1 Ana Rahila we enei u matsaka Yakubu muku ba, ɗa u ka̱na̱i cishe'e m mokoshi ma̱ ni. Ɗa u danai Yakubu va, <<Neke mu muku ko n kuwa̱!>>

2 Yakubu u ya'in wupa n Rahila ɗa u danai, <<Mpa Ka̱shile ka'a, vuza na u sa̱nka̱i nu kuciya̱ limata?>>

3 Ɗa Rahila u danai ni, <<Kagbashi ka̱ va̱ ka na Biliha, vaku n a̱yi adama a na u matsaka mu maku. A̱ ubuta̱ u ni u ɗa mpa n kuciya̱ muku.>>

4 Ɗaɗa u nekei ni kagbashi ka̱ ni Biliha, wo okpoi vuka vi ni, ɗa Yakubu ta na u vaki n a̱yi. 5 Biliha u ciya̱i ka̱tsuma̱ ɗa u matsakai Yakubu maku. 6 Rahila u danai, <<Ka̱shile ka kiɗaka mu ta̱ afada a singai, u panai ka̱la̱ka̱tsu ka̱ va̱.>> Ɗa u ne'i ni kula Dan*30:6 N tsa aza Ibirahi kula ka ɗaɗa, <<U kiɗa ta̱ afada a singai.>>.

7 Biliha kagbashi ka Rahila u doku u ciya̱i ka̱tsuma̱ ɗa u matsakai Yakubu maku me ire. 8 Ɗa Rahila u danai, <<N ya'an ta̱ vishili n utsura m mokoshi ma̱ va̱, n lya'a ta̱ ta na>> Adama a nannai ɗa u ne'i ni kula Nafutali.

9 Ayin a na Liyatu we enei u buwa a kumatsa ba, ɗa u ɗikai kagbashi ka̱ ni Zilifa u nekei Yakubu ko okpo yi vuka. 10 Ɗa Zilifa kagbashi ka Liyatu ka matsakai Yakubu maku mo kolobo. 11 Ɗa Liyatu u danai, <<N ga'aka ta̱!>> Ɗa u ne'i ni kula Gadu.†30:11 N tsa aza Ibirahi kula ku ɗaɗa, <<Uga'aki.>>

12 Zilifa kagbashi ka Liyatu ka matsakai Yakubu kpamu maku me ire. 13 Ɗa Liyatu u danai, <<Mi ta̱ m ma̱za̱nga̱! A̱ma̱ci i ta̱ e kuɗeke mu vuza vu ma̱za̱nga̱.>> Ɗa Liyatu u ne'i maku ma kula Ashera. ‡30:13 Kula ku ɗaɗa n tsa aza Ibirahi, <<Ma̱za̱nga̱.>>

14 A ayin a vikya vi itabi, Ruben u banai a kakamba u ga̱va̱i aralu a na a kuzuwa vuka u ɗika ka̱tsuma̱, u tuka̱i Liyatu a̱na̱ku a̱ ni a kpa'a. Ɗa Rahila u danai Liyatu, <<N folono wu ta̱ ne'e mu aralu a kuɗika ka̱tsuma̱ a a na maku ma̱ nu ma̱ tuka̱i va.>>

15 Liyatu u danai ni, <<U yawa wu ba, a na vi isai mu vali? Gogo na vi a kuciga kufa̱ba̱na̱ mu aralu a kuɗika ka̱tsuma̱ a na maku ma̱ va̱ ma̱ tuka̱i mu?>> Ɗa Rahila u danai, <<Vali vu tsu wi ta̱ a kasa n avu anana, vi baci e kuneke mu aralu a kuɗika ka̱tsuma̱ a na maku ma̱ nu ma̱ tuka̱i.>>

16 Ana Yakubu wu uta̱i a kakamba u bonoi n kulivi ku nanlo, Liyatu u banai kugasa n a̱yi. U danai ni, <<Mayun anana vi ta̱ a ku asa nu mpa, adama a na vo okpo ta̱ una̱ wa aralu a kuɗika ka̱tsuma̱ a na maku ma̱ va̱ ma̱ tuka̱i.>> Ɗa ta na wa asai n a̱yi kayin ka nanlo.

