3
Unushi u Urushelima n ushibi u ni
1 Ili ya atakaci a kubana a̱ likuci yi ugbamiwasuvu,
likuci yi nshinda̱ n modoruko!
2 U tsu panaka vuza ba,
u tsu ushuku a lapulaka yi ba.
U zuwa ka̱ɗu u Vuzavaguɗu ba,
u gbaga Ka̱shile ka̱ ni ba.
3 Aza e kelime a̱ ni ikawu i yura̱ i ɗa,
aya'infada a̱ ni nkunzukunzu n ɗa n na n tsu uta̱ n kulivi,
ele na a tsu buka ili yi asa ba.
4 Eneki a̱ ni uma a kavama a ɗa,
aza a kalya'a a ɗa.
Anan ganu a̱ ni a natukpai,
ili i na yi ciɗa.
Ɗa kpamu a̱ kpa̱ɗa̱i kutono wila̱ u Ka̱shile.
5 Vuzavaguɗu na wi punu a̱ likuci ya,
wi ta̱ n usuɓi,
u tsu nusa ba.
Usana lakam u tsu ya'an ta̱ kasingai,
babu usana u na u tsu kpa̱ɗa̱ kuya'an kasingai,
ama uma a gbani-gbani i n wono ba.
6 Vuzavaguɗu u danai, <<N takpa ta̱ kumaci ka aduniyan,
ubuta̱ wu utsura u le u na̱mgba̱ ta̱.
Ɗa kpamu n la̱nga̱sa̱i uye u le,
ko vuza u tsu tono punu ba.
O bonokoi likuci i le agali,
ali ko vuza a buwaka punu ba,
ko vuza u buwa punu ba.
7 N danai, <Mayun uma a̱ va̱ a pana wovon u va̱,
ushuku n kulapulu.>
I o kudoku kutakpa asuvu e le,
a kakuna ka na m ɓarangi le ba.
Ama ɗa o doku ya'in mali,
a natukpa ka̱ci ke le.
8 Vuzavaguɗu u danai,
<< Vanai, kanna ka na n kuɗa̱nga̱ n ya'an kadanshi adama a̱ɗa̱,
adama a na n sheshe ta̱ n ɓolongu uma aduniyan,
n tsugono kakau,
adama a na n tsuwa̱nka̱ le wupa u va̱,
n asuvu a usuɗukpi a̱ va̱ dem.
adama asuvu a usuɗukpi e cishe'e tsu va̱,
i ta̱ o kusongu aduniyan ra̱ka̱.
9 <<Ka̱ta̱ m bonoko elentsu a uma a̱ va̱ ciɗa,
adama a na ra̱ka̱ vi le e ɗeke kula ku Vuzavaguɗu,
ka̱ta̱ a cikpa yi n ka̱ɗu ke te.
10 Ili i na i ɗikai a nɗolu n Kushi,
aza a na a ci cikpa mu,
uma a̱ va̱ a na i uwaciwi,
i ta̱ a̱ kutuka̱ mu n kune'e.
11 <<A kanna ka nanlo i e kuneke wu wono ba,
adama a ugbamiwasuvu u na vu ya'ankai mu ba,
adama a na mi ta̱ a ku utuka̱ aza ugbamiwasuvu,
n aza a̱ra̱ɗi e mere ma̱ ɗa̱.
Yi o kudoku ya ya'an ugbamukaci,
a kusan ku ciɗa ku va̱ ba.
12 Ama mi ta̱ a̱ kuka̱sukpa̱ aza a̱ ma̱riki,
n aza a na o goyoi ka̱ci ke le,
aza a na e nekei a̱ɗu e le u Vuzavaguɗu.
13 Aza a Isaraila a na a buwai,
i o kudoku a ya'an unushi ba,
i kpamu a kudansa a'uwa ba,
adama a na kelentsu ka a'uwa ki o kuyongo a una̱ u le ba.
I ta̱ a kuya'an kalina a vaku,
ko vuza u kurikpa̱sa̱ le ba.>>
14 Ya'an ishipa, avu Sihiyona,
ɗa̱ngusa̱ ka̱la̱ka̱tsu ka̱u avu Isaraila.
Ya'an ma̱za̱nga̱ n izoshi,
avu Urushelima.
15 Vuzavaguɗu u takpaka wu ta̱ atakaci a̱ nu,
ɗa kpamu u lokoi irala i nu.
Vuzavaguɗu, mogono mi Isaraila, mi ta̱ e mere ma̱ nu,
vi a kupana wovon ba.
16 A kanna ka nanlo i ta̱ a kudana Urushelima,
<<Ka̱ta̱ vu pana wovon ba, avu Sihiyona,
ka̱ta̱ vu ka̱sukpa̱ ekiye a̱ nu a̱ kuwa̱ ba.
17 Vuzavaguɗu Ka̱shile ka̱ nu ki ta̱ e mere ma̱ nu,
kovonshi ka'a ka na ka̱ tsu ciya̱ ulya'i.
Wi ta̱ a kuya'an ma̱za̱nga̱ n avu,
wi ta̱ a ku saba'asaka wu n ucigi u ni,
wi ta̱ a kuya'an ma̱za̱nga̱ n avu a̱ ubuta̱ u kuya'an ki ishipa.
18 Tsu na a ci ya'an a kanna ka̱ ka̱ɗiva̱,
mi ta̱ a kutakpaka ɗa̱ ka gbani-gbani,
i o kudoku e neke ɗa̱ wono ba.
19 A ayin a nanlo, mi ta̱ a kutakacika,
aza a na i a kutakacika wu ra̱ka̱,
mi ta̱ a ku wawa ma̱kutsuma̱,
mi ta̱ kpamu o kuɓolongu aza a na ishi a wacuwai.
Mi ta̱ o kubonoko wono ucikpi,
i ta̱ a kulya'a kula aduniyan.
20 A ayin a nanlo mi ta̱ o kubonoko ɗa̱ a kpa'a,
n ɓolongu ɗa̱ a̱ ubuta̱ ute,
ka̱ta̱ n zuwa ɗa̱ i ya'an kula.
i ciya̱ ucikpi a ubuta̱ u uma aduniyan dem,
a ayin a na baci m bonokoi ɗa̱ n una̱singai u ɗa̱.>>
Mpa Vuzavaguɗu n dansai.