1 Vuzavaguɗu u yotsongi ka̱ci ka̱ ni kpamu wi Ibirahi ɗevu nu nɗanga m gbagba'in m Mamure ayin a na wi ida̱shi a̱ utsutsu u ka̱pa̱m ka̱ ni n kanna usuɗukpi. 2 Ana u ɗengusa̱i a̱shi a̱ ni ɗa we enei uma a tatsu kashani ɗevu n a̱yi. Ana we enei le ɗa wu uta̱i a̱ utsutsu u ka̱pa̱m ka̱ ni n kafura adama a na u gasa n ele. Ɗa u kuɗa̱ngi ali kuca̱n ku ni a kusa'wa iɗika. 3 U danai, <<Aza a gbagba'in, mi baci a̱ kuciya̱ mapasa ma singai wa̱ ɗa̱, mi a kuciga i laza kpa'a ku kagbashi ku ɗa̱ ba. 4 Ya'an a̱ tuka̱ m mini i sa'a ene a̱ ɗa̱ ka̱ta̱ yu uvuka a̱ kulu ku maɗanga ku nampa. 5 Mpa ya'an kpamu m bana n tuka̱ ɗa̱ n ilikulya'a, ka̱ta̱ i ciya̱ utsura wu nwalu, adama a na i ta̱wa̱ ta̱ a kpa'a ku kagbashi ku ɗa̱.>>

Ɗa ta na a̱ ushuki, <<Ya'an tsu na vu danai.>>

6 Ɗa Ibirahi u ya'in moloko, ɗa u uwai a̱ ka̱pa̱m ka̱ ni ɗa u danai Saratu. <<Saratu ya'an gogo'o, ɗika kiya ku singai adama a na vi ya'anka uma a nanlo emeshe.>>

7 Ɗa Ibirahi u sumai ɗa u uwai ushiga u ni ɗa u ɗikai medendem ma singai, ɗa u nekei kagbashi ka̱ ni ka kiɗaka uma a. 8 Ɗa u tuka̱i m mani'in, m mani n inyama i na u su'wain va, ɗa u nekei omoci a̱ ni. A̱yi a̱ ka̱ci ka̱ ni ɗa u nekei le ilikulya'a ya ɗa u shamgbai lo a̱ kulu ku yoku e le tamkpamu a kulya'a.

9 Ɗa we ecei ni, <<Te ɗai tamkpamu Saratu vuka vu nu?>>

Ɗa wu ushuki <<Wi ta̱ ɗe a̱ ka̱pa̱m.>>

10 A̱ ka̱tsuma̱ ke le vuza te u danai, <<Mayun na a kubana ka̱ya̱ vuka vu nu Saratu wi ta̱ a̱ kuciya̱ maku mo kolobo.>> Saratu lo ta na a̱ kucina̱ ki Ibirahi a kupana a ayin a na u shamgbai lo a̱ utsutsu u ka̱pa̱m. 11 A ayin a nanlo ta na Ibirahi n Saratu a kutsa ta̱, a̱yi Saratu kpamu u buwa o kudoku kene kusumbu ba. 12 Ɗa Saratu u zosoi ma̱ɗuku ɗa u danai, <<Mpa ɗa na n kutsa ta̱, mi ta̱ o kudoku ma pana uyo'o u vali kpamu? Ko n nannai ba vali vu va̱ vu kutsa ta̱.>>

13 Ɗa Vuzavaguɗu u danai Ibirahi, <<Yiɗa̱i i zuwai ɗa Saratu u zosoi ɗa u danai. Nini ɗai n kuciya̱ maku n tsukutsa tsu va̱>>? 14 <<Ili yi ta̱ lo i na i la'i Vuzavaguɗu utsura? Tsu na n danai na wotoi kuci Saratu wi ta̱ a̱ kuciya̱ maku.>>

