Hosiya
Kuɓa̱yuwa̱
Keniki Hosiya u ya'an ta̱ ulinga u ni a uɓon u gaɗi wi iɗika ya aza a Isaraila, ana Keneki Emosu u kotsoi ulinga u ni a ayin a atakaci kafu Samariya u yikpa̱ a̱ ka̱ya̱ ka 721 BC. Ili i na u zuwakai katsura kudansa i ɗaɗa ukuna u kutono ka̱ a̱ma̱li ku uma a nanlo koɓolo n ukpa̱ɗi u kuneke a̱ɗu u le u Ka̱shile. Hosiya u gisanki ukpa̱ɗi u kuneke wa̱ a̱ɗu u nampa derere n yolo i ni i na u ya'in n vuka vu ukpa̱ɗi u kushiya kaci. Derere tsu na vuka vi ni Goma u kpa̱ɗa̱i kusuɓa̱ yi, nannai ɗa uma a̱ Ka̱shile a̱ ka̱sukpa̱i Vuzavaguɗu. Adama a ukuna u nampa, afada i ta̱ a̱ kuta̱wa̱ wa aza a Isaraila. N nannai dem a kubana a uteku, ucigi u gbayin u Ka̱shile wi ta̱ a kuya'an ulinga, ka̱ta̱ u bonoko iɗika ya kpamu wa̱ ni ali ucigi wa u lya'a kelime feu. Ucigi u nampa u yotsongu ta̱ u ɗa a̱ ubuta̱ u kuya'an kadanshi, <<Nini ɗai n kuka̱sukpa̱ ɗa̱, a̱ɗa̱ aza a Isaraila? Ka̱ɗu ka̱ va̱ ka̱ kuka̱sukpa̱ mu n ya'an nannai ba. Ucigi u va̱ a kubana wa̱ ɗa̱ wi ta̱ n utsura ka̱u.>> 11:8.
Ukuna u Katagarda ka nampa
Yolo i Hosiya n limata i ni 1:1-3, 5 Akaka a wuya a kubana wa aza a Isaraila 4:1-1; 3:16 Akaka a kucinukpaka ku unushi n uzuwakpani 14:1-9.
1
1 Vuzavaguɗu u ya'in kadanshi n Hosiya maku ma Beri, a makyan ma na mogono Uziya wi o tsugono, ɗa kpamu u lya'i kelime a ayin o Jotam, Ahazu n Hezekiya ngono n Yahuda, n ayin a na Jerobuwam maku ma Jowashi wi mogono mi Isaraila.
Vuka vu Hosiya m muku n ni
2 Akaka a ugiti a na Vuzavaguɗu u danai Hosiya, a ɗaɗa, <<Bana, vu ɗika kashakanlai wo okpo vuka vu nu, ka̱ta̱ i matsa muku n tsugbani, tsu na uma a̱ va̱ i a tsugbani ka̱u, a̱ ka̱sukpa̱i uye u Vuzavaguɗu.>> 3 Ɗa u banai u zuwai Gomaru, mekere ma Dibilayim, ɗa u ya'in ka̱tsuma̱ ali ɗa u matsakai ni maku mo kolobo.
4 Ɗa Vuzavaguɗu u danai Hosiya, <<Vu ne'e maku ma kula Jezirelu, adama a na makyan kenu mi ta̱ a kutakacika kpa'a ku Jehu adama a mpasa n Jezirelu. Ka̱ta̱ kpamu n zuwa tsugono tsu kpa'a tsa aza a Isaraila tsu kotso. 5 A kanna ka nanlo ka'a ma kuzuwa utsura wa aza a Isaraila u kotso ɗe a̱ ka̱ra̱ ka Jezirelu.>>
6 Ɗa Gomaru u doku u ɗikai ka̱tsuma̱ u matsai mekere. Ɗa Vuzavaguɗu u danai Hosiya, <<Ne'e maku ma kula Lo-rahama, ɗaɗa mi a kupana asuvayali a kpa'a ku Isaraila, ali n cinukpaka le unushi u le ba. 7 Ama mi ta̱ a kupana asuvayali a kpa'a ku Yahuda, Mpa Vuzavaguɗu Ka̱shile ke le mi ta̱ a ku isa le. Ama ba n ucanuku u kuvon ko kaya'a ko kotokobi ko odoku ko akumbi e le ba,>>
8 Ana Gomaru u kasai Lo-rahama mani, ɗa u doku u ɗikai ka̱tsuma̱ ko yoku u matsai maku mo kolobo. 9 Ɗa Vuzavaguɗu u danai, <<Ne'e maku ma kula Lo-ami. adama a na Vuzavaguɗu u dana ta̱ aza a Isaraila uma a̱ va̱ a ɗa ba, mpa kpamu Ka̱shile ke le ka'a mi ba.>>
10 Ko n nannai dem, ka̱bunda̱i ka aza a Isaraila ki ta̱ o ko okpo tsu kayala ka mala, ka na ki kugisanku ko kukece ba. A̱ ubuta̱ u na wi ishi u danai le, <<A̱ɗa̱ uma a̱ va̱ a ɗa yi ba,>> Ka̱ta̱ a dana le,<<Muku n Ka̱shile ka wuma.>> 11 Ka̱ta̱ o ɓolongu uma Yahuda n uma a Isaraila okpo vu te, i ta̱ a zagbaka ka̱ci ke le vuza kelime vi te, n vuza kelime vu nanlo ɗa a̱ ku uta̱ isa iɗika le. Adama a na kanna ka nanlo ki ta̱ o ko okpo kanna ka gbayin ka Jezirelu.