30
Ili ya atakaci a kubana u likuci yu ugbamukaci.
1 Vuzavaguɗu u danai,
<<Ili ya atakaci i ɗa a̱ɗa̱ muku mu ugbamukaci,
a̱ɗa̱ na i tsu tono kusheshe ku ɗa̱, ku na ki ku va̱ ba,
a̱ɗa̱ na i ɓolongi una̱ babu kusheshe ku va̱,
nannai va ɗa yi o kudoku unushi katsura,
2 ɗa kpamu i lazai a kubana a Masar,
babu na ye ecei mu,
adama a na i la̱nsa̱ uɓa̱nki a̱ ubuta̱ u Firi'auna,
ka̱ta̱ i la̱nsa̱ ubuta̱ u kusheɗeku a̱ mululu m Masar.
3 Ama uɓa̱nki u Firi'auna wi ta̱ o kokpo ɗa̱ ili i wono,
kulu ku Masar ki ta̱ a̱ kutuka̱ ɗa̱ n wono.
4 Utsura u mogono wa u yawa ta̱ likuci i Zowa,
da'angi n tsuɗaka tsu Hane.
5 Yaba dem wi ta̱ o kokpo n wono,
adama a uma a singai a na i n ukuna u singai ba,
aza a na a̱ tsu ɓa̱nka̱ ba, ko a ya'an kasingai ko yoku
ama sai wono koci n ukuna u pete.>>
6 Akaka adama a nnama n kakamba n Negebu.
A̱ ubuta̱ wi iɗika i gbani-gbani n atakaci,
a̱ ubuta̱ u na ikawu i tsu ta̱wa̱,
n ubuta̱ wa agbaturu koɓolo n oko a gbani-gbani,
kololu ka uma ka ka ɗikai uciyi u le a njaki,
koɓolo n gaɗi va arakuma,
a kubana u uma a nanlo a a na i kuya'anka u ɗa ulinga ba.
7 Uɓa̱nki wi ɗika u Masar u gbani u ɗa, babu ili.
Adama a nannai ɗa n ɗekei ni
<<Rahapu ka̱di ka na ka tsu sa'wa vuza ba.>>
8 Gogo na, bana vu ɗana ka'a a magbaganla ele e kene,
ka̱ta̱ vu doku vu ɗanaka le ka'a a katakarda,
vu dana a kanna ka na ka̱ kuta̱wa̱
ki ta̱ o kokpo ngan n ayin dem.
9 Adama a na ele uma a ugbamukaci a ɗa n aza a uwa,
muku n na n cigai kupana kadanshi ka Vuzavaguɗu ba.
10 Ɗa a danai oboci a,
<<Ka̱ta̱ i doku i ya'an kene ba,>>
u danai kpamu eneki,
<<Ka̱ta̱ i doku i ya'anka tsu kene ku mayu ba.
Danai tsu ukuna u singai,
ko wa a'uwa u ɗa baci,
11 ka̱sukpa̱i uye u nampa wa,
ka̱ta̱ i doku i tono u ɗa ba,
ka̱sukpa̱i kudana tsu
ukuna u Vuza ciɗa vi Isaraila.>>
12 A dama a nannai, ili na Vuza ciɗa vi Isaraila u danai i ɗaɗa na.
<<Uteku tsu na i iwain akaka a nampa,
adama na i goyo ta̱ akaka a nampa,
ɗa i bonoi i zuwai katsura a̱ ubuta̱ wi ili i gbani-gbani,
koɓolo n ukuna u modoruko,
13 adama a nannai unushi u nampa wi ta̱ o kokpo
tsu uɓaci u mashilya mu ugaɗi, ma na ma̱ ka̱ga̱lukpa̱i ra̱ka̱,
an ma̱ yikpa̱ babu megeshe.
14 Wi ta̱ o kuɓoso miri-miri tsu mogbodo,
ma na mo ɓosoi ka̱mbu-ka̱mbu,
ma na a̱ ka̱tsuma̱ ka̱ a̱mbu a̱ ni vi a̱ kuciya̱ punu ka̱mbu
ka na va kukenuku akina ba,
ko ka na va kukenuku mini o kogbodo ba.>>
15 Na ɗa ili na Vuzavaguɗu Ka̱shile, Vuza ciɗa vi Isaraila u danai.
<<N kushika̱ ku unushi n kuvuka wa̱ va̱ ɗaɗa i kuciya̱ wishi,
kuyongo n ka̱bini n uneki wa a̱ɗu u ɗa̱, ɗaɗa katsura ka̱ ɗa̱,
ama ɗa i iwain.
16 Ɗa vu danai, <A̱'a̱, ci ta̱ a kusuma gaɗi vo odoku.>
Adama a nannai yi ta̱ a kusuma.
Ɗa a̱ɗa̱ i danai, <A̱ tsu ci ta̱ a kusuma gaɗi vo odoku a ilaɗi,>
Adama a nannai uma a̱ ɗa̱ a na i a kukiyangu tsu i ta̱ a kula'a n ilaɗi.
17 Uma a̱ ɗa̱ ka̱kpa̱n i ta̱ a kusuma
adama a vuma vi te,
ye ene baci uma a tawun
yi ta̱ a kusuma ra̱ka̱ vu ɗa̱,
ali i ta̱wa̱ yo okpo
tsu urotu u kakashi a gaɗi vu kusan,
uteku tsu urotu a kusan.>>
18 Adama a nannai Vuzavaguɗu u vana ta̱, adama a na u yotsongu ucigi u ni wa̱ ɗa̱,
ɗa kpamu u ɗa̱nga̱i adama na u yotsongu ɗa̱ asuvayali a̱ ni.
