17
1 U laꞋa ta̱ n kugaꞋan vu lyaꞋa tsuwa babu kusan n ka̱ɗu ida̱shi
an va kulyaꞋa tsuwa tsu ka̱ɗiva̱ a kpaꞋa ku vishili.
2 Kagbashi ku ugboji, ki ta̱ a kulyaꞋa tsugono
a kpaꞋa ku maku ma na ma tsu tuka̱ n wono,
ali u ciya̱ upecu wi ili yi uka̱ni derere tsu vuza te punu a kpaꞋa ka.
3 Azanariya n azurufa n akina a tsu kondo le,
ta Vuzavaguɗu u tsu kondo ka̱ɗu nannai.
4 Vuza gbani-gbani, u tsu zuwaka ta̱ atsuvu wi ili i gbani-gbani,
kayaꞋin ka uwa ka tsu bonoko ta̱ n asuvu a̱ ni u vuza na u tsu dansa u kuna u kavama.
5 Vuza na baci de dem ugoyi vuza vu unambi, u shika ta̱ Ka̱shile ka na ka yaꞋin ni,
vuza na u yaꞋin ma̱za̱nga̱ adama una̱mgbi u vutoku wi a kulaka ubuta̱ wa atakaci ba.
6 U gaꞋin wu nkoshi ntsukaya n ɗa,
ugaꞋin u muku kpamu i sheku i le i ɗa.
7 Kadanshi kasingai ka tsu untsa n kalau ba,
ko tana a uwa untsa n vuza kelime.
8 KalyaꞋa ki ta̱ an katali ki ili mereve a a̱shi a vuza na u nekei a ɗa,
ubuta̱ u na u kpatalai dem derere ɗa.
9 Vuza na u cinukpai u nushi, ucigi u ɗa wi a kula̱nsa̱,
ama vuza na u tsu reme u nushi a̱ ka̱ɗu, u tsu pece ta̱ a̱ja̱Ꞌa̱ e ɗeɗevu.
10 Uɓarangi u kute u yawa ta̱ vuza na wi n kuyeve u yeve
n ulapi u kalau amangatawun.
11 Vuma gbani-gbani u tsu zuwa ta̱ kaci o kugoyi koci,
i ta̱ a ku suꞋuku yi n vuza unambi wa asuvu a yali ka̱ta̱ a lapai.
12 U kulaꞋa ta̱ n ugaꞋin vuza u gasa m ma̱kunzukunzu vuza wupa,
vuza na e pecei ni n muku n ni,
an vuza wa ku gasa n kalau a̱ ka̱tsuma̱ ka tsulau tsu ni.
13 Vuza na u tsupai kasingai n ka gbani-gbani,
ka gbanigbani ki a̱ ku ka̱sukpa̱ kpaꞋa ku ni ba.
14 Ugiti u vishili, wi ta̱ an kuyene ku mini ku na ku peciki,
sai a shamkpa maꞋan ali babu ma lyaꞋa kelime.
15 Vuza na wu utukai vuza vu unushi,
n vuza na u takacikai vuza vu usuɓi
dem vu le ili yu unata i ɗa u Vuzavaguɗu.
16 Gbani ɗa a una ikebe adama ana a̱ la̱nsa̱ka̱ kalau kuyeve,
adama a na wo okpoi a̱ yi vuza vu usuɓi ɗa ba.
17 Ka̱ja̱Ꞌa̱ ka tsu yaꞋan ta̱ ucigi ayin tutu,
vutoku kpamu adama a̱ ma̱ ɓa̱nka̱na̱i maꞋa a matsai ni.
18 Vuza vu babu kusheshe ɗa koci,
u kuɗika a̱miki a kutan ku vutoku vu ni.
19 A̱ yi na wi a kuciga unushi, vishili vu ɗa wi a kuciga,
A̱ yi na kpamu u maꞋin mashilya mu ugaɗi u ka̱ra̱i n a̱yi wi ta̱ a̱ kula̱nsa̱ ka̱ ka̱cika̱ni munuka.
20 Vuma vu ka̱ɗu ka gbani-gbani u ci ciya̱ kulya ku kelime ba,
vuza na de dem u tsu dansa a uwa u tsu uwa ta̱ atakaci.
21 Ili ya atakaci ɗa vuma u matsa maku kalau,
dada vu kalau u tsu yongo n ma̱za̱nga̱ ba.
22 Ka̱ɗu ka ma̱za̱nga̱, a̱guma̱ asingai ɗa,
ama ka̱ɗu ku una̱mgbuka̱tsuma̱ u tsu ɗekpetengu ta̱ vuma.
23 Vuma gbani-gbani u ciꞋisa ta̱ kalya u sokongi
adama ana u sabasa afada a mayun.
24 Vuza vu kuyeve, u tsu sheshe ta̱ ka kuna ku ugboji,
ama kalau ki ta̱ a kindi ku kavama.
25 Kalau ka maku ili ya atakaci ɗa u dada ni,
ili yu una̱mgbuka̱tsuma̱ i ɗa kpamu u vuza na u matsai ni.
26 Wi n ugaꞋin a yaꞋanka vuza vu babu unushi afada ba,
ko a faba vuzagbayin adama a kamayun ka̱ ni.
27 Vuza na u tsu dansa ke nu, keyevi kaꞋa,
kpamu a̱yi na wi n ka̱ɗu ka̱ yuwu keyevi kaꞋa.
28 Ko kalau feu u paɗa baci bini, a tsu ɗikai ta̱ vuza vu ugboji ɗa,
ɗa baci u paɗai bini udansai ka kuna ba,
uma i ta̱ a kuɗika yi keyevi.