1 <<A kanna ka iyain ko wotoi u cindere yi ta̱ a kuya'an koɓolo ka ciɗa. Yi ta na a kuya'an ulinga ba. Kanna ka̱ kulika̱ ishiyaun i ɗa. 2 Yi ta̱ a kuya'an kune'e ku kusongu, ku ma̱gula̱ni a kubana u Vuzavaguɗu, mobomburon me te, ka̱giri ke te, ni ngiri n cindere aza a̱ya̱ ke te ke te aza na kpamu i n u'iwin u Ka̱shile ba. 3 Koɓolo n ilikuzuwa ya, i neke agisamkpatsu a tatsu a ifa a̱ ka̱tsuma̱ ka kupa ku kiya ku singai usatari m mani'in ma zaitu, n adama o mobomburon, n agisamkpatsu e re a ifa a̱ ka̱tsuma̱ ka kupa adama a̱ ka̱giri, 4 a̱ ma̱giri dem i neke kagisamkpatsu ka ifa ke te. 5 Ka̱ta̱ kpamu i tuka̱ m ma̱ga̱ji adama e kune'e ku unushi ciya̱ a takpaka ɗa̱ u ɗa. 6 Kune'e ku nampa ku ɗa o doki ɗe e kune'e ku kusongu, n kune'e ki ishina ku wotoi u savu, n kune'e ku kusongu koɓolo n ki ishina ku na i ci ya'an makyan dem, n kune'e ki ili i kuso'o. Na ɗaɗa kune'e ku kusongu ku ma̱gula̱ni ma singai, kune'e ku na a ya'in n akina a kubana u Vuzavaguɗu.>>

7 <<A kanna ka kupa ko wotoi u cindere wa yi ta̱ a kuya'an koɓolo ka ciɗa, ka̱ta̱ i yongo n kakuli. Yi ta na a kuya'an ulinga ko kenu ba 8 Ama yi ta̱ a kuya'an kune'e ku kusongu a kubana u Vuzavaguɗu, ma̱gula̱ni ma singai, m mobomburon me te, n ka̱giri ke te, ni ngiri n cindere aza a̱ya̱ ke te ke te, aza a u'iwin u Ka̱shile ba. 9 Koɓolo n ilikuzuwa ya, i neke agisamkpatsu a tatsu a ifa a̱ ka̱tsuma̱ ka kupa ka kiya ku singai ku na a satarai m mani'in ma zaitu, adama o mobomburon, n agisamkpatsu e re a ifa a̱ ka̱tsuma̱ ka kupa adama a̱ ka̱giri, 10 a̱ ma̱giri dem i neke kagisamkpatsu ka ifa ke te. 11 Ka̱ta̱ kpamu i tuka̱ m ma̱ga̱ji adama e kune'e ku unushi ciya̱ a takpaka ɗa̱ u ɗa, n kune'e ku kusongu ku na i ci ya'an kanna dem, koɓolo n kune'e ki ishina, n kune'e ki ili i kuso'o.

12 <<A kanna ka kupa n ka tawun ko wotoi u cindere, yi ta̱ a kuya'an koɓolo ka ciɗa, yi ta na a kuya'an ulinga u na i kiwanai ba. Yi ta̱ a kuya'an ka̱ɗiva̱ u Vuzavaguɗu ali ayin e cindere. 13 Yi ta̱ a kuya'an kune'e ku na a ya'in n akina ci ili i ma̱gula̱ni ma singai u Vuzavaguɗu, kune'e ku kusongu ku mbomburon kupa n tatsu, a̱giri e re, ngiri kupa n na̱shi aza ka̱ya̱ ke te ke te, aza a na i n u'iwin u Ka̱shile ba. 14 Koɓolo n ilikuzuwa ya i ta̱ e kuneke kune'e ku kiya ku singai ku na a satarai m mani'in ma zaitu. I ta̱ e kuneke agisamkpatsu a tatsu a ifa a̱ ka̱tsuma̱ ka kupa adama o mobomburon dem, n agisamkpatsu e re a ifa a̱ ka̱tsuma̱ ka kupa adama a̱ ka̱giri dem, 15 n kagisamkpatsu ke te a̱ ka̱tsuma̱ ka kupa adama a̱ ma̱giri dem. 16 Ka̱ta̱ kpamu i tuka̱ m ma̱ga̱ji adama e kune'e ku unushi ciya̱ a takpaka ɗa̱ u ɗa, n kune'e ku kusongu ku na i ci ya'an kanna dem, koɓolo n kune'e ki ishina, n kune'e ki ili i kuso'o.

17 <<A kanna ke ire i neke obomburon kupa n e re, n a̱giri e re, koɓolo ni ngiri kupa n na̱shi, aza a̱ ka̱ya̱ ke te ke te aza na i n u'iwin u Ka̱shile ba, 18 i ta̱ e kuneke kune'e ki ishina n ili i kuso'o koɓolo nu mbomburon ma, n a̱giri a, ni ngiri ma, n tsu na a danai. 19 Ka̱ta̱ kpamu i tuka̱ m ma̱ga̱ji adama e kune'e ku unushi ciya̱ a takpaka ɗa̱ u ɗa, n kune'e ku kusongu ku na i ci ya'an kanna dem, koɓolo n kune'e ki ishina, n kune'e ki ili i kuso'o.

