2
Pamauli Noxou Lataua ne Anu Mii Tatila Manina
Ioxe aloxo nenge telomusou tei lexe Lataua ꞌOlu muuliuli, la sou anu laixe sou nenge tatetelisou vaikala laixe ne pekiaꞌu. Mo talaxaꞌi laixe, loxo ꞌo io tasasalo la taxexesou. Xal 3:19Tatei la vaikala ane mulaa no anaxaꞌa ta angelo sou mivikalaneꞌi ta xaixasinge ne mupalaꞌa lexe anu manina, xo ta mitema mixolaꞌu mo imulinu laixe uasi la mixalisou tuꞌumaxu umomomo no anu ꞌilixoiꞌa. Eva 10:29; 12:25Ane ne tatei ia vaimomo ꞌo voteꞌi sou pamauli lailaixe a mupalaꞌa. La sou lexe nenge taxiunu tumalingeu xaixai tatila noxou Lataua ne, la sou nenge taꞌume mo tapolopepeenu laꞌia noxou Lataua ne a loxovaa? Tei la Tatila molu mupalaꞌalixu voteꞌi sou pamauli noxiꞌa aneꞌi tatei, xe aneꞌi ta ꞌei ane milomusou, la miaꞌaloxu noxinge vaimomo ꞌo lexe vaikala ne anu manina. Mak 16:20; 1Ko 12:4, 11Mo Lataua kalumo muvalaxu vaikalaiꞌa lexe vaikala ne anu manina, la muꞌoxonu sosovo iouiou mo xaixai pekipekiaꞌu moseꞌi, xe mumilaꞌanu lavulavu sou xaixai iouiou no anu Uleenu Tavuna mulai noxiꞌa ta mitema vilevilesi no anu masaxa noxousi.
Iesu Anusisi Anu Itema sou Pamauli
Aloxo ne, la sou no anu lialia alavua ane uxali iliꞌi e tevivikalasou ꞌo, la Lataua usosovosiꞌa ta angelo sou iulaxunu uasi. Lex 8:4-6Xo aloxo itema vile muvikala muai no nano no anu Lavuku Tavuna teinu muvikala aloxo ꞌo,
“Itema ꞌo anu ne mii maꞌia manina ꞌo,
la sou nini taneni uꞌoxoxu malaxo ꞌo?
Anu mii vitanisi,
ia tavaꞌu loxovaa la sou nini nasaxilaꞌu itema ꞌOlu laixe ꞌo?
Nini neꞌoxonu muxolu,
no laaxaꞌa ta angelo no anu voxo ataxusesi.
Mo nemulaxu no anu tanixene lailaixe ne mo neꞌitinu ualasou
xe nelosou uala tila.
Xe nemulaxu sou mimii latala ukalusi e nekoinu ne
uxolu no anu saxisaxilaꞌu noxou xe uxolu no laaxu.”
No mine Lataua muitalonu mimii mukalusi mulai no anu saxisaxilaꞌu noxou la mii vile uxolu vitanisi uasi. Ia vaimomo ꞌo nenge tamaisou itema usaxilaꞌu mo ulaxunu mii vile uasi. Pil 2:8-9Ia nenge tamaisou Iesu la Anu munoꞌu uala tatila manina, xo tei la Anu muxolu no laaxaꞌa ta angelo voxo ataxusi sou munoꞌu tanixaꞌa ta mitema sou musoli. La ane ne anu voteꞌi sou alauna noxou Lataua sou usuꞌulineꞌi ta mitema. Xo Iesu mutaloxolixu mo mutavulenu tuꞌutuꞌumaxu mumomomo no anu soli, aloxo ne la sou Lataua muꞌitinu ualasou xe mulosou uala tila xe mimii latala muxolu no laaxu.
10 Lataua anusisi Anu tavaꞌu mimii latala mukalusi mo Anu molu mukoinu mimii latala mukalusi. La sou Anu mumasaxa lexe ta ꞌolu tavuꞌalo ne iꞌunalai ixolu no nano no anu xoluxolu laixe noxou Lataua teitexi no loxotolo. Lataua muxalixu voteꞌi sou pamauli ne ane noxou Iesusi nesi, la sou muꞌoxonu mutavulenu navunavu. No anu navunavu ne la Anu muꞌoxonu Iesu muuliuli manina sou mutulu moosou pamauli noxiꞌa Lataua ta ꞌolu. La sou ꞌilixo e Lataua muꞌoxonu ne anu lailaixe manina. 11  Mat 25:40La sou anu Iesu mukalipalaneꞌi ta mitema milapu la mixali Lataua ta ꞌolu xe aneꞌi ta mitema e Anu mukalipalaneꞌi ne, aneꞌi mamiꞌa vilesisi, la sou Anu umaela sou umoxoꞌa lexe Anu ta vimovimou uasi. 12  Lex 22:22La muvikalanu Lataua aloxo ꞌo,
“Eni amoxomoxoꞌu ulasine mo apalaꞌalixu noxiꞌa ta vivilo.
Xe no mine nexi tapita sou talotu,
la eni alexenu lexe sou aꞌitinu ualasine.”
13  Ais 8:17-18Mo muvikala la aloxo ꞌo,
“Eni axolu aloopala noxou Latauasi sou uꞌoxonu mii maꞌia Anu mulemolu.”
Xe muvikala la aloxo ꞌo,
“Namalei, eni exolu no taineꞌi Lataua ta ꞌolu e Anu mulosilo.”
14  1Ioa 3:8; Pal 12:10Lataua ta ꞌolu e Iesu mulemeꞌa ne, ane aneꞌi ta mitema imaumauli. La sou Iesu muxali itema aloxo aneꞌi ne sou ulai no anu soli. Anu muꞌoxonu aloxo ne sou mutaloxolixu Satani anu itema e xaviinu sou uꞌoxoneꞌi ta mitema isoisoli. 15 Mo ꞌume sou soli musakisakiinu maulixaꞌa ta mitema no anu xoluxoluxaꞌa, la sou Iesu musoli sou mululusiꞌa no anu sakisaki no anu ꞌume sou soli ne. 16 Manina misevile, Iesu muneꞌe muꞌoxonu xaixai tatila ne sou usuꞌulineꞌi ta angelo uasi, ia Anu muꞌoxonu xaixai ne sou musuꞌulineꞌi Avalaamu ta xaixasou. 17 Xo Anu anusisi sou usuꞌulineꞌi ta vimovimou la anu voteꞌi vilesisi ane Anu uxali uisalili aloxo aneꞌi nesi. Mo sou aloxo ne la Anu uxali kisiꞌa ta ailiꞌi e muꞌanaꞌana no anu ꞌilixo sou alauna manina mo umulinu vaivaikala noxou Lataua la uꞌoxonu xaixai noxou laixesi. Xaixai ne ane sou uxexeenu susu noxiꞌa ta mitema. 18 Xe no mine tovotovo uxalisiꞌa la Anu umomomo sou usuꞌulineꞌi xo Anu muxamulinu navunavu no anu tovotovo iouvilesisi aloxo aneꞌi ixamulinu ne.

2:2: Xal 3:19

2:3: Eva 10:29; 12:25

2:4: Mak 16:20; 1Ko 12:4, 11

2:6: Lex 8:4-6

2:9: Pil 2:8-9

2:11: Mat 25:40

2:12: Lex 22:22

2:13: Ais 8:17-18

2:14: 1Ioa 3:8; Pal 12:10