Katagarda ka
Hagai
Kuɓa̱yuwa̱
Katagarda ka Hagai ki ta̱ uɗiki n akaka a gbati-gbati a na keneki Hagai u ciya̱i a̱ ubuta̱ u Vuzavaguɗu a̱ ka̱ya̱ ka amangatawantawun n kamanga (520) kafu a matsa Yesu (KY). Cina ɗe uma a̱ ka̱sukpa̱ ubuta̱ u tsugbashi o bonoi o yongoi a Urushelima a̱ya̱ kenu, ama A̱Ꞌisa̱ a gbayin a, a buwa ta̱ ufa̱di. Akaka a, a zuwa ta̱ aza e kelime a uma a maꞋasaka A̱Ꞌisa̱ a gbayin. Ɗa Vuzavaguɗu u yaꞋin uzuwakpani u kulyaꞋa ku kelime n kuciya̱ ku ma̱ta̱na̱ a kubana, u uma a na a sabaꞋi nwalu n le, ɗa o bonoi ciɗa.
Ili i na yi punu udari
E nekei kadanshi a maꞋasaka A̱Ꞌisa̱ a gbayin 1:1-15
Akaka a̱ uka̱ni u ka̱ɗu n kukeɗe a̱pa̱Ꞌa̱ 2:1-23
1
Uneki u kadanshi a maꞋasaka A̱Ꞌisa̱ a gbayin
1 A kanna ka iyain ko wotoi u ta̱li, a̱ ka̱ya̱ ke ire ko tsugono tsu Dariyu, Vuzavaguɗu u yaꞋin kadanshi n keneki Hagai, udanai, yaꞋan kadanshi n Zerubabelu kolobo ka Shiyatiyelu, gomuna vu Yahuda, n Jesuwa kolobo ka Jehozadaku ganu vu gbayin.
2 Ili i na Vuzavaguɗu MalaꞋimili u danai i ɗanna, <<Uma a nampa a danai, <Ka̱ta̱ ayin a yawa a na a kumaꞋasaka A̱Ꞌisa̱ a gbayin a Vuzavaguɗu ba.> >> 3 Ɗa Vuzavaguɗu u yaꞋin kadanshi n keneki Hagai, u danai. 4 <<Yi ene ta̱ u gaꞋan ta̱ a makyan ma nampa i yongo a iꞋuwa i singai-singai, ka̱ta̱ i ka̱sukpa̱ A̱Ꞌisa̱ a gbayin okpo agali?>> 5 Gogo na i na Vuzavaguɗu MalaꞋimili u danai i ɗanna, <<La̱na̱i ukuna u ɗa̱! 6 I ci ca̱Ꞌa̱ ta̱ n a̱bunda̱i, ama ka̱ta̱ i kucikpa i kyaꞋa kenu. I ci lyaꞋa ta̱ ilikulyaꞋa, ama i ci cuwa̱ ba. I tsu soꞋo ta̱ mini, ama ma ci yawa ɗa̱ ba. I tsu uka ta̱ ntogu, ama n ɗa n tsu pala ɗa̱ uta̱ni ba. Aza a na a ci isa katsupu, adanshi i ta̱ a ku zuwa sa ikebe ya o nsolo n na n ta̱sa̱i.>>
7 Ili i na Vuzavaguɗu MalaꞋimili u danai i ɗanna, <<La̱na̱i ukuna u ɗa̱! 8 Kumbai a gaɗi vu nsasan ka̱ta̱ i tuka̱ nu nɗanga adama a na a maꞋasaka kpaꞋa ka, ciya̱ m pana uyoꞋo u ku ɗa, ka̱ta̱ kpamu n ciya̱ tsugbayin ɗe. 9 I tsu zuwa ta̱ a̱ɗu yi ta̱ a̱ kuciya̱ n a̱bunda̱i, ama ɗa kucikpa i ciya̱i kenu. Kenu vu na i tuka̱i a kpaꞋa, n tsu uvula̱ ta̱ i ɗa i laza, yiɗa̱i i zuwai nannai? Vuzavaguɗu MalaꞋimili u danai, adama a kpaꞋa ku va̱ ku na i ka̱sukpa̱i agali ɗa, ama yaba dem vu ɗa̱ wi ta̱ a kataci ka kumaꞋa kpaꞋa ku ni. 10 Ɗaɗa i zuwai gaɗi u sa̱nka̱i n ciza, iɗika kpamu i kpa̱ɗa̱i kumatsa ili. 11 N tuka̱i n uɗekpu a iɗika ya, n ubuta̱ wa aginda, n ashina a ilya, n ashina a itacishi, nu nɗanga n zaitu, n ili i na i tsu uta̱ a iɗika, ali n uma nu nnama dem, koɓolo n ulinga we ekiye u ɗa̱ feu.>>
Uma o tonoi wila̱ u Vuzavaguɗu
12 Ɗa Zerubabelu kolobo ka Shiyatiyelu, n Jesuwa kolobo ka Jehozadaku ganu vu gbayin, koɓolo n uma a na a buwai dem, o tonoi kadanshi ka Vuzavaguɗu Ka̱shile ke le, ɗa kpamu ushuki n kadanshi ka̱ ni ka na Vuzavaguɗu Ka̱shile ke le u suki u keneki Hagai. Ɗa uma a a panai wovon u Vuzavaguɗu. 13 Ɗa Hagai, vuza vu usuki vu Vuzavaguɗu, u danai uma akaka a, u danai, <<Mpa Vuzavaguɗu, mi ta̱ koɓolo n a̱ɗa̱.>> 14 Ta Vuzavaguɗu u saꞋwai ka̱ɗu ka Zerubabe kolobo ka Shiyatiyelu, gomuna vu Yahuda, n Jesuwa kolobo ka Jehozadaku, ganu vu gbayin nannai, n uma a na a buwai dem. A̱ ta̱wa̱i ɗa a̱ gita̱i ulinga u kpaꞋa ku Vuzavaguɗu MalaꞋimili, Ka̱shile ke le. 15 A̱ gita̱i ulinga a kanna ka kamanga n ka̱ na̱shi ko wotoi u ta̱li, a̱ ka̱tsuma̱ ka̱ ka̱ya̱ ke ire ko tsugono tsu Dariyu.