1 ✡Mat 13:55Eni Iudasi, eni ekaukavunu vaivai-kala ane ꞌo ulai noxinge ngingi ane Lataua Maminge muꞌavalinge. Anu mumasaxainge xe ngingi ngaxolu no anu saxisaxilaꞌu noxou Iesu Kalisito. Eni amitema sou xaixai vitanisi noxou mo eni Iakovo vimou.

2 Eni alinga lexe ꞌiliꞌilixo sou alauna mo opo seꞌisisi xe ꞌilixo sou ngamasaxainge ngatongatoꞌo uleme no anu maulingenge.

3 Ta menexilo e eni emasaxainge. Eni emasaxa manina lexe apasipaa mo akaukavu ulai noxinge sou ngapamauli ane nenge nengeꞌa tenoꞌu, ia eni akaukavu aloxo ne uasi, elavusou lexe eni akaukavunusi mo avikalangengi pekiaꞌu lexe ngingi ngatulu pekiaꞌinge no anu muxamuxaxu tangengi ane Lataua muꞌitalonu mulai noxiꞌa ta mitema noxou tei. 4 ✡Xal 2:4; 2Pi 2:1Xo ta mitema moseꞌi mitalume mo miꞌuna mixolu no taiingengi. Ia ta mitema aloxo ne, Lavuku Tavuna muvikala tatei lexe Lataua utulusiꞌa no anu vaivaikala, xo aneꞌi mixiu tumaliꞌau mo aneꞌi mixiunu vaikala sou alauna noxou Lataua sou imulinu ꞌiliꞌilixo masumasua xe misingisou Iesu Kalisito ane Anusisi usaxilaꞌinge mo Tila noxinge.

5 ✡Mul 12:51; Iti 14:29-30Ngingi ngelavusou mii ane ꞌo mukalu ne. Ia eni emasaxa lexe avikalangengi la. Tila mulaaneꞌi ta mitema noxou ne Aixiputo, ia iliꞌi la anu mukalusiꞌa aneꞌi ane imulaxu taneꞌi noxou uasi. 6 ✡2Pi 2:4Mo ta angelo ane Lataua mulosiꞌa xaixai ne, ia mialasou pilixasou xaixai noxiꞌa la anu musakisakineꞌi no anu lamota ane umomomo sou uxoto uasi mo mitatuxaꞌa no isivoxo ulai utalo no voxo tila ane itulu no anu vaivaikala. 7 ✡Tav 19:1-25; 2Pi 2:6, 10Mo anu aloxo ta Sodomu iloꞌa ta Xomola mo aneꞌi ane mixolu ꞌalai noxiꞌa. Aneꞌi milosou maulixaꞌa no anu ꞌiliꞌilixo sou voteꞌi mo masaxa masua noxiꞌa ne muꞌoxoneꞌi la ixiuiꞌa la. Ta mitema aloxo ne mitovolaꞌinu lexe aneꞌi ta mitema loxo ne inoꞌu navunavu no anu navu ane kaluxu uasi.

8 Ia ta mitema ane mitalume mo mixolu no taiingengi ne, aneꞌi imulimulinu ꞌiliꞌilixo masumasua aloxo aneꞌi ne. Aneꞌi ta mitema sou aipiepiena mo aneꞌi meꞌa iꞌoxo masua vasimeꞌa mo mixiu tumaliꞌau xavi noxou Lataua la mivikala masua noxiꞌa aneꞌi ane ta lailaixe ixoxolu teitexi. 9 ✡Tan 10:13, 21; 12:1; Sek 3:2; 2Pi 2:11; Pal 12:7Ia no mine tila noxiꞌa ta angelo Mikaeli ilou Satani miꞌotosou anaxaꞌasou Mosesi vasimolu, la anu ulea vaikala vile masua noxou Satani uasi ia anu muvikala lexe, “Tila ukaitoloneni!” 10 ✡2Pi 2:12Ia aneꞌi ne, ivikala masua no anu mii maꞌia ane ilavusou uasi. Ia mii maꞌia ane milavusou no mine mipaa no lia ꞌo ne, anu aloxo lavulavu noxiꞌa ta aꞌaa e xavutalaiꞌa uasi. Lavulavu aloxo ne, anu molu uꞌoxo masuaneꞌi.

