1 Ɗa Yakubu u lya'i kelime nu nwalu n ni a iɗika ya aza a kasana. 2 Ɗa we enei kayinva e keteshe n ushiga u tatsu wu nlala iva'in lo, adama a na ta punu o tsu so'o a kayinva ka. Katali ka na a̱ ɓa̱ya̱ngi ki kayinva ka, ka ki ta̱ ka gbangam. 3 Ayin a na baci ushiga wa kakau u gasai a̱ ubuta̱ wa, nguɓi ma a̱ tsu gida̱la̱kpa̱ ta̱ katali ka a̱ una̱ u kayinva wa, adama a na e ne'e ushiga u le mini. O kotso baci, ka̱ta̱ o bonoko katali ka punu a̱ una̱ u kayinva wa.

4 Ɗa Yakubu we ecei nguɓi ma, <<Aza a̱ va̱, te ɗai i yu uta̱i?>> Ɗa a̱ ushuki, <<A̱ tsu tsu uta̱ ta̱ a Haran.>> 5 Ɗa we ecei le, <<I yeve ta̱ Laban, matsukaya ma Nahoru?>>

Ɗa a̱ ushuki, <<Eyeu, ci yeve yi ta̱.>>

6 Ɗa Yakubu u doku we ecei le, <<Wi ta̱ ɗe m ma̱ta̱na̱?>> Ɗa a danai, <<Eyeu, wi ɗe n kadanshi ba. Mekere ma̱ ni ma na Rahila a̱ kuta̱wa̱ n ushiga wu nlala u ni.>>

7 Ɗa Yakubu u danai, <<Kanna de ka buwa ta̱ bi'i, ayin o kubonoko nlala a kpa'a ka̱ta̱ a yawa ba, ne'i le mini ka̱ta̱ i lya'a kelime n kalina.>>

8 A̱ ushuki a danai, <<Tsa kuya'an nannai ba, sai ayin a na ushiga wa u gasai na ra̱ka̱ ɗa a̱ gida̱la̱kpa̱i katali ka kpamu; ka̱ta̱ yeve ci ne'e nlala ma mini.>>

9 A̱yi lo a kadanshi n ele ɗa Rahila u yawai nu nlala me esheku, adama a na a̱yi maguɓi ma'a. 10 Ana Yakubu we enei Rahila mekere ma Laban, taku va̱ a̱na̱ku, nlala kpamu n ni, ɗa u banai ɗa u gida̱la̱kpa̱i katali a̱ una̱ u kayinva wa. Ɗa u ne'i nlala me esheku a mashani a mini. 11 Ɗa Yakubu wo oɓongi Rahila ɗa u shika̱i n ka̱la̱ka̱tsu ka̱u. 12 Adama a na u dana ta̱ Rahila a̱yi vashi ve esheku ɗa, Rebeka ɗa kpamu a̱na̱ku. Ɗa Rahila u sumai ɗa u banai u danai esheku.

13 Ana a danai Laban, Yakubu ɗa maku ma taku, ɗa u ya'in moloko adama a na u cina yi. Ɗa wo oɓongi ni. Ɗa u ɗikai ni a kubana a kpa'a ku ni. Ana Yakubu u tonukoi Laban ili dem, 14 ɗa Laban u danai ni, <<Mayun avu kujini ku te ku ɗa tsu nu mpasa n te kpamu!>> Ɗa u da̱sa̱ngi n Laban va ali wotoi u te. 15 Ɗa Laban u danai ni, <<Adama a na vi vuza va̱ ɗa va kuya'anka mu tsugbashi gbani? Dana mu ko ya'in ɗai n kutsupa wu.>>

16 Laban ta na wi ta̱ nu nkere n re, vuzagbayin vu ɗa Liyatu, vuza kenu kpamu Rahila. 17 Liyatu wi ta̱ n uga'in u a̱shi koci, ama Rahila a̱shi a ga'an yi ta̱ koɓolo n ikyamba i tsuloboi dem. 18 A̱yi Yakubu wi ta̱ a kuciga Rahila, ɗa u danai, <<Mpa mi ta̱ a kuya'anka wu ulinga ali a̱ya̱ e cindere, adama a na vi neke mu Rahila.>>

19 Laban wu ushuki u danai, <<U la'a ta̱ n kuga'an n neke wu a̱yi a na me neke vuza yoku kau. Adama a nannai, da̱sa̱ngu nu mpa.>> 20 Ɗa Yakubu u ya'ankai ni ulinga ali a̱ya̱ e cindere adama a na e neke yi Rahila. Ama a̱yi we ene ayin a nanlo ka̱u ba, adama a na wi ta̱ a kuciga Rahila n a̱bunda̱i.