17 Ka̱shile ta na ka panai avasa a Liyatu, u ɗikai ka̱tsuma̱ u matsakai Yakubu maku ma tawun. 18 Liyatu u danai, <<Ka̱shile ke neke mu ta̱ katsupu ka̱ va̱, adama a na n nekei vali vu va̱ kagbashi ka̱ va̱.>> U ne'i maku ma̱ ni kula Isaka. §30:18 Kula ku nampa n kelentsu ka aza a Ibirahi ɗaɗa, <<O kopuku ta̱ vali>> nannai ta na <<katsupu ki ta̱ lo.>>

19 Ɗa Liyatu u ka̱na̱i ka̱tsuma̱ kpamu ɗa u matsakai Yakubu maku ma̱ ta̱li. 20 Ɗaɗa Liyatu u danai, <<Ka̱shile ke neke mu ta̱ kune'e ku singai. Gogo na vali vu va̱ u kucikpa mu ta̱, adama a na m matsaka yi ta̱ muku mo olobo ali n ta̱li.>> Ɗa u ne'i ma kula Zabalun. *30:20 N kelentsu ka aza a Ibirahi kula ka ɗaɗa, <<Kucikpa.>>

21 Ɗaɗa u yevei u matsai maku me mekere, ɗa u ne'i kula Dina.

22 Ta lo Ka̱shile ka ciɓai n Rahila, u panai avasa a̱ ni, u ɓa̱yuwa̱i kamatsatsu ka̱ ni. 23 U ka̱na̱i ka̱tsuma̱ u matsai maku mo kolobo. U danai, <<Gogo na Ka̱shile ko lokoko mu ta̱ ili i wono.>> 24 U ne'i maku ma kula Isufu. Adama a na u dana ta̱ n ka̱ɗu ka̱ ni, <<Ka̱sukpa̱ Vuzavaguɗu u doku mu maku.>>†30:24 N kelentsu ka aza a Ibirahi kula Isufu ku yotso ta̱, <<Ka̱sukpa̱ u doku mu>> koɓolo n <<u takpa ta̱ ɗe.>>

25 Ana Rahila u matsai Isufu, ɗa Yakubu u danai Laban, <<Ka̱sukpa̱ mu m bono a kpa'a ku va̱ na ɗe a iɗika i va̱. 26 Neke mu a̱ma̱ci a̱ va̱ m muku n va̱ n na n ciya̱i adama a tsugbashi tsu na n ya'ankai nu, ka̱ta̱ n wala. Vi yeve ta̱ tsu na n ya'ankai nu tsugbashi mayin.>>