Adama a na Vuzavaguɗu a̱yi Ka̱shile ka mayun ka'a,
una̱singai u ɗa dem wa aza a na a vanai ni.
19 A̱ɗa̱ uma a na i ida̱shi a Sihiyona, n Urushelima, yi a ku doku kushika̱ kpamu ba. Mayun ɗa a̱yi wi ta̱ a kuciga ɗa̱, a ayin a na baci i lapai una̱ adama a na a̱ ɓa̱nka̱ ɗa̱. Makyan ma na baci u panai dem wi ta̱ a kushuku ɗa̱. 20 Ko an wo okpoi Vuzavaguɗu u neke ɗa̱ ta̱ ilikulya'a ya atakaci m mini ma atakaci, ko n nannai a̱yi malum ma̱ ɗa̱ wo kudoku wo sokongu a̱shi a̱ ni kpamu ba, ama n a̱shi a̱ ɗa̱ yi ta̱ e kene le. 21 Atsuvu a̱ nu i ta̱ a kupana kadanshi a̱ kucina̱ ku nu, a kudana <<Na va ɗaɗa uye, tono u ɗa,>> ko vu kpatala baci a usingai ko a ugula̱. 22 Ka̱ta̱ a̱ɗa̱ i la̱nga̱sa̱ a̱ma̱li a̱ ɗa̱ a na i yimai ɗa i paɗarai n azurufa koɓolo n ululu a azanariya a na i shikpa̱i. Ka̱ta̱ i varuku le uteku ci ili yu unata. Ka̱ta̱ i dana le, <<Walai, ka̱sukpa̱i tsu.>> 23 Wi ta̱ o kuyo'oko ɗa̱ mini adama a̱ icu'u i na i ca̱'i a iɗika, ka̱ta̱ ilikulya'a i na i kumatsa punu a iɗika ya i ga'an ka̱ta̱ kpamu i ya'an ba̱ri. A kanna ka nanlo kuzuwa ku ɗa̱ ki ta̱ a kulina a̱ ubuta̱ wi ijanu wa̱ a̱bunda̱i. 24 Obomburon ni njaki n na mi a kuya'an kunima i ta̱ a kutakuma ijanu i singai, i na a lapulai mayin. 25 A kanna ka nanlo, ka na a kiɗai irala i ɗa̱, ɗa kpamu nshilya n kindi n yikpa̱i. Nyeneke m mini mi ta̱ e kuyene a gaɗi va aginda nu nsasan dem. 26 Kutashi ku wotoi kpamu ki ta̱ a kakana tsu kanna, ka̱ta̱ wakani u kanna u la'a tsu na wi ishi ali kucindere, uteku tsu kutashi ku ayin e cindere derere, a ayin a na Vuzavaguɗu wu urasai ukpanwojuno u uma a̱ ni ɗa kpamu u ta̱na̱ta̱ngi untsu a na u ya'ankai le.
27 La̱na̱, kula ku Vuzavaguɗu a̱ kuta̱wa̱ na ɗe da'angi,
n ka̱ɗu ukuli koɓolo n ka̱nga̱ ka̱ lima̱ ka̱u,
kadanshi ka̱ ni tukpa n wupa,
kelentsu ka̱ ni kpamu m munuka tsa akina.
28 Ayinviki a̱ ni i ta̱ tsu kuyene ku na ku lya'i
ali ku yawai e kuɗeku.
A̱ kusa̱sa̱ aduniyan e meshere ma munuka,
ka̱ta̱ u uka mgbagulu n uma
iryangama i na i kuzuwa le a̱ puwa̱nka̱.
29 Yi ta̱ a kuya'an vishipa
tsu kayin ka na a ci ya'an ka̱ɗiva̱ ka kanna ka ciɗa,
ta a̱ɗu a̱ ɗa̱ a kuya'an ma̱zanga̱ nannai,
a ayin a na baci uma a̱ lika̱i igbala
a̱ ubuta̱ u kusan ku Vuzavaguɗu,
a kakpanlai ka aza a Isaraila.
30 Vuzavaguɗu wi ta̱ a kuzuwa uma a pana ka̱la̱ka̱tsu ka tsugbayin ka̱ ni,
ka̱ta̱ u ka̱sukpa̱ le e ene kukiye ku utsura ku ni a̱ kucipa̱, n wupa nu nlentsu ma akina,
n eleshu a̱ mini, n akpanga koɓolo m mini ma atali.
31 Ka̱la̱ka̱tsu ka Vuzavaguɗu ki ta̱ a kukiruma aza a Asiriya,
wi ta̱ a kulapa le n kalangu ka̱ ni.
32 Ulapi u na baci de Vuzavaguɗu u ya'ankai le dem
m mashawuri ma mafabuka ma̱ ni,
wi ta̱ o kokpo an tsuwa'i ci ndele n umolu,
n kukiye ku utsura ku ni ku ɗa u kushila̱ka̱ n ele a̱ ubuta̱ u kuvon.
33 M megeshe ma ɗe o foɓuso ta̱ ubuta̱,
wa akina a̱ a̱bunda̱i a na o kusongu mogono ma Asiriya.
Kpenle ka akina ku ni a ya'an ta̱ ku ɗa n uga̱vi koɓolo n wanshi,
n akina punu tukpa nu nɗanga,
Vuzavaguɗu wi ta̱
a̱ kuvula̱ akina a̱ ka̱nga̱ ko tsukono ku utsura,
adama a na u songu.