21 Ɗa Yakubu u danai Laban, <<Neke mu vuka vu va̱, ayin a na vi nekei mu a shana ta̱. Mi ta̱ a kuciga ma ɗika yi yolo.>>

22 Ɗa Laban u ɗekei uma a̱ ubuta̱ wa n a̱bunda̱i, ɗa u ya'in ka̱ɗiva̱. 23 Ama ana kulivi ku yawai, ɗa u ɗikai Liyatu. Ɗa u nekei Yakubu, ɗa Yakubu u vaki n a̱yi. 24 Laban u neke ta̱ Liyatu maku mu usuki, kula ku ni Zilifa, adama a na u ciya̱ vuza na u kuɓa̱nka̱ yi.

25 Ana kayin ka asai, ɗa Yakubu u ya'in mereve ana we enei Liyatu. Ɗa we ecei Laban, <<Yiɗa̱i i zuwai ɗa vi ya'ankai mu nannai, ɗa vi nekei mu Liyatu? N ya'anka wu tsugbashi adama a Rahila ba? Yiɗa̱i i zuwai ɗa vu doroi mu?>>

26 Ɗa Laban u danai ni, <<A̱ tsu tsa̱ kugita̱ kuta̱ka̱ mekere vuza kenu a cau n vuza gbayin ba. 27 Kotso bi'i n ayin e cindere o yolo a nampa a, ka̱ta̱ n yeve n neke wu vangu vi ni. Ama sai vu doku vi ya'anka mu ulinga ali a̱ya̱ e cindere.>>

28 Ɗa ta na Yakubu u ya'in nannai. Ana kuden ku te ku kotsoi, ɗa Laban u nekei ni Rahila yolo, adama a na wo okpo vuka vi ni. 29 Laban u doku ta̱ u neke yi kabara ke mekere ko yoku kula ku ni Biliha, adama a Rahila. 30 Ɗa Yakubu u vaki n Rahila. U la'a ta̱ n kuciga Rahila a na wa ciga Liyatu. U doku u ya'ankai Laban tsugbashi ali a̱ya̱ e cindere.

31 Ana Vuzavaguɗu we enei Yakubu u ciga Liyatu ka̱u ba, ɗa u ɓa̱yuwa̱i kamatsatsu ka̱ ni, u bonoi u ɓa̱ya̱ngi ka Rahila, wo okpoi madari. 32 Liyatu ta na u ka̱na̱i ka̱tsuma̱ ɗa u matsai maku mo kolobo ali ɗa u ne'i ni kula Ruben. *29:32 N tsu kelentsu ka aza a Ibirahi kula ka ɗaɗa, <<Ene ta̱ atakaci a̱ va̱.>> Ɗa u danai, <<Ili i na i zuwai i ɗaɗa Vuzavaguɗu u pana ta̱ asuvayali a̱ va̱ ɗa u nekei mu maku. Mayun gogo na vali vu va̱ u kuciga mu ta̱ ka̱u.>>

33 U doku u ciya̱i ka̱tsuma̱ ɗa u matsai maku mo kolobo kpamu. Ɗa u danai, <<Adama a na Vuzavaguɗu u yeve ta̱ a na a iwain mu, i ɗaɗa i zuwai ɗa u doku u nekei mu maku.>> U ne'i maku ma kula Simiyon. †29:33 N tsu kelentsu ka aza a Ibirahi kula ka ɗaɗa, <<Pana.>>

34 U doku u ya'in ka̱tsuma̱ kpamu ɗa u matsai maku mo kolobo. Ɗa u danai, <<Gogo na vali u kuciga mu ta̱ mayin, adama a na m matsaka yi ta̱ olobo a tatsu.>> Ɗa u ne'i maku ma kula Levi. ‡29:34 N tsu kelentsu ka aza a Ibirahi kula ka ku ɗaɗa <<ucigi u gbayin.>>

35 Ali n gogo na u doku u ka̱na̱i ka̱tsuma̱ ɗa u matsai maku mo kolobo. Ɗa u danai, <<Ayin a nampa n kucikpa ta̱ Vuzavaguɗu.>> Adama a nannai ɗa u ne'i maku ma kula feu Yahuza.§29:35 N tsu kelentsu ka aza a Ibirahi kula ka ku ɗaɗa <<kucikpa.>> Ɗa ta na wu uvukai n limata.