3
Afada adama a Urishelima n Yahuda
1 Indana, Vuzavaguɗu,
Ka̱shile ko osoji a gaɗi,
wi ta̱ a kuciga kutakpa Urushelima n Yahuda ili ra̱ka̱ i na a zuwakai katsura.
Wi ta̱ a kutakpa ubuta̱ u na a̱ ci ciya̱ ilikulya
n ubuta̱ u na a̱ ci ciya̱ mini dem a Urishelima koɓolo n Yahuda,
2 kovonshi koɓolo n kosoji,
kaya'inkafada n keneki,
aza a kindana koɓolo nu nkoshi m gba̱ra̱-gba̱ra̱,
3 vuza kelime vu kinda osoji amangerenkupa n vuza vu tsugbayin,
aza o odoki, eyevi koɓolo n aza a kindana.
4 Mi ta̱ a kuzuwa a̱ɗa̱nga̱ni okpo aza gbagba'in e le,
muku tamkpamu n lya'aka le tsugono.
5 Uma i ta̱ a kutakacikanai,
yaba dem n vuza ni, yaba dem kpamu n vuza na i ida̱shi ɗeɗevu.
A̱ɗa̱nga̱ni i ta̱ o kugoyo nkoshi,
ka̱ta̱ aza a na i ili i yoku ba o goyo aza a na i n tsugbayin.
6 Vuza wi ta̱ a̱ kuka̱na̱ vuza ni
a kpa'a ke esheku a̱ ni ka̱ta̱ u dana,
<<Vi ta̱ n kuminya, okpo vuza kelime vu tsu,
la̱na̱ ka̱kiza̱ ka agali ka nampa ka.>>
7 Ama a kanna ka nanlo wi ta̱ a̱ kushika̱ n ka̱la̱ka̱tsu ka̱u a kudana,
<<Mi n a̱guma̱ ba.
Mi n tsuwa'a ko akashi a kpa'a ku va̱ ba,
ka̱ta̱ vu zuwa mu mo okpo vuza kelime vu uma ba.>>
8 Adama a na Urushelima wi ta̱ a̱ kuta̱ɗa̱tsa̱,
Yahuda wi ta̱ a̱ kuyikpa̱,
kadanshi ke le n ulinga u le ka̱ uta̱ u Vuzavaguɗu ba,
a kushika tsugbayin ci ni a̱yi e kene.
9 Kindi ku a̱shi ku le kuyotsongu ta̱ tsu na i,
a̱ uta̱i e keteshe a̱ ubuta̱ u kuya'an ku unushi u le tsu Sodom
babu usokongi.
Ili ya atakaci i ɗa a kubana we le,
o ronoko ta̱ ka̱ci ke le kadama.
10 Danai aza a usuɓi e le i n kadama ko yoku ba,
a kupana ta̱ uyo'o wu ulinga wu usuɓi u na a ya'in.
11 Ili ya atakaci i ɗa a kubana wa aza a kawuya, kagbanigbani ki ta̱ a kaci ke le,
i ta̱ a kutsupa le adama a ili i na ekiye e le a ya'in.
12 A̱ɗa̱nga̱ni takacikai uma a̱ va̱,
a̱ma̱ci lya'i tsugono we le.
A̱ɗa̱ uma a̱ va̱, aza e kelime a̱ ɗa̱ a uka ɗa̱ ta̱ a kakamba,
a ɓatsai n a̱ɗa̱ i ka̱sukpa̱i uye.
13 Vuzavaguɗu u da̱sa̱ngu ta̱ a kakuba ka afada ka̱ ni,
u ɗa̱nga̱ ta̱ adama a na u ya'anka uma a̱ ni afada.
14 Vuzavaguɗu wi ta̱ a kuya'an afada,
aza e kelime n aza gbagba'in a uma a̱ ni, u danai,
<<A̱ɗa̱ ɗa i la̱nga̱sa̱i kashina ki itacishi ka̱ va̱,
i ɓolongi a i'uwa i ɗa̱ ili i na i pura̱i a ubuta̱ wa aza a unambi.
15 Vuzavaguɗu vo osoji a gaɗi u danai, yiɗa̱i vi cigai n kuminjarangu uma a̱ va̱
ɗa kpamu vi iyai a̱shi a aza a unambi?>>
16 Vuzavaguɗu u danai,
a̱ma̱ci a Sihiyona i ta̱ n kadanshi ka̱ a̱ra̱ɗi,
a kuwala n lelei eɗeku ci ishakau,
a kuya'an kuyun n a̱shi e le,
ɗa kpamu i a kudasa n adyangi ɗeɗevu,
n nshingi m gba̱ra̱-gba̱ra̱ u uki a asangulu e le.
17 Adama a nannai, Vuzavaguɗu wi ta̱ a kuzuwa usa̱n a aci a̱ a̱ma̱ci a Sihiyona,
u zuwa aci e le o okpo n kukpani.
18 A kanna ka nanlo Vuzavaguɗu wi ta̱ a kisa ili dem i na i ci neke yi uga'in, ilikuɗeku, nshingi ma asangulu, n vutali vu kaci, 19 ili ya atsuvu, m mawaru ma̱ kuyun, koɓolo n ka̱ka̱la̱bi, 20 ogoni a kaci, ni nshingi ma asangulu i n kazuwatsu, n kuluba vu mani'in ma̱ ma̱gula̱ni koɓolo n ala'win, 21 nkawani mu urotu u ka̱ta̱mba̱ri nu nkawani n vunu, 22 n aminya a singai, nu ntogu, n a̱bu koɓolo n azuwatsu, 23 m mindatsu, koɓolo n kuminya ku urumbuki n vutali vu kaci koɓolo m kalaba.
24 A na wa ya'an ma̱gula̱ni vi ta̱ o kubono ushami,
a na wa ya'an kaɗambura wi ta̱ o kubono kawin,
a na wa ya'an ka̱nji ka na a lapulai sa̱wu wi ta̱ o kubono kukpani,
a na wa ya'an kuminya ku singai wi ta̱ o kubono kakashi,
a na wa ya'an n tsuloboi wi ta̱ o kubono ili i wono.
25 Ali a̱ ɗa̱ i ta̱ a kubana ukpa̱ u kotokobi,
osoji a̱ ɗa̱ i ta̱ a̱ kukuwa̱ a ubuta̱ u kuvon.
26 Utsutsu u Sihiyona wi ta̱ a̱ kushika̱ ka̱ta̱ kpamu u yongo n una̱mgbuka̱tsuma̱,
wi ta̱ a̱ kuda̱sa̱ngu a iɗika koshomboɗi.