15 Adama a na Saratu wi a kupana wovon ɗa u nannai ka'a u danai, <<N zoso ba>> ama u danai, <<Vu zoso ta̱.>>

16 Ana uma a a̱ ɗa̱nga̱i kulaza ɗa a indanai a kubana ɗaka a uɓon u Sodom. Ɗa ta na Ibirahi u soki le adama a na a̱ ka̱na̱ uye. 17 Ɗa Vuzavaguɗu u danai, <<Mi o kusokonku Ibirahi i na mi a kuciga kuya'an ba, 18 Ibirahi wi ta̱ o kokpo iɗika i gbayin n iɗika yu utsura kpamu, ka̱ta̱ iɗika kakau i na yi a̱ kucina̱ ku ni i ciya̱ una̱singai a̱ ubuta̱ u ni. 19 N zagba yi ta̱ adama a na u zuwa muku m kpa'a n ni nu ntsukaya n ni o tono uye u Vuzavaguɗu a̱ ubuta̱ u kuya'an kasingai m ma̱riki, nannai ɗa Vuzavaguɗu u kuneke Ibirahi ili i na u ya'ankai ni uzuwakpani dem.>>

20 Ɗa Vuzavaguɗu u danai Ibirahi, <<M pana ta̱ ili i gbani-gbani i na a dansai adama aza o Sodom n Gomora. Unushi u le u wuyana ta̱ ka̱u. 21 Mi ta̱ a̱ kucipa̱ n ka̱ci ka̱ va̱ me ene ko ili i na i a kudansa adama a uma a mayun ɗa.>>

22 Ɗa uma a a kpatalai a lazai o kubono Sodom, ama ɗa Ibirahi wo okpoi lo kashani e kelime ka Vuzavaguɗu. 23 Ɗa Ibirahi u yawai ɗevu ɗa we ecei Vuzavaguɗu va, <<Vi ta̱ a kuna aza a ciɗa koɓolo n aza a unushi dem>>? 24 Uma amangerenkupa i baci ciɗa punu a̱ likuci ya vi ta̱ a kuna likuci ya dem? Va̱ kuka̱sukpa̱ likuci ya adama a na vi isa uma amangerenkupa ba? 25 U jebeshe vu ya'an ili tsu nanlo, va kuna uma a singai adama aza a unushi ba, aza a singai a kutakacika n aza a unushi ba. Avu ɗa vuza va afada va aduniyan. U jebeshe va kuna uma ra̱ka̱ ba.

26 Ɗa Vuzavaguɗu u danai, <<N ciya̱ baci uma amangerenkupa a singai o Sodom, mi ta̱ a̱ kuka̱sukpa̱ likuci ya adama e le.>>

27 Ɗa Ibirahi u danai, <<Ka̱sukpa̱ n doku n ya'an kadanshi n avu Vuzavaguɗu, ko a na wo okpoi mpa vuma ɗa mi koci vu na a ya'in n kayala. 28 Uma amangere n a tawun i baci ta na punu uma a singai vi ta̱ a̱ kuka̱sukpa̱ likuci ya? Vi ta̱ a kuna likuci ya adama a na vu namba ta̱ uma tawun a ciɗa?>>

Ɗa Vuzavaguɗu u danai, <<N cina baci uma amangere n tawun aza a singai mi ta̱ a̱ kuka̱sukpa̱ likuci ya.>>

29 Ɗa u doku u danai, <<A̱ ciya̱ baci ta na uma amangere punu a̱ likuci ya>>?

Ɗa Vuzavaguɗu wu ushuki, <<Adama a uma amangere a nanlo ma kuna likuci ya ba.>>

30 Ɗa u danai, <<Ka̱ta̱ avu Vuzavaguɗu vi ya'an wupa nu mpa ba, ama ya'an n doku n dansa. Vi ciya̱ baci ta na uma kamangankupa koci, vi ta̱ a kuna likuci ya?>>

Ɗa wu ushuki, <<N ciya̱ baci punu uma kamangankupa aza a singai, ma kuna likuci ya ba.>>

31 Ɗa u danai, <<Ka̱ta̱ avu Vuzavaguɗu vi ya'an wupa nu mpa ba, ama ya'an n doku n dansa, a̱ ciya̱ baci uma kamanga punu a̱ likuci ya ta na?>>

U danai, <<Adama a uma kamanga a nanlo, ma kuna likuci ya ba.>>

32 Ɗa Ibirahi u doku u danai, <<Ka̱ta̱ avu Vuzavaguɗu vi ya'an wupa nu mpa ba, ama ya'an n doku n dansa ku te. A̱ ciya̱ baci punu uma kupa ta na?>>

Ɗa Vuzavaguɗu wu ushuki, <<Ma a kuna likuci ya ba n ciya̱ baci aza a singai kupa punu.>>

33 Ayin a na u kotsoi kadanshi n Ibirahi, ɗa Vuzavaguɗu u lazai ɗa Ibirahi u lazai o kubono a kpa'a.