16
1 Kusheshe ku ka̱ɗu ku vuma ku ɗa,
ama ku ushuku,
ku Vuzavaguɗu ku ɗa.
2 E kene ku vuma, ili i na u yaꞋin dem derere ɗa,
ama Vuzavaguɗu ɗa kashatangi.
3 Zuwa ka Vuzavaguɗu ulinga u nu,
ofoɓuso a̱ nu tana i ta̱ a̱ kuciya̱ ulyaꞋi.
4 Ili i na Vuzavaguɗu u yaꞋin dem derere ɗa,
ko vuza gbani-gbani adama a kanna ka atakaci.
5 Vuzavaguɗu u tsu iwan ta̱ vuza na de dem wi n ugbamukaci
we a̱ ku ka̱sukpa̱ le a laꞋaka ubuta̱ wa atakaci ba.
6 A ubuta̱ wu ucigi n kuyaꞋan kasingai, a tsu cinukpaka ta̱ vuma u nushi,
kpamu ubuta̱ wovon u Vuzavaguɗu,
vuma u tsu katsukpa ta̱ ka gbani-gbani.
7 Makyan ma na vu yaꞋin ili i na Vuzavaguɗu wi a kuciga,
vi ta̱ a kufuɗa kubonoko irala i nu yo okpo a̱ja̱Ꞌa̱.
8 U laꞋa ta̱ n kugan vu ciya̱ kenu a uye u singai,
ana va ku ɓolongu n a̱bunda̱i n uye u kalyaꞋa.
9 Vuma u tsu sheshe ta̱ a̱ ka̱ɗu ka̱ ni,
ama Ka̱shile ka ka tsu shatangu.
10 Kadanshi a una̱ u mogono ki ta̱ tsu a kaka a̱ Ka̱shile,
ayin dem u tsu kiɗa ta̱ a fada derere.
11 Vuzavaguɗu u ciga ta̱ kagisamkpatsu ka singai,
ka̱ta̱ kpamu ka wina dem ko okpo derere.
12 Ngono n tsu iwan ta̱ ka gbani-gbani,
adama ana ka singai kaɗa ka tsu zuwa tsugono tsu tsurukpa.
13 Mogono ma tsu pana ta̱ uyoꞋo u kadanshi ka singai,
u tsu ciga ta̱ aza kudansa kamayun ka̱u.
14 Wupa u mogono u kutuka̱ n ukpa̱ u ɗa,
ama vuza na wi n ugboji u tsu yaꞋan ta̱ moloko mana u ta̱na̱ta̱ngu mogono ka̱ɗu.
15 Kasingai ka mogono tsu keleshu kaꞋa kana ka tsu tuka̱ m mini ma gaɗi n lyushi,
wuma wi ta̱ punu.
16 U laꞋa ta̱ kugaꞋan vu ciya̱ ugboji, ana va kuciya̱ kazanariya,
u laꞋa ta̱ n kugaꞋan vu zagba kuyeve ana vaku zagba azurufa.
17 Uye u vuza vu usuɓi u tsu katsukpa ta̱ ka gbani-gbani,
vuzana u lapulai uye u ni, wuma u ni uɗa wi e ku ere.
18 Ugbamukaci u tsu tuka̱ ta̱ n ukpa̱,
kugoyi kpamu ku tsu vakangu ta̱ vuza.
19 U laꞋa ta̱ vo okpo vuza vu unambi vuza vu usuɓi,
ana va ku okpo a̱ ka̱tsuma̱ ka aza ugbamukaci, ali na vu ciya̱ ili a̱ ka̱tsuma̱ ke le.
20 A̱yi na dem wu ushuki n odoki, wi ta̱ a ku laꞋa ka,
vuza vu una̱singai u ɗa a̱ yi na wu ushuki n Vuzavaguɗu.
21 Vuza vu ugboji a tsu ɗekei ta̱ vuza kuyeve,
adama ana kadanshi ku uyoꞋo ka ɗaɗa uma a tsu laꞋa n ku ciga.
22 Ugboji ka̱shi ka vuma ka a ubuta̱ wa aza ana i nu ɗa,
ama tsulau tsu tsu tuka̱ ta̱ alau n atakaci.
23 Vuma vu ugboji u tsu sheshe ta̱ kafu u dansa,
ka̱ta̱ tana ka danshi ka̱ ni ka̱ ciya̱ wu ushuki.
24 Kadanshi ku uyoꞋo ka tsu yaꞋan ta̱ an kabashi ki ishigi,
n uyoꞋo a̱ ka̱ɗu, a̱ ku tuka̱ n ma̱ta̱na̱ i kyamba.
25 A kene ku vuma, wi ta̱ n uye u na u laꞋi n mayin,
ama a ukocishi, ukpa̱ u ɗa.
26 Kambulu ka tsu zuwa ta̱ vuza zamalinga u dakaka u linga,
adama ana u ciga ta̱ u cuwa̱ta̱ngu ka̱cika̱ni.
27 Vuma gbani-gbani u tsu sheshe ta̱ kuyaꞋan kagbani-gbani,
kadanshi ka̱ ni kpamu ka tsu ka̱na̱ ta̱ ku tasa a na akina.
28 Vuza vu babu kamayun u tsu ɗa̱ngusa̱ ta̱ vishili,
vuza kuyun u tsu pece ta̱ a̱ja̱Ꞌa̱ ni ana i ɗeɗevu.
29 Aza kavama, a tsu doro ta̱ a̱ za̱ ni,
a li u vakangi ubuta̱ u wa atakaci.
30 A̱ yi na u tsu yaꞋan iyoci n a̱shi, modoruko maꞋa wi a kuciga kuyaꞋan,
vuza na u tsu yaꞋan iyoci n una̱ uni, ka gbani-gbani kaꞋa wi a kuciga ku yaꞋan.
31 Ka̱nji ka̱ri, okokolo a tsugbayin a ɗa,
katsupu kaꞋa a wuma u vuza vu usuɓi.
32 U lata̱ n kugaꞋan vu okpo vuza vu u ka̱ni u ka̱ɗu, ana va ku okpo vuza vu utsura,
u laꞋa ta̱ kpamu n kugaꞋan vu fuɗa ka̱cika̱ni, u laꞋa u likuci.
33 Uma a tsuyaꞋan ta̱ kazagba adama ana e yeve i na i gaꞋin,
ama Vuzavaguɗu a̱ yi ɗa ka zagbi.