6
Udansuki adama a tsulau
1 Maku ma̱va̱ vu saꞋawa ta̱ ku okpo magan adama a ka̱ja̱ ka̱ nu ubuta̱ u ku isa kutan?
Vu saꞋawa ta̱ ku shuku vu tsupaka komoci kutan kuna u lyaꞋi?
2 Ɗa baci kadanshi ka̱nu ka saꞋwai ku ka̱na̱ wu,
ko kadanshi ku una̱ u nu ko okpoi nu maza,
3 Gogo na maku ma̱va̱, ili i na va kuyaꞋan i ɗana,
adama ana vu isa ka̱cika̱nu.
vu uwa ta̱ tana ɗe ekiye a vuza yoku,
bana vu goyo ka̱cika̱nu a kelime ka̱ni.
vu oꞋusoi n ufolu ka̱u.
4 vu sa̱nka̱ ka̱ci ka̱ nu alavu,
ko agbaɗiki a̱ a̱shi a̱ nu.
5 Utuka̱ ka̱cika̱nu uteku tsuna manunu ma̱ tsu fa̱ta̱tsa̱ a ubuta̱ u maza,
uteku tsuna mesheun ma tsu fa̱ta̱tsa̱ ekiye a vuza vu kutambu.
6 Ka̱sukpa̱ vuza vu ukpa̱ɗi u piꞋisa
ubuta̱ wa̱ a̱riga̱nla̱.
7 I m mogono ba,
ko vuzagbayin,
ko vuza tsugono.
8 N nanai dem a tsu ɓolongu ta̱ ili i kulyaꞋa adama a̱ ka̱cika̱le,
a tsu foɓuso ta̱ a ayin vikyaꞋa adama a̱ lyushi.
9 Ali wana ɗai vi a kulyaꞋa kelime n ivaꞋin, avu vuza wonvoli?
Wanai ɗa vi a̱ kuɗa̱nga̱ alavu?
10 Megeshe kenu alavu, megeshe kenu agbaɗiki,
megeshe kenu mo oɓongu me ekiye adama ana vu uvuka.
11 Nanai ɗa unambi u kufa̱ba̱na̱ wu an vuza ma̱ga̱la̱ka̱,
ka̱ta̱ unambi kpamu u ta̱wa̱ wu tsu koboki.
12 Ka̱ka̱ra̱shi ko vuma gbani-gbani,
u tsu ka̱ra̱sa̱ ta̱ n kadanshi ka kavama a una̱ u ni,
13 Utsu yaꞋan ta̱ iyoci n a̱shi a̱ ni,
u ka̱na̱ kadanshi n izumgbi i ene a̱ni
a kuyaꞋan ulinga n ka̱jivu ka̱ ni u sokongi.
14 A̱ ka̱ɗu ka̱ni tana we a kusheshe ka gbani-gbani,
a ayin dem u ka̱na̱ ku kuɗa̱ngusa̱ vishili.
15 Adama a nannai atakaci i ta̱ a ku ka̱na̱ yi gogo lo.
m megeshe kenu ɗa i a ku una yi.
16 Ili i ta̱li yi ta̱ lo ali i cindere, i na Vuzavaguɗu u iwain,
i na wi a ku kyala ba
kindi ku kugoyi na yo okpoi ili yi unata wa̱ ni.
17 Ele ɗa, kindi ku kugoyi,
n Kelentsu ka a uwa,
N ekiye aza munuka ma aza babu unushi.
18 N ka̱ɗu kana ka tsu sheshe ka gbani-gbani,
N kune ku kuyaꞋan kagbanigbani gogoꞋo,
19 M magan ma a uwa vuzana utsu dansa u kuna wa uwa,
N vuza na u tsu ɗa̱ngusa̱ vishili wi itoku i ni.
Udansuki adama tsugbani
20 Maku ma̱va̱, ɓa̱na̱ odoki a Dada nu
ka̱ta̱ kpamu vu ka̱sukpa̱ ku yotsongusu ka̱ a̱na̱vu ba.
21 Shiya le a̱ ka̱ɗu ka̱nu ayin dem,
shiya le e kuɗeku kunu.
22 Ayin ana baci vu walai, i ta̱ a kutono n avu,
ayin ana baci vu vaki, i ta̱ a ku inda wu,
ayin ana baci vu ɗa̱nga̱i, i ta̱ a kuyaꞋan kadanshi n avu.
23 Adama ana odoki a nampa ma̱kuni maꞋa,
kuyotsongusu ku nampa kpamu kutashi ku ɗa,
udansuki n ugbari kpamu
uye u wuma u ɗa,
24 wita̱ a ku kanza wu ubuta̱ u vuka vu gbani-gbani,
n ubuta̱ wu una̱ wu uyoꞋo u vuka vu vuza.
25 Ka̱ta̱ vu cikala ugaꞋin u vuka vu vuza yoku a̱ ka̱ɗu ka̱ nu ba,
ko kpamu vu ka̱sukpa̱ a̱shi a̱ ni a ɗika asuvu a̱ nu ba,
26 A tsu ciya̱ ta̱ kashakanlai n ikebe yi ilikulyaꞋa koci,
ama vuka vu vuza yoku tsu la̱nsa̱ ta̱ wuma u vuma.
27 Vuma wita̱ a kufuɗa ku kimba̱ a kina a̱ ma̱ka̱nga̱ ma̱ ni,
babu na motogu ma̱ni ma̱ kula̱?
28 Vuma wita̱ a kufuɗa ku wala a gaɗi va̱ a̱ga̱ruwa̱shi akina
ka̱ta̱ u kpa̱ɗa̱ ku kula̱ adasukpatsu a ene a̱ni?
29 Ta wi nanai u vuza na u vaki n vuka vu vutoku ni,
vuza na u yaꞋin nanai dem, wi a kulaka ba.
30 Uma a tsu neke koboki wono ba,
ɗa baci a cinai ni u yaꞋin uboki adama kambulu.
31 N nanai dem ɗa baci e reme ni, mayun ɗa u tsupa kucindere,
ko ɗa baci, u ku zuwa u namba uciyi u kpaꞋa uni ra̱ka̱.
32 Ama vuma na u vaki n vuka vu vuza yoku wi mayin ba,
a̱yi na baci de dem u yaꞋin nanai wu una ta̱ ka̱cika̱ni.
33 I ta̱ a ku lapai, ka̱ta̱ e nekei wono,
wono u na wa kukotso ba.
34 Adama ana cisheꞋe tsu tsu ɗengusa̱ ta̱ wupa u vali,
u tsu ka̱sukpa̱ ba makyan ma na wi a kutsupa.
35 Wi a ku isa katsupu ba,
babu ka̱bunda̱i ka kuneꞋe kana ka ku vaꞋanku wupa u ni ba.