27
1 Ka̱ta̱ vu keɗe a̱pa̱m n makpaꞋa ba,
adama ana vu yeve u teku tsu na makpaꞋa va uku uta̱ ba.
2 Ka̱ta̱ vu cikpa ka̱cika̱nu ba,
ka̱sukpa̱ uma a cikpa wu, ama ba avu nu una̱ u nu ba.
3 Katali ki ta̱ n a̱miki, kayala feu ta nanai,
ama atakaci a na kalau ka tsu rono a laꞋa le ta̱ a̱miki dem.
4 Wupa ili gbanigbani i ɗa, u tsuna ta̱,
ama dem n nanai u yawa tsurala ba.
5 U laꞋa ta̱ vu dansuka vuza e keteshe,
an va ku yotsongi cigai u sokongi.
6 Ka̱ja̱Ꞌa̱ ko ana u la̱nga̱shi nu ka̱ɗu,
vurala vu ɗa ko ana wo oɓongi nu n a̱bunda̱i.
7 Vuza vu ucuwi u tsu cikala n ku soꞋo ishigi ba,
ama u vuza kambulu ko ili yo okono i ɗa, uyoꞋo u ɗa wi a kupana.
8 Tsuna manunu ma tsu ka̱sukpa̱ cikinda ci ni,
ta feu vuza na u ka̱sukpa̱i kpaꞋa ku ni feu wi nanai.
9 Ili ma̱gula̱ni n mani ma ma̱gula̱ni ma tsu neke ta̱ ma̱za̱nga̱ a̱ ka̱ɗu,
ama ma̱za̱nga̱ ma cija̱Ꞌa̱ mi ta̱ ubuta̱ wa odoki a singai.
10 Ka̱ta̱ vu iwan ka̱ja̱Ꞌa̱ ka̱ nu ba, ko ka̱ja̱Ꞌa̱ ka Dada vu nu ba,
kpamu ka̱ta̱ vu bana a kpaꞋa ku tovu, a kanna kana vi nu una̱mgbi u ka̱tsuma̱ ba.
u laꞋa ta̱ n kugaꞋan n vuza na yi ida̱shi ɗeɗevu
n toku nu vu na wi daꞋangi.
11 Gbojo, maku ma̱va̱ adama ana ka̱ɗu ka̱va̱ ka yaꞋan ma̱za̱nga̱,
adama ana n neke wu ushuki u vuza na u goyoi mu.
12 Vuza vu ugboji u tsu ene ta̱ ka gbani-gbani ka̱ ta̱ u suma,
ama vuza vu unambi wu ugboji u tsu bana ta̱ ka̱ta̱ tana u takacika.
13 Isa motogu ma vuza na wu ushuki ku okpo magan mo komoci,
n ma vuza na wu ushuki ku okpo magan ma kashakanlai.
14 Vuza na baci de dem u jimgbasai vutoku n kacaꞋa n usana,
derere ɗa n ishikushi i ni.
15 Vuka vu vishili,
vita̱ an kacaꞋa ki ijaꞋashi i mini,
16 ɗa baci vu danai vi ta̱ a ku sa̱nka̱i, ka̱ta̱ wo okpo an usa̱nki u wunla̱
ko tsu ku reme ku mani ma agujiyan n kataka ka kukiye.
17 Tsu na vuyum vu tsu gboro vuyum
ta feu vuma n vuma o tsu ɓa̱nka̱na̱i nanai.
18 Vuza na u tsu la̱na̱ maɗanga ma ma̱biri u tsu lyaꞋa ta̱ umaci u ni,
ama vuza na u tsu la̱na̱ vuzagbayin vu ni, wi ta̱ a̱ kuciya̱ tsugbayin.
19 Tsu na vuma u tsu inda ka̱cika̱ni a mini,
ta feu ka̱ɗu ka vuma ka tsu yotso vuma nanai.
20 Asaun n ukpisa̱ a tsu cuwa̱ ba
ta feu a̱shi a uma a̱ tsu kpa̱ɗa̱ kucuwa̱ nanai.
21 Azanariya n azurufa n akina aɗa a tsu kondo a ɗa,
ta feu vuma nanai a tsu kondoi ta̱ ubuta̱ u kucikpa u ni.
22 Jara kalau n mashin a̱ ma̱suku
tsu kiya ku ilya,
dem n nanai tsulau tsu ni ci a ku kotso ba.
23 La̱na̱ ushiga wi ili kuzuwa i nu,
ka̱ta̱ kpamu vu yeve ma̱ta̱na̱ ma anaka a̱ nu,
24 adama ana uciyi u tsu geshe ali a kubana u teku ba,
ta feu tsugono ci nanai, tsu ci geshe ali n tsukaya ba.
25 A tsu kana ta̱ mita̱ ka̱ta̱ masavu mo topo
a tsu ɓolongu ta̱ kpamu a̱vuku adama anaka,
26 a tsu tsuyaꞋan ta̱ aminya n cileme tsa nlala,
a tsu cimba ta̱ kpamu kashina n ikebe ya nraɗika.
27 I ta̱ a kuciya̱ mani ma nraɗika ma kulyaꞋa ba̱ri,
mana ma ku lyaꞋatangu kpaꞋa ku nu
koɓolo n a kabashi n nkere n nu.