2
Ma̱dukpa̱ ma akyun tsu urotu u kanna ka Vuzavaguɗu
1 Lika̱i vugbala a Sihiyona,
i sala a kusan ku gbayin ku ciɗa ku va̱.
Ya'an aza a na i a̱ ida̱shi a iɗika ya ra̱ka̱ e je'eke ikyamba,
adama a na kanna ka Vuzavaguɗu ki ta̱ lo a̱ ku ta̱wa̱, ka yawa ta̱ ɗevu.
2 Kanna ka atakaci ka'a n ka̱yimbi,
kanna ke eleshu n ka̱yimbi ka kpaɓam.
tsu ka̱yimbi ke eleshu ka na ka palai nsansa,
ta ka̱bunda̱i ka akyun ka ki a̱ kuta̱wa̱ nannai,
ka na ka̱ta̱ a sawai ku ene ba,
kpamu o kudoku ku ene tsu nanlo ba,
ali ntsukaya n na n kuta̱wa̱.
3 A kutakuma vica̱'a̱ tsa akina,
E kelime ke le iɗika ya tsu kashina ka Adini,
a̱ ka̱ca̱pa̱ ke le iɗika ya tsu ka̱pula̱ka̱,
babu ili i na i kula'aka ekiye e le.
4 I ta̱ n iyoci yi odoku,
a ilaɗi tsu odoku o kuvon.
5 Ci izumgbi yi ekeke odoku,
a ci ɗikpangi a gaɗi va a nsansa,
ci izumgbi i kakamba ka na ki a̱ kukula̱,
a na osoji a utsura ugeri adama o kuvon.
6 Uma ene le baci, e ci je'eke ta̱ ikyamba,
a̱shi e le koli-koli.
7 A̱ tsu ta̱wa̱ ta̱ tsu ovonshi,
a kumba mashilya tsu osoji.
A tsu dasa ta̱ derere adaru-adaru,
a tsu kpatala ba.
8 Babu vuza na u tsu uwa uye u vutoku,
yaba dem o kutono kadaru ka̱ ni,
a tsu pasamgbanai ta̱ e mere ma irala,
kpamu i ku shamgbatangu ba.
9 A tsu bana ta̱ n o bonoi a̱ likuci,
a tsu suma ta̱ a gaɗi vu nshilya.
A tsu kumba ta̱ a uwa a i'uwa
a uwa atusu a i'uwa a na oboki.
10 E kelime ke le iɗika i tsu gba̱ɗa̱ ta̱,
ka̱ ta̱ gaɗi a̱da̱nga̱shile e jengeɗe,
kanna n wotoi okpoi ka̱yimbi,
azangata kpamu feu o doku e neke kutashi ba.
11 N ka̱la̱ka̱tsu ka utsura ɗa Vuzavaguɗu,
udanai osoji a̱ ni,
yiɗa̱i a ku gisangu n ka̱bunda̱i ko osoji a̱ ni,
osoji a na o tsu tono kadanshi ka̱ ni.
a la'a ta̱ kukece,
Kanna ka Vuzavaguɗu kagbayin ka'a,
kanna ko wovon ka̱u,
Yayi wa kufuɗa ku shamgba?
Uɗeki u kushika̱ unushi
12 Vuzavaguɗu u danai, <<Ko n nannai.>>
<<Bonoi wa̱ a̱ va̱ n a̱ɗu a̱ ɗa̱ ra̱ka̱,
n kakuli n ma̱shi n una̱mgbi u ka̱tsuma̱.
13 a̱ɗu a̱ ɗa̱ o yotsongu ushiki wu unushi u ɗa̱,
ba kukara ku ntogu n ɗa̱ koci ba.
I bono a̱ ubuta̱ u Vuzavaguɗu Ka̱shile ka̱ ɗa̱,
adama a na a̱yi vuza kasingai ɗa n asuvayali,
vuza na u ci ya'an wupa gogo ba,
kpamu vuza vu ucigi u na u tsu saba'a ba,
ama u tsu ronono ta̱ a̱ ubuta̱ u kutuka̱ n ma̱dukpa̱.
14 yayi u yevei ko Vuzavaguɗu Ka̱shile ka̱ tsu,
wi ta̱ a kusaba'a kusheshe ku ni,
u zuwaka tsu una̱singai,
ali ci ya'an kune'e ki ishina n ili i kuso'o?
15 Lika̱i vugbala a Sihiyona,
i sala kuya'an kakuli.
yi erengu ka̱ci ka̱ ɗa̱,
ka̱ta̱ i ya'an koɓolo ka ciɗa.
16 I ɓolongu uma,
ka̱ta̱ yi erengu koɓolo ka u Vuzavaguɗu,
i ɓolongu nkoshi,
n muku nu nreɓu,
ali vali vu savu n vuka vu savu feu uta̱ a̱ kunu ku le, a̱ ta̱wa̱.
17 Ya'an anan ganu a na i a kuya'anka, Vuzavaguɗu u linga e mere ma katalikalyuka n kafalaka ka̱ A̱'isa̱ a gbayin, a̱ shika̱.
A dana, <<Vuzavaguɗu pana asuvayali a uma nu.