27 Ama Laban u danai ni, <<Vu ushuku baci n dansa tsu nampa, n yeve ta̱ a̱ ubuta̱ u kindana a na Vuzavaguɗu u zuwakai mu una̱singai adama a̱ nu. 28 Vu dana mu ta̱ katsupu ka̱ nu, mi ta̱ a kutsupa wu.>> 29 Ɗa Yakubu wu ushuki ni u danai, <<Vi yeve ta̱ tsu na n ya'ankai nu tsugbashi, n tsu na kuzuwa ku nu ku lya'i kelime adama a̱ va̱. 30 Kafu n ta̱wa̱ wa̱ nu kuzuwa ku nu ki ishi gbayin ba, ama gogo na ku ɗa ku yimkpa ta̱ ka̱u. Vuzavaguɗu u zuwakai nu una̱singai a ili i na de dem n sa'wai n ekiye a̱ va̱. Ama gogo na, wana ɗai n kufuɗa kuɓa̱nka̱ kpa'a ku va̱?>> 31 U danai, <<Yiɗa̱i n kuneke wu?>> Yakubu u danai, <<Mi a kuciga ili ba. Mi ta̱ a kulya'a kelime n kinda ushiga u nu, vi baci a̱ kushuku n kadanshi ka na n kuneke wu. 32 Anana ka̱sukpa̱ n tono ushiga u nu ra̱ka̱ m pece a̱giri n a̱na̱ku aza a ajaku, n a̱giri a̱ lima̱ dem, ni nraɗika koɓolo nu nga̱ji aza a na i n ajaku. Ka̱sukpa̱ icu'u yi ili i nanlo yo okpo katsupu ka̱ va̱. 33 Na kelime vi ta̱ a kufuɗa kuyeve ko mi ta̱ m ma̱riki. Ayin a na baci vi a̱ kuta̱wa̱ adama a na vu goɗumo ili i na m ɓolongi, mi baci m maraɗika ma na mi babu ajaku, ko ma̱giri ma na mi ulima̱ ba, vi yeve a na o bokoi ma'a.>> 34 Laban wu ushuki u danai, <<U ga'an ta̱, ka̱sukpa̱ ili yo okpo uteku u na vu danai.>> 35 Ama a kanna ka nanlo Laban u pecei nga̱ji n na mi n ikari ko n ajaku. U pecei a̱na̱ku o nkyon a na i n ajaku, ka̱na̱ku ka na ka sa'wai ɗe kumatsa kute dem, koɓolo m ma̱giri ma na mi ulima̱ dem, u pecei le u nekei muku mo olobo n ni n guɓa. 36 Ɗa Laban u foɓusoi u ya'in nwalu ali ayin a tatsu n ushiga u nanlo wa koɓolo m muku n ni, u ka̱sukpa̱i Yakubu da'in. Yakubu ta na u lya'i kelime n kinda ushiga u Laban u na u buwai va. 37 Yakubu u la̱nsa̱i acaka a̱ ta̱ku a nɗanga n kantan, m ma̱ɗimbi, koɓolo n o modobi u she'wei a̱va̱ e le adama a na a ya'an n ajaku a̱ a̱ri a ikyamba i le. 38 U zuwai a̱va̱ a nɗanga a nanlo a̱ mini a̱ ubuta̱ u na ushiga wi ilikuzuwa ya i tsu so'o mini. U zuwai a̱ ubuta̱ u na a ci ya'an mazama a̱ ta̱wa̱ baci kuso'o mini ma. 39 A ayin a na nlala ma a ya'in mazama a uɓon u na u zuwai acaka a̱ ta̱ku a nɗanga a nanlo, ɗa matsai muku n na mi n ikari koɓolo n ajaku a ikyamba i le. 40 Yakubu u pecei nkyon nu nraɗika. U zuwai a̱na̱ku o nkyon a a̱ ubuta̱ u na i a kindanai n nlala n Laban n na mi n ikari n aza a̱ lima̱. Ta u ya'in nannai ɗa u ciya̱ka̱i ka̱ci ka̱ ni ushiga ɗa u zuwai u ɗa kau n ushiga u Laban. 41 Ayin a na baci de dem kuzuwa ku na ki m ma̱ta̱na̱ i a kuya'an mazama, Yakubu u tsu zuwaka le ta̱ acaka a nɗanga a ele e kene a̱ ubuta̱ u na e ci ne'e le mini mo kuso'o, adama a na a ya'an mazama ma a uɓon wa acaka wa. 42 Ama u zuwaka kuzuwa ku na ki babu ma̱ta̱na̱ acaka a nɗanga a a̱ ubuta̱ u kuso'o mini ba. Adama a nannai, kuzuwa ku na ki m ma̱ta̱na̱ n ikari koɓolo n aza a ajaku ku ɗa kokpoi ku Yakubu. Ama ku na ki babu ma̱ta̱na̱ ku ɗa kokpoi ku Laban. 43 Ta nannai ɗa Yakubu wo okpoi vuza vu uciyi vu gbayin, wi ta̱ n ushiga u kuzuwa kakau n a̱bunda̱i, koɓolo n agbashi a̱ma̱ci n ali, n arakuma koɓolo ni njaki.