46
Yakubu u banai a Masar
1 Yakubu u ɗikai ili i na wi n i ɗa ra̱ka̱ ɗa u lazai a kubana Biyasheba, ɗa u ya'in alyuka a kubana u Ka̱shile ke esheku a̱ ni Ishaku.
2 Ka̱shile ka ya'in kadanshi n Yakubu a̱ ka̱tsuma̱ ka alatani n kayin u danai, <<Yakubu, Yakubu>> Wushuki, <<Mpa ɗa na.>>
3 Ɗa u danai ni, <<Mpa ɗa Ka̱shile, Ka̱shile ke eshevu, ka̱ta̱ vu pana wovon u kubana a Masar ba, adama a na mi ta̱ o kubonoko wu ɗe iɗika i gbayin. 4 Mi ta̱ a kubana ɗe a Masar koɓolo n avu, ka̱ta̱ n tuka̱ wu kpamu. A ayin a̱ ukpa̱ u nu kpamu ekiye a̱ Isufu a ɗaɗa a kupala a̱shi a̱ ni.>>
5 Ɗa Yakubu u ka̱sukpa̱i Biyasheba. Muku n ni n zuwai ni, m muku n wawa'a n le, n a̱ma̱ci e le e keke va anaka vu na mogono ma Masar ma̱ suki a ɗikaka yi. 6 A ɗikai ilikuzuwa i le koɓolo n uciyi u na a̱ ciya̱i a ayin a na i a Kana'ana, ɗa Yakubu n i limata i ni ra̱ka̱ a banai a Masar va. 7 Muku n ni, m muku m muku n ni koɓolo n a̱yi, nkere n ni, ni nkere mi nkere n ni; limata i ni dem u banai n ele a Masar.
8 Ele na ɗa ula a aza a Isaraila, Yakubu n limata i ni, aza a na a̱ ta̱wa̱i a Masar.
Ruben, maku ma iyain ma Yakubu.
9 Muku mo olobo n Ruben:
Enoku, Palu, Hezuron, n Kami.
10 Muku mo olobo n Simiyon ele ɗa:
Jemuwelu, Jamin, Ohadu, Jaki, Zoha, n Shawu, maku ma na mekere ma Kana'ana ma matsai
11 Muku mo olobo n Levi ele ɗa:
Geshon, Kohatu, m Merari.
12 Muku mo olobo n Yahuda ele ɗa:
Eri, Ona, Shela, Pereza, n Zera. Ama Eri n Ona a̱ kuwa̱ ta̱ a iɗika i Kana'ana.
Muku mo olobo n Pereza ele ɗa:
Hezuron n Hamulu.
13 Muku mo olobo mi Isaka ele ɗa: Tola, Puwa, Jashubu, n Shimiron.
14 Muku mo olobo n Zabalun ele ɗa:
Seredu, Elon, n Jalelu.
15 Ele na ɗa muku n Liyatu n na u matsakai Yakubu a Fada-aram, koɓolo m mekere ma̱ ni Dina. Muku n ni ra̱ka̱ olobo ni nkere i ta̱ uma kamangankupa n aza a tatsu.
16 Muku mo olobo n Gadu ele ɗa:
Zifiyon, Hagi, Shuni, Ezibon, Eri, Arodu, n Areli.
17 Muku mo olobo n Ashera ele ɗa:
Imuna, Ishiva, Ishivi, m Beriya.
Taku vi le mekere a̱yi ɗa Shera. Muku mo olobo m Beriya ele ɗa:
Heberu m Malikiyelu.
18 Ele na ɗa muku n na Zilifa u matsakai Yakubu. Zilifa a̱yi ɗa maku mu usuki ma na Laban u nekei mekere ma̱ ni Liyatu a ayin o yolo a̱ ni. Muku n ni ra̱ka̱ ele ɗa uma kupa n aza a̱ ta̱li.
19 Muku n Rahila vuka vi Yakubu ele ɗa Isufu m Bayami. 20 Muku n Isufu n na a matsakai ni a iɗika i Masar ele ɗa Manasa n Ifirayimu. A̱na̱ku e le a ɗa Asenatu mekere ma Potifera, ganu vu Onu.
21 Muku mo olobo m Bayami ele ɗa: Bela, Beka, Ashibelu, Gera, Na'ama, Ehi, Roshi, Mupim, Hupim, n Arudu.
22 Muku kupa n aza a̱ na̱shi a nampa ntsukaya n Yakubu n ɗa n na Rahila u matsakai ni.
23 Maku ma Dan a̱yi ɗa
Hushim.
24 Muku mo olobo n Nafutali ele ɗa:
Jazilu, Guni, Jeza, n Shilema. 25 Muku mo olobo m Biliha vu na Laban u nekei mekere ma̱ ni Rahila u matsakai Yakubu ele ɗa uma e cindere.
26 Uma a Yakubu ra̱ka̱ a na a̱ ta̱wa̱i a Masar, aza a na i limata i ni, babu punu a̱ma̱ci a̱ muku n ni, ele ɗa uma amangatatsu n uma a̱ ta̱li. 27 Muku n Isufu, n na a matsakai ni a Masar, n re n ɗa koci; uma a kpa'a ku Isufu a na a̱ ta̱wa̱i a Masar gbende i ta̱ uma amangatatsu n kupa.
Yakubu n Limata i ni a Masar
28 Yakubu u suki Yahuda u walaka yi kelime ciya̱ u dana Isufu u cina le a Goshen. Ana a yawai, 29 Isufu u kumbai keke va anaka a̱ ni ɗa u lazai a kubana Goshen adama a na u gasa n esheku. Ana a gasai ɗa Isufu wo oɓongi esheku n ekiye e kuɗeku, ɗa u shika̱i ali megeshe.
30 Ɗa Yakubu u danai Isufu, <<Mi ta̱ a kufuɗa kukuwa̱ gogo na, a na me enei nu n wuma n a̱shi a̱ va̱.>>
31 Isufu u danai vuza ni n aza a kpa'a ke esheku a̱ ni a na a buwai, <<Mi ta̱ a kubana ma dana Firi'auna, n dana yi, <Aza a̱ va̱ n aza a kpa'a ke esheku a̱ va̱, ele na i a iɗika i Kana'ana, a̱ ta̱wa̱ ta̱ wa̱ va̱. 32 Uma a nguɓi n ɗa, ele nguɓi n ɗa mi ilikuzuwa, a̱ ta̱wa̱ ta̱ n ushiga wu nlala koɓolo n wa anaka e le, n ili i na i n i ɗa dem.> 33 Ayin a na baci Firi'auna u ɗekei ɗa̱ ɗa we ecei, <Yiɗa̱i ulinga u ɗa̱?> 34 I dana, <Agbashi a̱ nu nguɓi mi ilikuzuwa i ɗa ali a̱ tsu bi'i muku ali ta na gogo na, tsu na ikaya i nu i ya'ansai.> Nannai ɗa u kuka̱sukpa̱ wu vi yongo a uɓon u Goshen, adama a na aza a Masar i ta̱ e kene nguɓi ili yi unata.>>