2
Unambi wu usuɓi wi Isaraila
1 Ka̱ta̱ vu ɗeke aza a̱ nu a Isaraila, <<Uma a̱ va̱>>, n ataku a̱ nu,<<M pana ta̱ asuvayali e le.>>
2 <<Dana Isaraila a̱na̱ku a̱ nu, dana yi,
adama a na a̱yi vuka vu va̱ ɗa kpamu ba,
mpa kpamu vali vu ni ɗa ba.
Danai yi u ka̱sukpa̱ tsugbani n tsu cishakanlai,
u sa̱nka̱ uma a na a kusa'wa yi mani.
3 Ta baci nannai ba, mi ta̱ ka̱sukpa̱i yi koshomboɗi,
n ka̱sukpa̱ yi tsu na a matsai ni,
ka̱ta̱ m bonoko yi tsu iɗika i na yi n ili ba
ali mu una yi n kakuli.
4 Mi a kupana asuvayali e le ba,
adama a na ele muku n na a matsai a̱ ubuta̱ u cishakanlai n ɗa.
5 Adama a na a̱na̱ku e le kashakanlai ka'a,
a̱yi na u matsai le va u ya'an ta̱ ili i wono.
U danai, <Mi ta̱ o kutono ncigi n va̱,
ele na e ci neke mu ilikulya m mini mo kuso'o,
n tsugbere, n arikinla, m mani'in ali n ma̱kya̱n.>
6 Adama a nannai mi ta̱ a kukanza uye u ni n awana,
Mi ta̱ a kuma'aka yi mashilya adama a na ka̱ta̱ u ciya̱ uye u ku uta̱ ba.
7 Wi ta̱ kutono ncigi n ni, ama wi a kucina le ba,
Wi ta̱ a̱ kula̱nsa̱ le ama we kene le ba.
Ka̱ta̱ u dana, <Mi ta̱ o kubono u vali vu va̱ vu ugiti,
adama a na ida̱shi i vali vu va̱, i la'a ta̱ i gogo na.>
8 Ama u yeve a na mpa ɗa n ci n neke yi ilikulya, ma̱kya̱n ma savu m mani'in ba,
n azurufa n azanariya n a̱bunda̱i,
a na u ya'ankai ulinga a̱ ubuta̱ u ka̱ma̱li ka Balu.
9 Adama a nannai a makyan ma vukya'a mi ta̱ a̱ a ku isa ilikulya'a i va̱,
n ma̱kya̱n ma̱ va̱,
n tsugbere tsu va̱,
a na n neke ni u palakai ka̱ci ka̱ ni.
10 Gogo na mi ta̱ a̱ kuka̱sukpa̱ yi koshomboɗi,
a̱ a̱shi a ncigi n ni,
babu vuza na wa ku isa yi ekiye a̱ va̱.
11 Mi ta̱ a kuzuwa yi u kpa̱ɗa̱ ku ya'an ma̱za̱nga̱,
n ka̱ɗiva̱ ka̱ ni ka na u ci ya'an a̱ ka̱ya̱ dem, n ko wotoi u savu,
n ka kanna ka Ashibi ka̱ ni, n ka kanna kakau ka̱ ni.
12 Mi ta̱ a̱ kula̱nga̱sa̱ ashina a itacishi a̱ ni, nu nɗanga mu mbiri n ni, n na u danai,
<Na va ɗaɗa katsupu ka̱ va̱,
ka na ncigi n va̱ n nekei mu>
mi ta̱ a kuzuwa le okpo kakamba ka na ki n ili ba,
ka̱ta̱ nnama n kakamba n takuma le.
13 Mi ta̱ a kutakacika yi, adama a ayin a na u cinukpai nu mpa,
ana u songi ili i ma̱gula̱ni yi alyuka u Balu,
u ukai iliyatsuvu nu nkawani ma azanariya,
u tonoi ncigi n ni,
mpa Vuzavaguɗu n danai.
Ucigi u Vuzavaguɗu a̱ ubuta̱ u uma a̱ ni
14 <<Adama a nannai mi ta̱ a kukparasa yi
m banka yi e meremune,
ka̱ta̱ n ya'anka yi kadanshi ka na ka kuva'anka yi ka̱ɗu.
15 Ta ɗe n kubonoko yi n kashina ki itacishi ka̱ ni,
ka̱ta̱ m bonoko una̱mgbi u ka̱tsuma̱ u ni, ubuta̱ u kukeɗe a̱pa̱'a̱,
Ta ɗe wa ku ushuku mu,
tsu ayin e cikere ci ni,
n tsu makyan ma na wu uta̱i a iɗika i Masar.
16 Vuzavaguɗu u danai, <<A kanna ka nanlo,
vi ta̱ e kuɗeke mu, <Vali vu va̱,>
Vi o kudoku kuɗeke mu <Balu ba.>
17 Mi ta̱ a kutakpa kula ku Balu a una̱ u ni,
wi o kudoku kuɗeke kula ku ni ba.
18 A kanna ka nanlo mi ta̱ a kuya'an uzuwakpani,
nu nnama n kakamba nu nnu,
n ili i na yi a̱ nkuɗa̱ru a iɗika,
adama a na uma o yongo m ma̱ta̱na̱.
Mi ta̱ o kukoɗoso ucanuku u kuvon a iɗika ya,
kotokobi n utan,
ka̱ta̱ a ya'an ida̱shi i le m ma̱ta̱na̱.
19 Mi ta̱ a kuɗika wu vo okpo vuka vu va̱ vu ko wannai,
mi ta̱ a̱ kuɓa̱na̱ wu n usuɓi n kamayun,
n yotsongu ucigi u na u tsu saba'a ba,
n asuvayali.
20 Mi ta̱ a̱ kuɓa̱na̱ wu n usuɓi,
vi ta̱ e kuyeve a na mpa ɗa Vuzavaguɗu.
21 Vuzavaguɗu u danai, <<A kanna ka nanlo mi ta̱ a̱ ku ushuku avasa a̱ ni,
ka̱ta̱ n yo'o mini a iɗika.
22 Ka̱ta̱ iɗika i matsa ishina,
m ma̱kya̱n m mani'in ma zaitu,
i ta̱ a̱ ku ushuku n ka̱la̱ka̱tsu ke te a dana,
Jezirelu vi ca̱'a̱ vu Ka̱shile,
23 Mi ta̱ a kuzuwa uma a̱ va̱ a lya'a kelime a iɗika,
ka̱ta̱ m pana asuvayali a uma a na n danai mi a kupana asuvayali e le ba,
ka̱ta̱ n dana aza a na n danai uma a̱ va̱ ɗa ba, <A̱ɗa̱ ɗa uma a̱ va̱,>
Ka̱ta̱ ele feu a dana, <Avu ɗa Ka̱shile ka̱ tsu.> >>