19
Kene ku wuya adama a iɗika i Masar
1 Na va ɗaɗa kadanshi adama a Masar,
La̱na̱i Vuzavaguɗu ɗa lo a̱ kuta̱wa̱ e keleshu
ka na ki a kusuma ka̱u a̱ kuta̱wa̱ a Masar.
A̱ma̱li aza a Masar i ta̱ e kujeꞋeke ikyamba kelime ka̱ ni
ɗa ikyamba ya aza a Masar i kuwa̱i.
2 <<Mi ta̱ a kukushangu aza a Masar a̱ shilika̱ uteku u le,
ka̱ta̱ a̱ shilika̱ vuza n vuza ni,
yaba dem n vuza na i ida̱shi koɓolo,
likuci kpamu i shilika̱ n likuci i yoku, tsugono kpamu a̱ shilika̱ n tsugono ci yoku.
3 Aza a Masar i ta̱ a̱ kuta̱ka̱ n a̱ɗu e le,
ka̱ta̱ mpa n zuwa kusheshe ku le kokpo ukuna u gbani,
i ta̱ a kucinaka a̱ma̱li e le n a̱kpisa̱
koɓolo n eneki n oboci.
4 Vuzavaguɗu MalaꞋimili u danai kpamu,
mi ta̱ e kuneke aza a Masar
u vuzagbayin va asuvu awuya,
ka̱ta̱ mogono ma asuvu a usuɗukpi ma lyaꞋa tsugono we le.>>
5 Mini ma mala mi ta̱ e kuɗekpe,
ka̱ta̱ kuyene ku kotso ali ku kuɗekpe.
6 Nka̱riki dem mi ta̱ a̱ kuꞋinka̱,
nyeneke n wawaꞋa dem m Masar mi ta̱ e kuɗekpe.
Ka̱ta̱ ajanu n apulufa ra̱ka̱ a lumba,
7 koɓolo kpamu n ica̱Ꞌa̱shi i na yi a uɓon u mala ma̱ Nilu,
n i na yi a̱ ka̱kina̱ ka mala feu.
Kashina ka na ki uca̱Ꞌi a uɓon u mala dem ki ta̱ e kuɗekpe,
ka̱ta̱ wunla̱i u pura̱ le babu ili i na i kubuwa.
8 Osoruku i ta̱ a̱ kushika̱ n una̱mgbuka̱tsuma̱,
n aza a na a ci yaꞋan karaɗa dem e kuyene ku Nilu,
n aza a na a tsu taɗuku ubirigi
i ta̱ o kuyongo a̱ yura̱.
9 Aza a na a ci yaꞋan kucaꞋa n tsugbere tsa akaɗa i ta̱ a̱ kuka̱sukpa̱,
aza a na kpamu a tsu caꞋa aminya kpamu i ta̱ a̱ kuta̱ka̱ n a̱ɗu e le.
10 Aza a na i a kuyaꞋan ulinga u kucaꞋa ka akashi a̱ɗu a̱ kuna̱mgba̱ le ta̱.
Aza a na a ci yaꞋan zamalinga a̱ɗu a̱ kuna̱mgba̱ le ta̱.
11 Aza gbagbaꞋin a Zowa alau gbani-gbani a ɗa,
aza a ugboji a na e ci neke FiriꞋauna kadanshi e neke yi ta̱ odoki a gbani-gbani.
Nini ɗai va kudana FiriꞋauna.
<<Mpa mi ta̱ a̱ ka̱tsuma̱ ka aza a ugboji,
maku mo ngono ma aza a cau>>?
12 Te ɗai aza ugboji a̱ ɗa̱ i?
YaꞋan a dana ɗa̱
ka̱ta̱ a̱ ka̱sukpa̱ ɗa̱ i yeve ili i na Vuzavaguɗu MalaꞋimili u sheshei kuyaꞋanka aza a Masar.
13 Aza a̱ gba̱ra̱-gba̱ra̱ a Zowa o okpo ta̱ alau,
o doro ta̱ aza e kelime a Manpis,
aza a tsugbayin a̱ likuci i le
ele ɗa a vakangi aza a Masar.
