12
Sema Ilou Iaulu Toxoxaꞌa
Mo sosovo vile toxoxaꞌa muxali no opo loxotolo ne aloxo ꞌo. Sema vile mitokolomo no anu aso xe soꞌio no laaxu tavaꞌe mo kisivalu xe ta oto mavulovexa mo mulelia tamei mixolu no anu kisie. Mai 4:10Ane opoone mo voxo sou lavuloꞌo muneꞌe ꞌalai, la miungaunga xo mixamuli navunavu toxoxaꞌa. Tan 7:7Mo sosovo vile la muxali no opo loxotolo la aloxo ꞌo. Iaulu vile toxoxaꞌa ia lauolauoinu mo kisou muxatele tamei mo sikilisou mavulovexa xe kisivaluxu muxatele tamei muxolu no kisou. Tan 8:10La anu muvali xelaꞌu, la xalee tatalusiꞌa ta oto no loxotolo milapalapau miluꞌe no lia. Ia anu muavuti la mulai mutulu no talaxe sema ꞌalaꞌalai sou ivoꞌo sou lexe ane ivoꞌonu keakea ne la anu uꞌou. Lex 2:9; Ais 7:14; 66:7; Pal 19:15Ia sema ne mivoꞌo, la ꞌilie mulu. Anu sou usaxilaꞌa ta mitema no lia ukalusi no anu vilaxoxu miꞌoxonu no anu aeni. La no mine ane mivoꞌonusi ka mitokinu mulai noxou Lataua sou muxolu no luusou. Ia sema ne, miꞌume milai mixolu no xalee lia vitanisi. Xalee lia ane ne, Lataua mulalaxiinu sou ane ilai ixolu no anu mo anu usaxilaꞌe voxo 1,260.
Iud 1:9Ia teitexi no opo loxotolo, la ꞌotoꞌoto toxoxaꞌa muxali no taiineꞌi Mikaeli iloꞌa ta angelo noxou xe iaulu toxoxaꞌa iloꞌa ta angelo noxou. Ia anu xaviinu uasi, la miꞌumesou tualasiꞌa teitexi no opo loxotolo. Tav 3:1, 14; Luk 10:18; 22:31; Pal 20:2La iaulu toxoxaꞌa iloꞌa ta angelo noxou ne, mileaneꞌi miluꞌe no lia ꞌo. La sou anu uxovulaulaulixaꞌa ta mitema latala mukalusi no lia ꞌo. Anu sinana veveeni muxolu tatei ne ilemolu lexe ulee masua xe Satani.
10  Iop 1:9-11; Sek 3:1La eni elomusou ꞌava toxoxaꞌa molu teitexi no opo loxotolo aloxo ꞌo,
“vaimomo ꞌo, voxo sou pamauli mo xavi mo saxisaxilaꞌu noxou Lataua noxinge.
Xe xavi noxou Kalisito noxou a muxali.
Xo itema sou ukaitoloneꞌi ta vivinge noxou Iesu no iou Lataua
no aso xe no ꞌolovoxo ne, mileanu muluꞌe.
11 Ia aneꞌi mitaloxolixu no anu sialuxu Sipsip ꞌOlu
mo no anu vaikala noxou Lataua ane aneꞌi miaꞌaloxu.
Mo aneꞌi ixavutala no anu maulixaꞌa malaxo uasi
mo iꞌume uasi ulai utalo no mine soli uxalisiꞌa.
12  Ais 44:23; 49:13Aloxo ne, la sou ngingi ane ngexolu no opo loxotolo ne ngaꞌosa!
Ia tuꞌumaxu ulai noxiꞌa aneꞌi ane mixolu no lia mo no luaki,
xo ulee masua muluꞌelai noxinge.
Anu maasi, la laꞌiaxu misevile xo anu mulavusou lexe voxo noxou asou ukalu.”
13 La sou no mine anu mulavusou lexe aneꞌi mileanu muluꞌe no lia, la anu mumulimuline sema e mivoꞌonu keakea mulu sou lexe uvee. 14  Tan 7:25; 12:7Ia sema ne, milosie suluvi nenu toxoxaꞌa vivisou tamei sou lexe ane ivava no anu la ilai ixolu no xalee lia vitanisi ane Lataua mulalaxiinu. Ane ilai ixolu ne no Anu usaxilae, umomomo loxo tauu ie tatalu mo soꞌio muxatele vilesi, mo sou ane ixolu vaꞌaxu noxou sinana veveeni ne. 15 Ioxe anu iaulu toxoxaꞌa ne muavuti la muꞌexinu lexa mulaa no anaxu loxo lexa muꞌani sou lexe utavulene sema ne ulailixe. 16 Ia lialia musuꞌuline sema ne la muꞌaꞌa sou mumalukusou lexa e iaulu toxoxaꞌa muꞌexinu ne muꞌuna no lia tanu mukalusi. 17-18  Pal 11:7Anu mumaisou aloxo ne la laꞌiaxuie sema ne misevile la sou anu muavuti la mulutu sou mulai uꞌoto noxie sema ne ta ꞌiliꞌilie iloꞌa ta minemine. Aneꞌi ane milomuxu mo mimulimulinu lapuloto noxou Lataua mo mimuxaxu taneꞌi no anu vaikala manina noxou Iesu. La anu iaulu toxoxaꞌa mulai mutulu no tasiꞌi.

12:2: Mai 4:10

12:3: Tan 7:7

12:4: Tan 8:10

12:5: Lex 2:9; Ais 7:14; 66:7; Pal 19:15

12:7: Iud 1:9

12:9: Tav 3:1, 14; Luk 10:18; 22:31; Pal 20:2

12:10: Iop 1:9-11; Sek 3:1

12:12: Ais 44:23; 49:13

12:14: Tan 7:25; 12:7

12:17-18: Pal 11:7