2
Kusan ku Vuzavaguɗu
1 Na ɗa kene ku na Ishaya maku ma Amazo me enei adama a Yahuda n Urishelima.
2 A kanna ku uteku,
kusan ku kpa'a ku Vuzavaguɗu ki ta̱ a kuya'an ugiti,
ki ta̱ o kokpo ku gbayin wa aza a na a buwai,
ka̱ta̱ a̱ ɗengusa̱ ku ɗa ku la'a nsasan n na m buwai dem,
ka̱ta̱ kpamu iɗika kakau i na i buwai n a̱bunda̱i i shida̱ ɗe.
3 Uma n a̱bunda̱i i ta̱ a̱ kuta̱wa̱ ka̱ta̱ a dana,
<<Ta̱wa̱i tsu banai a̱ ubuta̱ u kusan ku Vuzavaguɗu,
a kpa'a ku Ka̱shile ka Yakubu.
Adama a na u yotsongu tsu uye u ni,
ka̱ta̱ a̱ tsu tsu tono ura̱ u ni.>>
Wila̱ u Vuzavaguɗu wi ta̱ a̱ kuta̱ a Sihiyona,
ka̱ta̱ kadanshi ka̱ ni kuta̱ a Urishelima feu.
4 Wi ta̱ a kuya'anka iɗika kakau afada,
ka̱ta̱ kpamu u tatsukpa vishili u uma n a̱bunda̱i.
I ta̱ a kulapa otokobi e le a̱ ka̱ta̱la̱ a ɗa,
ka̱ta̱ kpamu a jara nsara n le mo okpo tsu nkaun n kugeceke ili.
Iɗika yo kudoku ya̱ shilika̱ n iɗika i yoku ba,
ko o doku o yotsongbonoi tsu na a kuya'an kuvon kpamu.
5 A̱ɗa̱ ntsukaya n Yakubu,
ta̱wa̱i tsu walai a̱ ubuta̱ u kutashi ku Vuzavaguɗu.
Kanna ka Vuzavaguɗu
6 Mayun Vuzavaguɗu vu ka̱sukpa̱ ta̱ uma a̱ nu
aza a kpa'a ku Yakubu
adama a na a shana ta̱ n ukuna u tsuboci wa aza a kasana,
o yongoi a kuya'ansa ulinga u kula̱na̱ tsa aza A̱filisiya̱
ɗa o ɓolongi una̱ n aza o kutono a̱ma̱li.
7 Iɗika i le i shana ta̱ n Azurufa koɓolo n azanariya,
uciyi u le wi n uteku ba.
Iɗika i le i shana ta̱ n odoku,
ekeke o odoku e le i n uteku n kula ba.
8 Iɗika i le i shana ta̱ n a̱ma̱li kakau,
a ci cikpa ta̱ ili i na a ya'in n ka̱ci ke le,
i na ekiye e le a ya'in.
9 Adama a nannai i ta̱ o kubonoko vuma ukuna u gbani,
umaci u vuma dem u ciya̱ ugoyi,
adama a nannai ka̱ta̱ vu cinukpaka le ba.
10 Banai i uwa a akpanlai
ka̱ta̱ i sheɗeku punu a kayala,
adama o wovon u Vuzavaguɗu
koɓolo n uga'in u tsugbayin u ni.
11 A̱shi a vuza va a̱ra̱ɗi i ta̱ a̱ kuciya̱ kugoyi,
ka̱ta̱ a̱ra̱ɗi a uma a ya'an ucipiki,
ka̱ta̱ yeve Vuzavaguɗu ende'en u ciya̱ ucikpi a kanna ka nanlo.
12 Vuzavaguɗu Mala'imili u zagba ta̱ ɗe kanna
ka na aza a na i n a̱ra̱ɗi n ugbamukaci,
ele na a tsu kungbasa ka̱ci ke le
ra̱ka̱ ci le i ta̱ a kuya'an ugoyi.
13 Uma a ugaɗi tsu nɗanga n sida*2:13 Sida maɗanga mo yoku ma'a ma na mo yotsoi maɗanga ma kakawu n Lebano i ta̱ a kuya'an wuni,
nannai ɗa feu a kuya'an n uma a gbagba'in ra̱ka̱ a na i tsu nɗanga n Oku ma aza a Bashan,
14 nu nsasan mu ugaɗi dem
ali n aginda a ugaɗi feu,
15 mashilya mu ugaɗi de dem
koɓolo m mashilya ma gbayin,
16 n antsu a gbagba'in a̱ mini dem a na i a Tarishi
n antsu e keke'e a singai feu.
17 Ugbamukaci u vuma wi ta̱ a̱ kuciya̱ kugoyi,
ka̱ta̱ a̱ra̱ɗi a uma a ya'an ucipiki,
ka̱ta̱ yeve Vuzavaguɗu ende'en u ciya̱ ucikpi a kanna ka nanlo,
18 ka̱ta̱ a̱ma̱li a̱ puwa̱nka̱ gbende-gbende.
19 Uma i ta̱ a kusuma a ku'uwa a aɓatsu punu a akpanlai
koɓolo n enle punu a iɗika,
adama a wovon u Vuzavaguɗu
koɓolo n uga'in u tsugbayin u ni
a ayin a na baci u ɗa̱nga̱i ɗa u gba̱ɗa̱i iɗika.
20 A kanna ka nanlo uma i ta̱ a kuvakanku
mpopi n a̱zuwa̱
a̱ma̱li a na a ya'in n Azurufa n a na a ya'in n azanariya dem,
a na a ya'ankai ka̱ci ke le adama a na a cikpa.
21 I ta̱ a kusuma kubana a aɓatsu a gbagba'in
a na i a akpanlai n amgbu
adama o wovon u Vuzavaguɗu
koɓolo n uga'in u ni,
a ayin a na baci u ɗa̱nga̱i kugba̱ɗa̱sa̱ iɗika.
22 ka̱sukpa̱ kuneke katsura ka̱ nu u vuma,
a̱yi na wi n ikyamba nu mpasa.
A̱yi yiɗa̱i tamkpamu wi?