20 <<A kanna ka tatsu i neke mbomburon kupa m me te, a̱giri e re, ni ngiri kupa n na̱shi aza a̱ ka̱ya̱ ke te kete, aza na i n u'iwin u Ka̱shile ba. 21 Yi ta̱ e kuneke kune'e ki ishina, n ki ili i kuso'o koɓolo nu mbomburon, n a̱giri, ni ngiri, tsu ka̱bunda̱i ke le n tsu na a danai. 22 Ka̱ta̱ kpamu i tuka̱ m ma̱ga̱ji adama e kune'e ku unushi ciya̱ a takpaka ɗa̱ u ɗa, n kune'e ku kusongu ku na i ci ya'an kanna dem, koɓolo n kune'e ki ishina, n kune'e ki ili i kuso'o.

23 <<A kanna ka̱ na̱shi, i neke mbomburon kupa n a̱giri e re, koɓolo ni ngiri kupa n aza a̱ na̱shi, aza a̱ ka̱ya̱ ke te ke te aza na i n u'iwin u Ka̱shile ba. 24 Yi ta̱ a kuya'an kune'e ki ishina n kune'e ki ili i kuso'o koɓolo nu mbomburon, n a̱giri, ni ngiri tsu kabunda̱i ke le n tsu na a danai. 25 Yi ta̱ a kuya'an kune'e m ma̱ga̱ji adama a unushi, n kune'e ku kusongu, koɓolo n ki ishina n kune'e ki ili i kuso'o ku na i ci ya'an a makyan dem.

26 <<A kanna ka tawun i neke mbomburon kuci, n a̱giri e re, ni ngiri kupa n aza a̱ na̱shi aza a̱ ka̱ya̱ ke te ke te, aza na i n u'iwin u Ka̱shile ba. 27 Yi ta̱ a kuya'an kune'e ki ishina n kune'e ki ili i kuso'o koɓolo nu mbomburon, n a̱giri, ni ngiri tsu kabunda̱i ke le n tsu na a danai. 28 Ka̱ta̱ kpamu i tuka̱ m ma̱ga̱ji adama e kune'e ku unushi ciya̱ a takpaka ɗa̱ u ɗa, n kune'e ku kusongu ku na i ci ya'an kanna dem, koɓolo n kune'e ki ishina, n kune'e ki ili i kuso'o.

29 <<A kanna ka̱ ta̱li i neke mbomburon kula̱i, n a̱giri e re, ni ngiri kupa n aza a̱ na̱shi, aza a̱ ka̱ya̱ ke te ke te aza na i n u'iwin u Ka̱shile ba. 30 Yi ta̱ a kuya'an kune'e ki ishina n kune'e ki ili i kuso'o koɓolo nu mbomburon, n a̱giri, ni ngiri tsu kabunda̱i ke le n tsu na a danai. 31 Ka̱ta̱ kpamu i tuka̱ m ma̱ga̱ji adama e kune'e ku unushi ciya̱ a takpaka ɗa̱ u ɗa, n kune'e ku kusongu ku na i ci ya'an kanna dem, koɓolo n kune'e ki ishina, n kune'e ki ili i kuso'o.

32 <<A kanna ke cindere i neke mbomburon n cindere, n a̱giri e re, ni ngiri kupa n aza a̱ na̱shi, aza a̱ ka̱ya̱ ke te ke te, aza na i n u'iwin u Ka̱shile ba. 33 Yi ta̱ a kuya'an kune'e ki ishina n kune'e ki ili i kuso'o koɓolo nu mbomburon, n a̱giri, ni ngiri tsu kabunda̱i ke le n tsu na a danai. 34 Ka̱ta̱ kpamu i tuka̱ m ma̱ga̱ji adama e kune'e ku unushi ciya̱ a takpaka ɗa̱ u ɗa, n kune'e ku kusongu ku na i ci ya'an kanna dem, koɓolo n kune'e ki ishina, n kune'e ki ili i kuso'o.

35 <<A kanna ka̱ kunla̱i yi ta̱ a kuya'an koɓolo ka na i kucikpa mu, yi ta na a kuya'an ulinga u na i kiwanai kuya'an ayin tutu ba. 36 Yi ta̱ a kuya'an kune'e ku na a ya'in n akina ci ili i ma̱gula̱ni ma singai u Vuzavaguɗu, kune'e ku kusongu m mobomburon, n ka̱giri, ni ngiri n cindere aza ka̱ya̱ ke te ke te, aza a na i n u'iwin u Ka̱shile ba. 37 Yi ta̱ a kuya'an kune'e ki ishina n kune'e ki ili i kuso'o koɓolo m mobomburon, n ka̱giri, ni ngiri ma tsu kabunda̱i ke le n tsu na a danai. 38 Ka̱ta̱ kpamu i tuka̱ m ma̱ga̱ji adama e kune'e ku unushi ciya̱ a takpaka ɗa̱ u ɗa, n kune'e ku kusongu ku na i ci ya'an kanna dem, koɓolo n kune'e ki ishina, n kune'e ki ili i kuso'o.

39 <<Na ɗa kune'e ku na i kuneke Vuzavaguɗu a makyan ma na a zuwakai ɗa̱, koɓolo n kune'e ka akucina ku ɗa̱ n kune'e ku ucigi wa̱ a̱ɗu a̱ ɗa̱, kune'e ku kusongu ku ɗa̱ n kune'e ki ishina ku ɗa̱, n kune'e ki ili kuso'o, n kune'e ku ma̱ta̱na̱.>> 40 Musa u tonukoi aza a Isaraila ili ya ra̱ka̱, tsu na Vuzavaguɗu u danai.