Ka̱ta̱ vu ka̱sukpa̱ uma a uka̱ni a̱ nu a ya'an wono ba,
ka̱ta̱ vu ka̱sukpa̱ uduniyan u yoku u lya'aka le tsugono ba,
ali a dana,
<Teɗai Ka̱shile ka̱ ɗa̱ ki?> >>
Wushuki u Vuzavaguɗu
18 Ɗa Vuzavaguɗu u sa̱'a̱i iɗika i ni,
u panai asuvayali a uma ni.
19 Vuzavaguɗu wushuki uma a̱ ni, u danai.
<<La̱na̱i, mi ta̱ a̱ kusu'uku ɗa̱ ishina m ma̱kya̱n n mani'in,
ali i yawa ɗa̱, yi o kudoku ko okpo ili i ma̱ka̱n
a̱ ubuta̱ u uma ba.
20 <<Mi ta̱ o kuloko akyun da'angi n a̱ɗa̱,
a na uta̱i uɓon u gaɗi a na a̱ tuka̱i ɗa̱ n kuvon,
mi ta̱ o kuloko le a kubana a kakamba ka na ki n vuza ba,
aza e kelime le a̱ yikpa̱ a Mala,
aza a na i o kutono le tamkpamu a̱ yikpa̱ a Mala me Mere.
ushami we even a ikyamba e le wi ta̱ a̱ kuɗa̱nga̱,
ushami u gbani-gbani u le wi ta̱ a̱ kuka̱ra̱'a̱ a̱ ubuta̱ dem.
adama a na mpa Vuzavaguɗu n ya'an ta̱ ili i mereve.
21 Ka̱ta̱ vu pana wovon ba, avu iɗika,
ya'an ma̱za̱nga̱ vu pana uyo'o,
adama a na Vuzavaguɗu ɗa u ya'in ili i gbayin i nanlo.
22 A̱ɗa̱ nnama n kakamba, ka̱ta̱ i pana wovon ba,
adama a na ijanu i topo ta̱.
Nɗanga kpamu feu n matsa ta̱,
nɗanga ma̱ mbiri n mi itacishi a matsa ta̱ mayin.
23 Ya'in ma̱za̱nga̱, a̱ɗa̱ aza a Sihiyona,
i pana uyo'o nu mpa Vuzavaguɗu Ka̱shile ka̱ ɗa̱,
adama a na n yo'oko ɗa̱ ta̱ mini ma̱ ugiti,
ɗa kpamu n yo'oko yi ɗa̱ a makyan ma na ma untsai.
24 <<Ulanga u kulapu wi ta̱ a kushana tukpa n ishina,
Okotsu a gbagba'in i ta̱ a kushana ali a ɓarakpa.
i ta̱ a kushana n ma̱kya̱n m mani'in ma zaitu.
25 Mi ta̱ o kubonoko ɗa̱ n ili i na akyun a takumai a̱ ka̱tsuma̱ ka̱ a̱ya̱ a nanlo,
akyun a gbagba'in n e kenke'en,
nu nta̱ɗa̱ma̱ci, ko ka̱kuma̱ ka akyun a na i yevei,
ɗaɗa osoji a utsura a na n su'uki ɗa̱.
26 <<Gogo na yi ta̱ a kulya'a ilikulya'a ali i cuwa̱,
ali i cikpa kula ku Vuzavaguɗu Ka̱shile ka̱ ɗa̱,
a̱yi na u ya'ankai ɗa̱ ili i mereve,
kpamu i o kudoku kuneke uma a̱ va̱ wono ba.
27 A̱ɗa̱ uma a Isaraila talo ye kuyeve a na mpa mi ta̱ a̱ ka̱tsuma̱ ka̱ ɗa̱,
mpa ɗa Vuzavaguɗu Ka̱shile ka̱ ɗa̱,
babu vuza vu yoku, kpamu i o kudoku kuneke uma a̱ va̱ wono ba.
Kanna ka Vuzavaguɗu
28 <<Ayin a na baci ili nampa i kotsoi,
ka̱ta̱ n su'uku uma a̱ va̱ ra̱ka̱ n ayinviki a̱ va̱.
muku n ɗa̱ olobo nu nkere i ta̱ a kuya'an kene,
nkoshi mi ta̱ a kuya'an alatani,
muku mo olobo n ɗa̱ a ya'an kene tsa alatani.
29 Ali n agbashi a̱ ɗa̱ ali n a̱ma̱ci,
mi ta̱ a̱ kutsunku le ayinviki a̱ va̱ a kanna ka nanlo.
30 Ka̱ta̱ n yotsongu urotu wi ili i mereve, gaɗi n iɗika,
i ta̱ a̱ kutsuwa̱n mpasa n akina n ugbodoli u ka̱nga̱.
31 Kanna ki ta̱ o ko okpo ka̱yimbi,
wotoi tamkpamu wo okpo ushili tsu mpasa.
Kafu kanna ka Vuzavaguɗu ka nanlo ka̱ ta̱wa̱. 32 Wi ta̱ o ko okpo vuza na baci dem u ɗekei,
kula ku Vuzavaguɗu wi ta̱ a̱ kuciya̱ wishi,
adama a na a kusan ku Sihiyona n Urushelima,
i ta̱ a kuciya̱ aza a na a kula'aka,
tsu na mpa Vuzavaguɗu n danai,
a̱ ka̱tsuma̱ ka aza na a la'akai
i ta̱ a̱ kuciya̱ aza a na mpa Vuzavaguɗu n ɗekei.