11
Ta Mitema Tamei Mipalomatananu
Ese 40:3; Sek 2:1-2Angelo muvikalaleli aloxo ne mukalu, la milosilo lukae mautunu vile loxo vilaxo sou itilovosou mimii no anu. La mivikalaleli lexe, “Nalai mo natilovosou tani tila noxou Lataua mo valovalosou xe naitisiꞌa ta mitema ane ilotu no anu. Luk 21:24; Pal 13:5Ia ieni uvaxau mo natilovosou taiinu ane muxolu no ale no tani tila noxou Lataua uasi, xo taiinu ane ne milosiꞌa ta asila. La aneꞌi imaapitasou tuala tila noxou Lataua soꞌio itemaxu tamei mo tamei. Ia eni apelemasaxaneꞌi ta mitema tamei sou ipalomatana no anu vaikala noxilo voxo 1260. Aneꞌi ilou itokolomoxu tokolomosou tama.” Sek 4:3, 11-14Aneꞌi ilou ane ovu olivu tamei xe mii sou itulusou telu no anu tamei e ututulu no talaxu. Lataua anu tila sou usaxilaꞌa ta mitema no lia ꞌo mukalusi. 2Sa 22:9; Lex 97:3Ia lexe evile utovosou uꞌoxo masuaneꞌi, la navu ulaa no anaxaꞌa sou uꞌelaxaꞌa ta uluaiꞌa. La sou ꞌei ane umasaxa uꞌoxo masuaneꞌi, la anu usolisi. Mul 7:17-20; 1Sa 4:8; 1Ta 17:1La sou aneꞌi ta mitema tamei ne Lataua ulosiꞌa xavi sou itatusou loxotolo la laꞌiua usili uasi no mine aneꞌi ilou ipalomatana no anu vaikala noxou. Mo ulosiꞌa xavi sou ixiunu lexa uxali sialu xe ipuapuasiꞌa ta mitema no lia ꞌo ukalusi no anu tuꞌutuꞌumaxu iouiou alaxu tavuꞌalo no ꞌa masaxa noxiꞌa.
Tan 7:21; Pal 12:17; 13:7; 17:8Xe no mine aneꞌi ilou ipalomatana no anu vaikala noxou Lataua ukalu, la mii vova e uxolu no taxa ane kaluxu uasi ne ulaa uuatusou iloꞌa iꞌoto. Iloꞌa iꞌoto la anu xaviinu musuku la uveꞌa ilou isoisoli. Luk 13:34La vasimeꞌa ilou usuꞌanu uai no voteꞌi no tuala tila itovolaꞌinu lexe Sodomu ilee Aixiputo. No anu tuala tila ane ne, la aneꞌi mililixu Tila noxiꞌa ilou no ovu valautu ane. La ta mitema ane vasimeꞌa kaukavunu iouiou mo mata iouiou mo vaivaikalaiꞌa iouiou no xalexalee tuatuala mukalusi ineꞌe imamaisou vasimeꞌasi voxo tatalu mo paꞌusou, ia imasaxa sou inoꞌu mo iꞌasixu uasi. 10 Mo aneꞌi ane ixoxolu no lia ꞌo iꞌosasiꞌa la isovaiꞌa mimii ngatongatoꞌo. Xo ta mitema sou palomatana tamei milosiꞌa tuꞌutuꞌumaxu ne misoisoli.
11  Ese 37:5, 10Ia voxo tatalu xe paꞌusou mukalu, la tauuxu Lataua sou mauli muꞌuna noxiꞌa ilou, la ilou mitulu. Aneꞌi mimaisiꞌa ilou aloxo ne, la mimamaꞌu manina misevile. 12  2Ta 2:11Aneꞌi ilou mitulu mukalu, la milomusou ꞌava toxoxaꞌa molu teitexi no opo loxotolo muluꞌe noxiꞌa ilou aloxo ꞌo, “Ngongou ngatelo.” La aneꞌi ilou mitelai no anu tamuxala, ia ta uluaiꞌa mitulu mimaisiꞌa ilousi.