14 Vuzavaguɗu u suꞋuku ta̱ aza a Masar n wunla̱i u gbani-gbani,
u ɗa wi ta̱ a kuzuwa aza a Masar a tambalukpa n i na a kuyaꞋan dem,
tsu na kosoꞋi ka̱ ma̱ra̱ u tsu puɗa̱la̱ a̱ ubuta̱ wa ashama a̱ ni.
15 Ili i yoku yi lo i na aza a Masar a kuyaꞋan ba,
a buwa n ka̱ɓa̱nki ba, kaci ko winja, kacaka ke kekeme ko kapulufa.
16 A kanna ka nanlo aza a Masar i ta̱ o kokpo an a̱ma̱ci. I ta̱ o kokpo n wovon ka̱u adama Vuzavaguɗu MalaꞋimili u ɗengusa̱ ta̱ kukiye ku ni an wa takacika le. 17 Iɗika i Yahuda yi to o kokpo ili i wovon a kubana wa aza a Masar, yaba dem vu na baci u panai e ɗekei kula ku Yahuda wi ta̱ a kupana wovon adama a ili na Vuzavaguɗu MalaꞋimili u sheshei ɗe kuyaꞋanka le.
18 A kanna ka nanlo likuci i tawun i kuyaꞋan ta̱ lo ya aza a Masar, i na i tsu dansa n kelentsu ka aza KanaꞋana ka̱ta̱ kpamu a yaꞋan akucina o kutono Vuzavaguɗu MalaꞋimili. A̱ ka̱tsuma̱ ke le i ta̱ e kuɗeke likuci i te likuci i munuka.
19 A kanna ka nanlo i ta̱ a̱ kuciya̱ katalikalyuka ka Vuzavaguɗu punu e mere mi iɗika i Masar, ka̱ta̱ a cina ɗe ma̱shikpu ma Vuzavaguɗu e kureꞋe ku ni. 20 Wi ta̱ o kokpo ili yi urotu nu ngaꞋan u Vuzavaguɗu MalaꞋimili a iɗika i Masar. Ayin a na baci a̱ shika̱i a kubana u Vuzavaguɗu adama aza na i a kutakacika le, wi ta̱ a̱ kusuꞋuku le vuza na u kisa le n vuza na u kuɓa̱nka̱ le ka̱ta̱ wi isa le. 21 A ayin a nanlo Vuzavaguɗu wi ta̱ o kuyotsongu ka̱ci ka̱ ni a kubana wa aza Masar, a kanna ka nanlo i ta̱ e kuyeve Vuzavaguɗu. I ta̱ a kucikpa yi n alyuka n kuneꞋe, ka̱ta̱ a yaꞋanka Vuzavaguɗu akucina ka̱ta̱ o tono a ɗa. 22 Vuzavaguɗu wi ta̱ a kulapa aza Masar m ma̱dukpa̱, wi ta̱ a kulapa le ka̱ta̱ u ta̱na̱ta̱ngu le. I ta̱ o kubono u Vuzavaguɗu ka̱ta̱ u panaka le ufolu u le ka̱ta̱ u potsotongu le.
23 A ayin a nanlo i ta̱ a kuyaꞋan uye u gbayin ɗe a Masar a kubana a Asiriya. Aza a Asiriya i ta̱ a kubana a Masar, aza a Masar kpamu i ta̱ a kubana wa aza a Asiriya. Ka̱ta̱ aza a Asiriya n aza a Masar a cikpa Vuzavaguɗu koɓolo.
24 A kanna ka nanlo aza a Isaraila i ta̱ o kokpo vuza tatsu koɓolo n aza a Masar n aza a Asiriya, o okpo una̱singai a aduniyan. 25 Adama a na Vuzavaguɗu MalaꞋimili wi ta̱ a kuzuwaka le una̱singai, ka̱ta̱ u dana, <<Una̱singai u ɗa a̱ɗa̱ aza a Masar uma a̱ va̱, n aza a Asiriya a na n yaꞋin n ekiye a̱ va̱, n aza a Isaraila aza agadu a̱ va̱.>>