49
Kuzuwa ku ka̱ɗu a̱ uciyi tsulau tsu ɗa
Kadanshi a kubana u vuza vu kelime vi ishipa: Vishipa vu muku n Kora.
Panai ili i nampa, yaba dem,
zuwai atsuvu uma a̱ ubuta̱ dem,
Aza a̱ gba̱ra̱-gba̱ra̱ n muku,
aza a uciyi n aza a unambi ra̱ka̱.
Mi ta̱ a kuyaꞋan kadanshi n kuyeve,
mi ta̱ a kuyaꞋan kusheshe ku singai.
Mi ta̱ o kubonoko ka̱ɗu ka̱ va̱,
a̱ ubuta̱ u asan,
ka̱ta̱ n dana ili i na asan a i a kadanshi,
a makyan ma na mi a kuwaꞋa umolu.
Adama a̱ yiɗa̱i ɗa n kupana wovon,
a makyan ma atakaci?
A makyan ma na,
uma a gbani-gbani a̱ ka̱ra̱Ꞌi mu,
uma a na a zuwai a̱ɗu a̱ uciyi u le,
aza a na i a̱ra̱ɗi,
adama a̱ ka̱bunda̱i ka̱ uciyi u le?
Mayun, vuza wi lo a̱ ka̱tsuma̱ ke le,
vuza na wi a kufuɗa kushiba̱ vuza ni ba,
ko u fuɗa u tsupa Ka̱shile ikebe,
adama a̱ ka̱ci ka̱ ni ba.
Adama a na ikebe i kushiba̱ wuma u vuma,
i laꞋa ta̱ agisana,
a ili i na vuma u kufuɗa ku tsupa,
ko i ɗa yi a kuyawa ba,
Yi tana kuzuwa yi u yongo n wuma ba,
ko i sa̱nka̱ yi ukpa̱ u ko wannai ba.
10 U tsu zuwa ta̱ aza e kuyeve a̱ kuwa̱,
ta feu nannai alau n uma a kavama a̱ ku kuwa̱,
a̱ ka̱sukpa̱ uciyi u le wu ntsukaya n le.
11 Asaun e le i ta̱ o kokpo le iꞋuwa ko wannai,
ta punu o kuyongo ayin dem,
ko a na wo okpoi n tsu cau,
ishi ta̱ n iɗika i ka̱ci ke le.
12 Tsugbayin tsu vuma ci a̱ ku sa̱nka̱ yi ku kuwa̱ ba,
wi ta̱ a̱ ku kuwa̱ tsu manama.
13 La̱na̱ ili i na i kuciya̱ aza a na,
zuwakai ka̱ci ke le a̱ɗu,
n aza a na a̱ cuwa̱i n uciyi u le.
Kuvuka
14 Tsu nlala,
i ta̱ o kurono le a kubanka a̱ ubuta̱ wi ida̱shi wa̱ a̱kpisa̱,
ukpa̱ uɗa maguɓi me le,
n usana aza a usuɓi a ɗa a kulyaꞋaka le tsugono,
Ikyamba i le kpamu yi ta̱ a kushama a kasaun,
a̱ ubuta̱ wi ida̱shi wa̱ a̱kpisa̱ u ɗa wi o ko okpo kpaꞋa ku le.
15 Ama Ka̱shile ki ta̱ a̱ kushiba̱ mu,
wi ta̱ a ku isa mu a utsura wu ukpa̱.
Kuvuka
16 Ka̱ta̱ vu na̱mgba̱ ka̱tsuma̱ ba,
ɗa baci vuza wo okpoi vuza vu uciyi,
ko kpamu uciyi u ni u yimkpa baci.
17 Adama a na wi a kuɗika u ɗa ba,
a makyan ma na u kuwa̱i,
uciyi u ni wi a ku uwa a kasaun n a̱yi ba.
18 Ko ishi baci vuma ciya̱ ili ba̱ri a wuma u nampa,
ana i a kcikpa yi adama a ulyaꞋi u ni.
19 N nannai dem wi ta̱ a ku cina ikaya i ni i na i kuwa̱i ɗe,
a̱ ubuta̱ u na ka̱yimbi ki ko wannai.
20 Tsugbayin tsu vuma ci a ku sa̱nka̱ yi ku kuwa̱ ba.
wi ta̱ a̱ ku kuwa̱ tsu manama.