5
Udansuki adama tsugbani
1 Maku ma̱ku ma̱va̱, zuwa atsuvu vu pana ugboji u va̱,
ɓa̱yuwa̱ atsuvu vu pana kuyeve ku va̱,
2 adama ana vu yaꞋan ili dem n ka̱ɗu ida̱shi,
ka̱ta̱ una̱ u nu kpamu u yotsongu ana vi ta̱ n uyevi.
3 Adama ana nlebu mu una̱ n kashakanlai ugan ba n yaꞋan uyoꞋo ci ishigi,
kpamu kadanshi ka̱ni ka laꞋa ta̱ mani n leku,
4 ama a ukocishi kuyongo ni i ɗa, okono aɗa,
wi ta̱ a kusapa wu tsu kotokobi ku una̱ ure ka alyu.
5 Ene a̱ ni a ukpisa̱ u ɗa i a kubana,
uye uni wita̱ a kubanka wu ubuta̱ wi ida̱shi wa̱ a̱kpisa̱.
6 Ili i bura yi n uye u wuma ba,
uye u ni magaba ma wi ba,
a̱yi tana u yeve ana ta uɗa wi nannai ba.
7 Gogo na maku ma̱va̱, pana ka mu,
ka̱ta̱ vu ka̱sukpa̱ kadanshi ka una̱ u va̱ ba.
8 YaꞋan daꞋin n uye u ni,
ka̱ta̱ vu bana ɗevu n utsutsu u kpaꞋa ku ni ba,
9 ka̱ta̱ utsura u nu u kotso wa aza yoku ba,
vu kuwa̱ a̱ ka̱ɗa̱nga̱ni ekiye aza babu asuvayali.
10 Omoci tana a̱ kupura̱ utsura wi ikyamba i nu,
mele ma̱ nu ma bana ta̱ a kpaꞋa ku vuza yoku gbani.
11 Ka̱ta̱ a ukoci u wuma u nu vu ka̱na̱ ci inka a̱ ka̱tsuma̱ ku usuɗukpi,
a makyan mana mɓa̱la̱ n takumai i kyamba i nu,
12 Vi ta̱ a kudana, <<Yiɗa̱i i zuwai ɗa n kpa̱ɗa̱i ku ɗika udansuki?
Yiɗa̱i i zuwai ɗa ka̱ɗu ka̱va̱ ko goyoi uɓarangi?
13 N zuwa atsuvu u malum ma̱va̱ ba.
m bonoko ka̱ɗu ka̱va̱ kpamu we ele ba.
14 Ɗanna n yawa ta̱ ɗevu n ku kuwa̱,
gogo na mi ta̱ ɗevu n kuyaꞋan wono a̱ ka̱tsa̱ma̱ ka uma.>>
15 YaꞋan kamayun u vuka vunu,
vu cigai a̱yi koci.
16 Derere ɗa a̱shi mini mi ikyamba ma̱ nu, ma̱ ka̱na̱ ku uwa̱ mini ubuta̱ dem?
Ko kpamu wo okpo ma yaba dem?
17 Ka̱sukpa̱ okpo ma̱ nu koci,
vi e kupece n komoci ba.
18 Ka̱sukpa̱ mini ma̱ nu mo okpo n una̱singai,
yaꞋan ma̱za̱nga̱ n vuka vu nu ka̱ɗa̱nga̱ni.
19 UgaꞋin u ku ene an mereꞋe,
ka̱sukpa̱ mani ma ni ma yawai makyan dem,
ka̱sukpa̱ ucigi u ni kpamu u reme wu.
20 Maku ma̱va̱ yiɗa̱i i kuzuwa vuka vuza cishakanlai ulya kaci ka̱ nu?
Yiɗa̱i i kuzuwa vu oɓongu vuka vuza yoku?
21 Adama ana uye u wuma u vuma, e keteshe ka i a̱ a̱shi a Vuzavaguɗu,
Vuzavaguɗu tana u tsu kondo ta̱ uye u ni dem.
22 Unushi u vuza gbani-gbani maza maꞋa wa̱ ni,
awin a unushi u ni a tsu remei ta̱ mayin.
23 Utsu kuwa̱ ta̱ adama ukpa̱ɗi u ku reme ka̱cika̱ni
tsulau tsa a̱bunda̱i tsu ni tsu ɗa tsa a ku unai.