48
Yakubu u zuwakai muku n re n Isufu una̱singai
1 A ayin o yoku a danai Isufu esheku i ta̱ ɗe nu mbanaki, ɗa u pura̱i muku n ni n re Manasa n Ifirayimu ɗa u banai ɗe. 2 Ana a danai Yakubu, <<Maku ma̱ nu Isufu ma̱ ta̱wa̱ ta̱ kene wu.>> Ɗa Yakubu u ɗa̱nga̱i ɗa u da̱sa̱ngi a kajiba ka̱ ni ama dikyai.
3 Ana o kotsoi ikya̱shi, ɗa Yakubu u danai Isufu, <<Ka̱shile Mala'imili ra̱ka̱ u yotsongu ta̱ ka̱ci ka̱ ni a̱ Luzu a iɗika i Kana'ana ɗa kpamu u zuwakai mu una̱singai. 4 Ɗa u danai mu, <Mi ta̱ e kuneke wu muku n a̱bunda̱i adama a na ntsukaya n nu mo okpo umaci n neke kpamu iɗika i nampa yo okpo i le ko wannai.> 5 Ɗa Yakubu u lya'i kelime u danai, Isufu muku n nu n na vu matsai Masar kafu n ta̱wa̱ okpo ta̱ n va̱, Ifirayimu Manasa mokpo ta̱ aza a̱ va̱ tsu na Ruben n Simiyon i vu va̱. 6 Muku n na baci a matsai a̱ kucina̱ ku le n nu n ɗa; ili yi uka̱ni i na baci de dem a̱ ciya̱i i ta̱ a̱ kuciya̱ i ɗa a̱ ubuta̱ wi Ifirayimu m Manasa. 7 Ana mu uta̱i Pada-aram ɗa Rahila u kuwa̱i a iɗika i Kana'ana, ɗa u ka̱sukpa̱i mu n una̱mgbi u ka̱tsuma̱ ali babu na ci yawa Efarata, ɗa n ciɗa̱ngi ni lo a uye u Efarata>> (ɗaɗa feu Batalami).
8 Ana Yakubu we enei muku n Isufu ɗa u danai, <<Ana yayi olobo a nan ɗe?>>
9 Ɗa Isufu wu ushuki, <<Na va ɗa muku n ali n na Ka̱shile ke nekei mu punu na.>>
Ɗa Yakubu u danai, <<Tuka̱ le na wa̱ va̱ adama ana n zuwaka le una̱singai.>>
10 Gogo na a̱shi a Isaraila a̱ gita̱ ta̱ kuyimba̱na̱ adama a tsukutsa. Ɗa Isufu u bankai le ɗevu n a̱yi. Ɗa Isaraila wo oɓongi le ɗa u papurasai le.
11 Ɗa Isaraila u danai Isufu, <<N yeve a na mi o kudoku kene wu ba. Ɗa ta na Ka̱shile ka zuwai me enei a̱shi a̱ nu ali m muku n nu.>>
12 Ɗa Isufu u ɗikai le a nkuta̱ me esheku ɗa u kuɗa̱ngi ɗa u lya'i kayala lo e kelime ka̱ ni. 13 Ɗa Isufu u ɗikai aza e re dem, ɗa u zuwai Ifirayimu e kukiye ku usingai ku ni e kukiye ku ugula̱ kpamu ɗa u zuwai vuza kenu. Ɗa u zuwai Manasa a̱ ugula̱ u ni ɗa u bankai le wi Isaraila. 14 Ɗa Yakubu u pasamgbanai ekiye a̱ ni, u zuwakai kukiye ku usingai a kaci ka vuza kenu Ifirayimu, ugula̱ kpamu a kaci ka Manasa.
15 Ɗa u zuwakai Isufu una̱singai ɗa u danai,
<<Ka̱shile ka na Ikaya i va̱
Ibirahi n Ishaku o tonoi,
Ka̱shile ka na kpamu kokpoi maguɓi ma̱ va̱
a wuma u va̱ ali a̱ kuta̱wa̱ anana,
16 kalingata ka na ki isai mu, a̱ ubuta̱ u uma a gbani-gbani
u zuwaka olobo a nampa una̱singai.
Ka̱sukpa̱ e ɗeke le n kula ku va̱,
n kula ku ikaya i va̱ Ibirahi n Ishaku.
Ya'an a lya'a kelime n kumatsa n a̱bunda̱i
a yimkpa a aduniyan.>>
17 Ana Isufu we enei esheku a a zuwa ta̱ kukiye ku usingai ku ni a kaci ka Ifirayimu, ka̱ɗu ka̱ ni ka ciga ba, ɗa u takpai kukiye ku ni a kaci ka Ifirayimu u zuwai ku ɗa u Manasa. 18 Ɗa Isufu u danai esheku a̱ ni, <<Ta nannai ba dada! A̱yi ɗa magaji. Zuwa kukiye ku usingai ku nu a kaci ka̱ ni.>>
19 Ama ɗa esheku a a iwain ɗa a danai, <<N yeve ta̱ maku ma̱ va̱. A̱yi ɗa u kokpo esheku a uma n a̱bunda̱i, wi ta̱ kokpo vuma vu gbayin. Ko n nannai ntsukaya n vangu ma mi ta̱ a kula'a n a̱bunda̱i, ntsukaya n ni kpamu mi ta̱ o kopko kumaci n a̱bunda̱i.>> 20 Ta Isaraila u zuwakai le una̱singai a kanna ka nanlo n u danai,
<<N kula ku nu ku ɗa aza a Isaraila a kuya'an kadanshi ku una̱singai u nampa,
i ta̱ a kudana, <Ka̱sukpa̱ Ka̱shile ka zuwa ɗa̱ yo okpo tsu Ifirayimu m Manasa.> >> Ta u zuwai Ifirayimu e kelime ka Manasa nannai.
21 Ɗa Isaraila u danai Isufu, <<Mpa ɗa na n ya'an ta̱ ɗevu n ukpa̱, ama Ka̱shile ki ta̱ o kuyongo n avu, wi ta̱ kpamu o kubonoko wu a iɗika yi ikaya i nu. 22 Mpa mi ta̱ e kuneke wu uɓon u Shekem, ugboku u te u na u la'i wa aza a̱ nu, ubuta̱ u na mi isai a ekiye aza Amoriya n kotokobi ka ikaya i va̱.>>