13  Pal 6:12; 16:18No mine aneꞌi ilou mitelaisi ka laliua toxoxaꞌa manina mukunikuni, la xalee mavulovexasou tuala tila ne mumamulo. Xe ta mitema itiitisiꞌa muxali loxo 7,000 misoisoli no anu. Ia aneꞌi ane isoisoli uasi ne mimamaꞌu la miꞌitinu Lataua uxolu no opo loxotolo ualasou.
14  Pal 9:12La tuꞌutuꞌumaxu tameisou a mukalu ne. Ia tatalusou a ꞌalaꞌalaisi sou uxali.
Xoolau Muxatele Tameisou
15  Mul 15:18; Lex 10:16; Tan 2:44; 7:14Xe angelo muxatele tameisou noxiꞌa mutaunu xoolau noxou, la ꞌava tavuꞌalo toxotoxoxaꞌa molu teitexi no opo loxotolo mivikala aloxo ꞌo,
“Ta mitema no tuatuala mukalusi no lia ꞌo ne,
mixali Tilasinge ta naꞌu mo Kalisito noxou.
La Anu usaxilaꞌa no voxovoxo utotomu mo kaluxu uasi.”
16 La ta tatila itemaxu vile mo tamiꞌa e mixolu no luusiꞌa no talaxu Lataua ne, mitangatulu muluꞌelai no lia sou milotu noxou, 17 ia mivikala aloxo ꞌo,
“Nini Tila mo Lataua xavineni musuku misevile nemauli tei
mo nemauli vaimomo ꞌo.
Nexi talemolu laixe ulai noxine, xo nini xavineni musuku
la sou nini nasaxilaꞌa ta mitema no lia ꞌo.
18  Lex 110:5; 115:13; Rom 2:5; Pal 20:11-13La aneꞌi ta mitema no lia ꞌo laꞌiaxaꞌa.
Ia voxosou laꞌia noxine a muxali.
La nini natulusiꞌa ta mitema misoisoli no anu vaivaikala
sou nalosiꞌa lakolisou xaixai noxiꞌa aneꞌi ane ta mitema sou xaixai vitanisi
ane mipalomatana no anu vaikala noxine iloꞌa ta mitema noxine
mo aneꞌi ane inoꞌu uala tila uasi xe aneꞌi ane minoꞌu uala tila la mitoxoneni.
Mo nakalusiꞌa aneꞌi ane miꞌoxo masuaneꞌi ta mitema.”
19  Eva 9:4; Pal 8:5; 15:5; 16:21Aneꞌi mivikala aloxo ne mukalu, la tani tila noxou Lataua teitexi no opo loxotolo mukisi. La eni emaisou lavokisi sou vaikala noxou Lataua ane musakii no anu no nano no taasou lalotu noxou Lataua. Mo emaisou leleꞌe ulamilami mo upaupau la luluxu uvalivalixumu. Mo laliua ukunikuni xe aesi lavolavoꞌo toxotoxoxaꞌa ulapalapau.

11:1: Ese 40:3; Sek 2:1-2

11:2: Luk 21:24; Pal 13:5

11:4: Sek 4:3, 11-14

11:5: 2Sa 22:9; Lex 97:3

11:6: Mul 7:17-20; 1Sa 4:8; 1Ta 17:1

11:7: Tan 7:21; Pal 12:17; 13:7; 17:8

11:8: Luk 13:34

11:11: Ese 37:5, 10

11:12: 2Ta 2:11

11:13: Pal 6:12; 16:18

11:14: Pal 9:12

11:15: Mul 15:18; Lex 10:16; Tan 2:44; 7:14

11:18: Lex 110:5; 115:13; Rom 2:5; Pal 20:11-13

11:19: Eva 9:4; Pal 8:5; 15:5; 16:21