kotsoi kudansa n Ibirahi, ɗa u ka̱sukpa̱i ni.

23 A kanna ka nanlo Ibirahi u ɗikai maku ma̱ ni Isuma'ilu m muku mo olobo n na m buwai ra̱ka̱. Koɓolo m muku ma agbashi n na a matsai punu a kpa'a ku ni n aza a na u tsulai dem, ɗa u kiɗai le avaja tsu na Ka̱shile ka danai ni. 24 Ibirahi u yawa ta̱ a̱ya̱ amanga̱na̱shinkupa n kuci (99), u yevei u kiɗai kavaja, 25 a̱yin maku ma̱ ni Isuma'ilu bi'i a̱ya̱ kupa n tatsu. 26 Ibirahi m maku ma̱ ni Isuma'ilu a kiɗai le avaja a kanna ke te. 27 Muku n ali dem n na mi a kpa'a ki Ibirahi, koɓolo n aza a na a matsai punu a kpa'a ku ni ka ko a tsulai n ikebe a̱ ubuta̱ wo omoci, a kiɗai le avaja feu koɓolo n a̱yi.