2
Afada adama irala i Yahuda
1 Ɓolongi, ɓolongi a̱ ubuta̱ ute,
a̱ɗa̱ uduniyan u na wi n wono ba,
2 kafu makyan ma na a zuwai ma yawa,
kafu o loko ɗa̱ tsu kopo,
kafu wupa u Vuzavaguɗu u ta̱wa̱ ɗa̱,
kafu kanna ka wupa ka Vuzavaguɗu ka̱ ta̱wa̱ ɗa̱.
3 La̱nsa̱i Vuzavaguɗu,
a̱ɗa̱ aza a na i goyoi ka̱ci ka̱ ɗa̱ aduniyan.
a̱ɗa̱ na yi o kutono wila̱ u ni,
la̱nsa̱i kasingai n kugoyo ka̱ci ka̱ ɗa̱,
u ga'an ba o sokongu ɗa̱ a kanna ka wupa Vuzavaguɗu.
4 Likuci i Gaza yi ta̱ o kokpo ko vuza,
Ashikelon wo okpo agali.
I ta̱ o kuloko aza a Ashidodu n kanna a kaci,
ka̱ta̱ a̱ mutsukpa̱ iɗika i Ekoron.
5 Ili ya atakaci i ɗa wa aza a na i o kuyongo a̱ ka̱kina̱ ka mala,
a̱ɗa̱ uma e Keritiya.
Kadanshi ka Vuzavaguɗu ki ta̱ a tsurala n avu,
avu Kana'ana, iɗika ya aza a̱ Filisitiya.
I ta̱ a ku una wu,
ko vuza u kubuwa n wuma ba.
6 Ka̱kina̱ ka mala, ki ta̱ o kokpo ubuta̱ u kaguɓa,
wi ta̱ o ku okpo ubuta̱ wu nguɓi n ushiga wu nkyon.
7 Ka̱kina̱ ka mala ka ki ta̱ o kokpo ubuta̱ wu uka̱ni,
wa aza a kagimi ka kpa'a ku Yahuda,
ubuta̱ u na a kuya'an kaguɓa.
N kulivi a vaku lo,
a i'uwa ya aza a Ashikelon.
Vuzavaguɗu Ka̱shile ke le wi ta̱ a̱ kula̱na̱ le,
wi ta̱ kpamu o kubonoko le n uciyi u le.
Afada adama a Mowabu n Amona
8 <<M pana ta̱ ulami u na aza a Mowabu a ya'in, n ishikushi i na aza a Amona a ya'in,
tsu na a ya'ankai uma a̱ va̱ ulami,
ɗa a ya'in a̱ra̱ɗi a danai i ta̱ a kulya'a iɗika i uma a̱ va̱
9 <<Adama a nannai,
mpa Vuzavaguɗu Mala'imili, Ka̱shile ki Isaraila,
n danai, n kucina ta̱ n wuma u va̱,
mayun Mowabu wi ta̱ o kokpo tsu Sodom,
Amona tamkpamu tsu Gomora,
iɗika ya yi ta̱ o kokpo ubuta̱ wa awana,
n enle a mkpaɗi a na a buwa n uga'in ba ko wannai.
Uma a̱ va̱ a na a buwai i ta̱ a̱ ku pura̱ ucanuku u le,
a lya'a uka̱ni u le.>>
10 Na ɗa katsupu ka na a̱ kuciya̱ adama a̱ a̱ra̱ɗi e le,
adama a ishikushi n ulami u na a ya'ankai uma a Vuzavaguɗu Mala'imili,
11 Vuzavaguɗu wi ta̱ o ku okpo ili i wovon we ele,
wi ta̱ a ku una a̱ma̱li aduniyan ra̱ka̱,
yaba dem aduniyan wi ta̱ a̱ ku kuɗa̱ngu wa̱ a̱ ni,
a ubuta̱ u na wi n iɗika yi uduniya u na u buwai.
Afada adama a iɗika i Kushi
12 A̱ɗa̱ aza a̱ Kushi
i ta̱ a ku una ɗa̱ n kotokobi.
Afada adama a Asiriya
13 Vuzavaguɗu wi ta̱ a̱ kuba̱rukpa̱ kukiye ku ni u shilika̱ n uɓon u gaɗi,
wi ta̱ a ku una Asiriya,
wi ta̱ o kubonoko Niniva agali,
uɗekpu tsu kakamba.2:13 Ish 10:5-34; 14:24-27; Nah 1:1--3:19
14 Ushiga wi ili i kuzuwa wi ta̱ a kuvaku e mere,
nu nnama n kakamba dem.
Asakali n ma̱kpa̱tuwa̱n,
i ta̱ o kuyongo a̱ kumi'i ku ni.
Ma̱shi ma̱kpa̱tuwa̱n a̱ kuta̱ n katusu,
ma agawun tamkpamu a̱ utsutsu,
i ta̱ a kupalukpa kukpa̱'a̱,
a̱ ka̱sukpa̱ ogboli a nɗanga n sida e keteshe.
15 Na ɗa likuci yi shi n tsugbayin,
i na yi shi n ma̱ta̱na̱.
I na i tsu danaka ka̱ci ka̱ ni,
<<Vuza vu yoku wi lo ba mpa ɗa koci.>>
la̱na̱ tsu na wo okpoi agali,
ubuta̱ wi iva'in yi nnama n kakamba.
Vuza na baci u walai lo dem,
wi ta̱ a kuya'an ka̱curu, ka̱ta̱ u gba̱ɗa̱ kaci.