KATAGARDA KA JUWELU
Kuɓa̱yuwa̱
Ukuna u Katagarda ka nampa
A̱ ciya̱ ili yi a̱bunda̱i a ukuna u keneki Juwelu ba. kpamu a̱ ciya̱ e yeve a makyan ma na u yongoi n wuma ba. Ama i ta̱ o cico'o a ɗana ta̱ katagarda ka̱ ni ka a makyan ma̱ a̱ya̱ amangatawantawun (500) a kubana a̱ya̱ amangatawa̱na̱shi, (400) kafu a matsa Yesu (bc) a ayin a na iɗika i Fashiya yi o tsugono tsa aduniyan.
Juwelu u ya'an ta̱ kene ka ukuna u ma̱dukpa̱ m akyun n kanbulu a uɓon u Falisadinu. A̱ ka̱tsuma̱ ki ili nampa we ene ta̱ urotu u kanna ka̱ kuta̱wa̱ ka Vuzavaguɗu, ayin a na Vuzavaguɗu u kutakacika aza a na a iwain kusheshe ka aza a usuɓi. Keneki ka ka dana ta̱ kusheshe ku Ka̱shile n kudana uma a̱ shika̱ unushi u le, n uzuwakpani u kulapulu n una̱singai adama uma a̱ ni. Ili i kindana i ɗaɗa uzuwukpani u na Ka̱shile ka ya'in u danai, wi ta̱ a̱ ku suku n ayinviki a ciɗa a̱ ubuta̱ u uma a̱ ni dem, ali n a̱ma̱ci olobo nu nkoshi dem derere. Ukuna u na wi punu u keci Ma̱dukpa̱ m akyun 1:1; 2:17 Uzuwukpani u kulapulusuka 2:18-27 Kanna ka Vuzavaguɗu 2:28; 3:21.
1
1 Vuzavaguɗu u ya'in kadanshi n Juwelu kolobo ka Petuwelyu.
Ma̱dukpa̱ ma akyun a iɗika
2 Panai kakuna ka nampa, a̱ɗa̱ nkoshi m gba̱ra̱-gba̱ra̱,
zuwai atsuvu a̱ ɗa̱, a̱ɗa̱ na yi punu ida̱shi a iɗika ya.
a sa'wa ta̱ kuya'an ili i tsu nampa a ayin a̱ ɗa̱?
Ko a ayin a ikaya i ɗa̱?
3 Tonukoi muku n ɗa̱ ka'a,
ka̱ta̱ muku n ɗa̱ feu o tonuko muku n le,
ka̱ta̱ muku ntsukaya n ɗa̱ o tonuko ntsukaya n na n kuta̱wa̱.
4 Ili i na ka̱kuma̱ ka̱ nta̱ɗa̱ma̱ci ka takumai ɗa i buwai,
akyun a gba-gbayin o kotso a takumai,
Ili i na akyun a gba-gbayin a takumai ɗa i buwai,
ka̱kuma̱ ka̱ nta̱ɗa̱ma̱ci n kenke'en ko kotso ka takumai.
5 Jimgbai, a̱ɗa̱ na ma̱ra̱ ma makai, i shika̱,
lapai una̱, a̱ɗa̱ na yi oso'i a̱ ma̱ra̱,
lapai una̱ adama a unambi u ma̱kya̱n ma savu,
adama a na e pece ɗa̱ ta̱ n ma'an.
6 Adama a na uma a̱ kpa̱ta̱ra̱ ta̱ iɗika i va̱,
uma a utsura a ɗa,
ka̱bunda̱i ke le ki kukece ba,
anga e le i ta̱ n alyu tsu anga a kawu,
7 A̱ la̱nga̱sa̱ ta̱ ashina a itacishi a̱ va̱,
ɗa a takumai nɗanga mu mbiri.
E she'wei a̱vu e le ra̱ka̱,
a̱ ka̱sukpa̱i acaka e le wa̱ri.
8 Shika̱i tsu mekere,
ma na mi a̱ ma̱shi adama a ukpa̱ u kamana ka̱ ni.
9 Anan ganu a̱ na̱mgba̱i a̱tsuma̱,
adama a na babu kune'e ki ishina n ki ili i kuso'o,
a kpa'a ku Vuzavaguɗu.
10 Ashina ra̱ka̱ okpo ta̱ a̱pula̱ka̱,
iɗika feu i ɗekpe ɗe,
Ishina i na̱mgba̱ ɗe,
ma̱kya̱n feu me ɗekpe ɗe,
babu kpamu ma'in ma zaitu.
11 Na̱mgba̱i a̱tsuma̱ a̱ɗa̱ acimbi,
lapai una̱, a̱ɗa̱ acimbi ashina a itacishi,
na̱mgba̱i a̱tsuma̱ adama a itabi m bali,
adama a na a̱ la̱nga̱sa̱ ta̱ ili i kashina.
12 Ashina a itacishi a̱ ɗa̱ e ɗekpe ta̱ ra̱ka̱,
nɗanga mu mbiri n ɗa̱ n ɗekpe ta̱,
nɗanga n Ruman, nu nshuwa nu nɗanga n na m buwai
ra̱ka̱ n ɗekpe ta̱.
Mayun ma̱za̱nga̱ ma vuma vu lima̱ mo kotso ta̱.
Kushika̱ ku unushi n avasa
13 A̱ɗa̱ anan ganu a na yi a kuya'an alyuka,
a katalikalyuka ka Vuzavaguɗu, ukai akashi a kpalu, i shika̱,
i uwa A̱'isa̱ a gbayin yi asa n akashi a kpalu a̱ ɗa̱,
adama a na babu ishina ko ma̱kya̱n,
ma na a kuya'anka alyuka A̱'isa̱ a gbayin a̱ Ka̱shile ka̱ ɗa̱.
14 Salai kuya'an kakuli,
ya'in koɓolo ka gbangam.
ɓolongi nkoshi m gba̱ra̱-gba̱ra̱ n uma a iɗika ya ra̱ka̱,
A̱'isa̱ a gbayin a Vuzavaguɗu Ka̱shile ka̱ ɗa̱,
i banka n ma̱shi ma̱ ɗa̱ u Vuzavaguɗu.
15 Ili ya atakaci ɗa a kanna ka nanlo.
Adama a na kanna ka Vuzavaguɗu ka yawa ta̱ ɗevu,
atakaci a ɗa a Mala'imili a̱ kuta̱wa̱.
16 A̱ a̱shi a̱ tsu ɗa a̱ la̱nga̱sa̱i tsu ilikulya'a,
babu ma̱za̱nga̱ n kupana ku uyo'o,
a kpa'a ku Ka̱shile ka̱ tsu.
17 Icu'u i kuwa̱i adama a uɗekpu wi iɗika,
mpon n na̱mgba̱i, ɗa n fa̱da̱i.
adama a na babu ishina,
18 La̱na̱ tsu na anaka i a̱ yura̱.
Ushiga wa anaka u yangalai,
adama a na a̱ ciya̱ ijanu ba,
ushiga wu nlala feu atakaci.
19 Vuzavaguɗu, wa̱ a̱ nu u ɗa mi a̱ ma̱shi,
adama a na akina a lya'a ta̱ ubuta̱ u kalina.
melentsu ma akina mo songu ta̱ nɗanga n kakamba ra̱ka̱.
20 Nnama n kakamba feu mi ta̱ a̱ ma̱shi wa̱ a̱ nu,
adama a na nyeneke n ɗekpe ta̱ ra̱ka̱.