11 ✡Tav 4:7-8; Iti 16:1-35; 2Pi 2:15; 1Ioa 3:12Aneꞌi ixalisou tuꞌutuꞌumaxu tatila! Xo aneꞌi imulinu ꞌiliꞌilixo noxou Kaini mo aneꞌi mimasaxau lamoli la mimulinu kalavoi noxou Balamu. Xe aneꞌi mixiu tumaliꞌaiꞌa ta mitema ane Lataua musosovosiꞌa loxo Kora muꞌoxonu. 12 ✡2Pi 2:13, 17Xe ngingi ngemasaxainge ngatongatoꞌo ia ngapita sou ngaꞌani, la aneꞌi itaxa uasi ineꞌe ixolu iꞌani uluꞌesi. La ꞌilixo noxiꞌa ne, anu loxo nuni vile muxolu no anu lavalava kea. Mo aneꞌi meꞌa isaxilaꞌasi, la sou aneꞌi loxo tamuxala vitanisi e atume utavutavulenu ia laꞌiua uxali no anu uasi. Mo aneꞌi loxo ovu ane voxosou sou uneneꞌa ia temanu uasi muxalo la miluvunu. Ta mitema ane loxo ne, isoli alaxu tamei aloxo ovu ne. 13 Mo aneꞌi ꞌiliꞌilixoneꞌi ne, imaelamulinu loxo xasi no luaki uneꞌe upei la livilivixu. Mo aneꞌi aloxo ta oto ane ixolu tanixaꞌa vilesisi uasi, la Lataua umulaxaꞌa no isivoxo manina ane ukalu uasi.

14 ✡Tav 5:18, 21-24Adamu ꞌilusunu, anu Enoko mupalomatanangengisiꞌa ta mitema ne aloxo ꞌo, “Ngamaisou, Tila uneneꞌe iloꞌa aneꞌi ane noxousi. Itiitisiꞌa ne tavuꞌalo tavuꞌalo manina. 15 Anu uneꞌe sou utulusiꞌa ta mitema ukalusi no anu vaivaikala mo ulosiꞌa ta mitema latala ane mixiunu tumaliꞌau noxou Lataua navunavu. Xo aneꞌi miꞌoxonu ꞌiliꞌilixo masumasua ane umomomo no iou Lataua uasi, mo aneꞌi itaxaanu uasi la aneꞌi milea anaxaꞌa noxou.” 16 Ta mitema ane ne, ikaalapu utotomu mo ikamuli susu noxiꞌa ta mitema mo imulimulinu masaxa masua sou vasimeꞌa. La iꞌitinu ualasiꞌa xe iꞌitinu ta mitema ualasiꞌa vitanisi sou inoꞌu miꞌamiꞌa.

17 Ia ta menexilo e eni emasaxainge. Ngaxavutalanu vaivaikala ane ta mitema ane Tilasinge Iesu Kalisito mupalusiꞌa mitotokalasou. 18 ✡2Pi 3:3La aneꞌi mivikalangengi aloxo ꞌo, “No anu voxo kaluxusou, la ta mitema imolovilaꞌisou aꞌalo laixe xe imulinu masaxa masua noxiꞌa ane Lataua uꞌosasou uasi. 19 Ta mitema ane ne, mo Uleenu Tavuna uxolu noxiꞌa uasi, aneꞌi sou ikalipalangengi la sou aneꞌi imulinu masaxa ane muxolu noxiꞌa no mine mipaa no lia ꞌo.

20 ✡Kol 2:7Ia ngingi ta menexilo e eni emasaxainge. Ngingi ngamulaxu tangengi noxou Lataua anusisi mo ngasuꞌulingengi mo ngaꞌoxonu pakiaꞌinge ngatongatoꞌo loxo ngingi ngapita sou ngatulusou tani vile mo ngakilaka no anu xavi noxou Uleenu Tavuna. 21 La ngaxolu loxo Lataua mumasaxainge mo ngaxomaiou voxo ane Tilasinge Iesu Kalisito mualaunasinge sou ulosinge mauli ane kaluxu uasi.

22 Ngaꞌoxo alaunasiꞌa aneꞌi ane ixavutala piena 23 ✡Sek 3:2; Pal 3:4Mo ngapamaulineꞌi aneꞌi ane sou iꞌela no navu mo ngaꞌoxo alaunasiꞌa ta mitema moseꞌi la ngasaxilaꞌinge laixe. Mo ngaxolu vaꞌaxu no anu ꞌiliꞌilixo masumasua e iꞌoxoꞌoxonu loxo ngaꞌumolu lavalava e pita muteiteisou.

24 Nenge taꞌitinu ualasou anu ane umomomo sou usaxilaꞌinge la ngalapau uasi mo ngasusu uasi la unoꞌinge ngalai ngaxolu no paꞌumolu ane lailaixe. Ngaxolu la ngaꞌosaꞌosasi. 25 ✡Rom 16:27; 2Pi 3:18Anu Lataua anusisi mupamaulinenge noxou Iesu Kalisito anu Tila noxinge. La sou nenge taꞌitinu ualasou mo tataxanu mo taꞌosasou saxisaxilaꞌu mo xavi noxou musoko tatei no mine anu mukoinu mimii mo muneꞌe mutalo vaimomo ꞌo xe iliꞌi la mo kaluxu uasi. Manina.