28
1 Vuma gbanigbani u tsu ka̱na̱ ta̱ ilaɗi gbani, babu vuza na wi a kusaɓa yi,
ama aza usuɓi a tsu shamgba ta̱ ba̱ri an kawu.
2 Iɗika yi baci a kuyaꞋan kagbanigbani, ɗa i tsu ka̱na̱ kusabaꞋa ngono,
ama ubuta̱ u na baci mogono mi n ugboji n kuyeve,
iɗika i tsu shamgba ta̱ ka̱ta̱ i geshe.
3 Vuza tsugono na utsu doro uma a̱ ni,
wita̱ an mini ma atali ma na ma tsu la̱nga̱sa̱ ili kashina.
4 A̱yi na u tsu iwan kutono wila̱, wita̱ koɓolo n aza a gbanigbani,
ama ɗa baci vi a kutono wila̱ a vu vurala va aza gbanigbani ɗa.
5 Uma gbanigbani e yeve kasingai ba,
ama aza kutoni ku Yesu e yeve ta̱ ka mayin.
6 Ulata̱ vokpo vuza vu unambi vu kasingai,
an va kokpo vuza vu uciyi vu gbanigbani.
7 A̱yi na u tsu tono wila̱, maku mu ugboji maꞋa,
ama ka̱je ka ka̱ka̱ra̱shi u tsu ronoko ta̱ dada ni wono.
8 Ɗa baci vu ciya̱i udukuyan ubuta̱ u gbanigbani,
udukuyan wa wita̱ a ku bono ubuta̱ wa aza na i a kuyaꞋan ka a za unambi kasingai.
9 Ɗa baci vuma u iwain kutono wila̱ u Ka̱shile,
ko kavasa ka̱ ni feu, ili yu unata i ɗa.
10 Aza na a tsu zuwa uma usuɓi a yaꞋan unushi
i ta̱ a ku yikpa̱ e kpenle kuna a̱ga̱pa̱i,
ama aza babu u nushi i ta̱ a kuciya̱ ili singai.
11 Aza uciyi a ci ɗika ta̱ ka̱cika̱ le aza ugboji,
ama vuzavunambi vu ugboji u yeve ta̱ i na igain.
12 Ɗa baci vuza vu usuɓi u ciya̱i ulyai, ya ba dem u tsu yaꞋan ta̱ ma̱za̱nga̱.
Ama ɗa baci vuza gbanigbani u ciya̱i ulyai, uma a̱ tsu la̱nsa̱ta̱ ubuta̱ a sheɗeku.
13 Aza na a tsu sokongu unushi u le, wa kuciya̱ ulyai ba,
ama ya ba dem vuna u dansai ɗa u ka̱sukpa̱i u ɗa, i ta̱ a ku pana asuvu ayali a̱ ni.
14 Aza a na a tsu pana wovon u Ka̱shile ayin tutu, a tsu yongo ta̱ n ma̱ta̱na̱,
ama ɗa baci u yaꞋan ugbamukaci wita̱ a kuna̱mgba̱.
15 Tsugono tsu gbanigbani cita̱ an maza ma gbanigbani ubuta̱ wa aza unambi,
an kawu ko kakunzu ka munuka.
16 Mogono ma na mi n kuyeve ba, wita̱ a ku doro uma a̱ ni,
ama vuza na u iwain kalya wita̱ a kuciya̱ wuma wu ugaɗi.
17 Vuza ma̱ga̱la̱ka̱ na wi n mpasa n uma ekiye ni, a ku takacikayi, wita̱ a ku ka̱na̱ ilaɗi a li ukpisa̱ u ni.
Ka̱ta̱ i ɓa̱nka̱i ba.
18 Ɗa baci vu yaꞋan ku usuɓi, vi ta̱ a kuda̱sa̱ngu n ma̱ta̱na̱,
ama vuza gbanigbani i ta̱ a kunai babu usa̱n.
19 Kacimbi kana ka tsu yaꞋan ulinga wa a̱bunda̱i, ka ci ciya̱ ta̱ ilikulya ya a̱bunda̱i,
ama vuza na u tsu ciga gbani, wita̱ a kuroko ka̱cika̱ni unambi.
20 Vuza vu usuɓi wita̱ a kuciya̱ uciyi wa a̱bunda̱i
ama vuza na u tsu la̱nsa̱ uciyi gogo, wita̱ a ku uwa atakaci.
21 KuyaꞋan ku kazagba kugan ba,
ama dem n nanai adama ilikulya, vuma wita̱ a ku fuɗa wa yaꞋan unushi.
22 Aza ulyopi a ci ciga ta̱ a ciya̱ uciyi gogo,
ka̱ta̱ u kpa̱ɗa̱ kuyeve a na a okpo aza unambi babu usa̱n ba.
23 Ya ba dem vu na u dansukai toku wita̱ a kuciya̱ ucikpi a ayin ukoci,
ka̱ta̱ ula vuza na u yaꞋankai ni una̱ wu uyoꞋo.
24 Vuza na de dem ubokoi ucanuku u dada ni n a̱kpa̱ ni
ɗa u danai, <<Ai na lo i yoku i ɗa ba.>>
a̱yi n vuza ma̱ga̱lka̱ derere ɗa i.
25 Kutsa̱n ku tsu tuka̱ta̱ n vishili,
ama vuza na u tsu keɗike Ka̱shile ma̱ka̱nga̱, wita̱ a kuciya̱ uciyi wa a̱bunda̱i.
26 Aza na e ci keɗike ka̱cika̱ le a̱pa̱ alawu a ɗa,
ama ya ba dem vuna u walai n ugboji wita̱ a kulaka.
27 Ya ba dem vuna u cineke aza unambi ba̱ri, wi a kunamba ba ili ba,
ama a̱yi na u tsu yimba̱ku a̱shi a̱ ni we e le, i ta̱ a kila̱kpa̱i.
28 Ɗa baci aza gbanigbani i a kulya tsugono, uma a tsu sheɗeku ta̱.
ama ayin na baci tsugono tsuta̱ ekiye e le uma usuɓi o tsu doku ta̱.