1 Musa u ya'in kadanshi n aza e kelime a kumaci ki Isaraila, <<Ili i na Vuzavaguɗu u danai i ɗa na: 2 Vuma na baci u ya'in uzuwakpani n Vuzavaguɗu, ko u kucinai wi ta̱ a kuya'an ili i yoku, ka̱ta̱ ta na u kpa̱ɗa̱ kuya'an ba. Wo okpo yi ta̱ mayun u shatangu ili i na u dansai.

3 <<Ɗa baci kpamu mekere ma ya'in uzuwakpani ko akucina u Vuzavaguɗu ali a̱yi bi'i a kpa'a ke esheku a̱ ni, 4 ɗa baci esheku a a panai uzuwakpani ko akucina a na u ya'in ama ta na u dana yi kadanshi ba, uzuwakpani wa ko akucina a i ta̱ a kushamgba. 5 Ama ɗa baci esheku a panai ɗa u iwain kushuku n uzuwakpani ko akucina a na u ya'in va, uzuwakpani wa ko akucina a a̱ kuka̱na̱ yi ba, Vuzavaguɗu wi ta̱ a kucinukpa n unushi u ni, adama a na esheku a̱ ni a̱ ushuku yi ba.

6 <<Ɗa baci wo oloi vali, a̱yi a̱ ka̱tsuma̱ ka akucina ko uzuwakpani u na u ya'in babu na u sheshei, 7 ɗa vali va vu panai akucina a ko uzuwakpani wa, ta na u keɓece yi kakuna a kanna ka na u panai a ɗa ba, akucina a ko uzuwakpani wa i ta̱ a kushamgba. 8 Ama ɗa baci vali va vu panai kakuna ka ɗa u sa̱nka̱i ni kuya'an ka'a, wa kuya'an i na wi ishi u sheshei kuya'an va ba, Vuzavaguɗu kpamu wi ta̱ e kuneke yi uba̱ruwi. 9 Ama akucina a kagapa ko akucina a vuza na wu uta̱i yolo, ili i na baci dem u kucinakai n ka̱ci ka̱ ni yi ta̱ e kureme yi. 10 Ama ɗa baci vuka vu kucinai ko u ya'in uzuwakpani a kpa'a ku vali vu ni, u ɗa wi ta̱ a kushamgba, 11 kpamu vali va vu pana baci akucina a, ta na u keɓece yi kakuna ba, akucina a n uzuwakpani wa i ta̱ a kushamgba. 12 Ama ɗa baci vali va vu panai kakuna ka ɗa u sa̱nka̱i ni kuya'an ka'a, wa kushatangu akucina a ko uzuwakpani wa ba. Vuzavaguɗu kpamu wi ta̱ e kuneke yi uba̱ruwi. 13 Akucina ko uzuwakpani u na vuka vi ya'in n ka̱ci ka̱ ni, vali vi ta̱ n utsura u na u iwan ko wu ushuku. 14 Ama ɗa baci vali va vu kpa̱ɗa̱i kukeɓece yi kakuna a na u panai akucina a ko uzuwakpani wa, mayun ɗa u shatangu akucina a n uzuwakpani wa u na u ya'in, adama na u keɓece kakuna ba, a na u panai ka'a. 15 Ama ɗa baci u panai, u keɓece kakuna ba ɗa u iwain a ɗa n ka̱ca̱pa̱, wi ta̱ a kutakacika adama a nanlo.>>

16 Na ɗa wila̱ u na Vuzavaguɗu u nekei Musa adama a ukuna wa akucina a vali n vuka vi ni, esheku m mekere ma̱ ni ma na ma buwai a kpa'a ku ni.