1 ✡Ese 47:1Ioxe angelo ne muavuti la mulosielixu lexa sou mauli ia anu ulamilami loxo latitilo mo luuxu no laaxu puloulou noxiꞌa Lataua ilou Sipsip ꞌOlu la musiali muuatu. 2 ✡Tav 2:9; Ese 47:12; Ioe 3:18; Sek 14:8La muiave mulai nonixi no voteꞌi toxoxaꞌa sou tuala tatila ne, xe no paꞌumolu xalee vile xe xalee vile la ovu sou mauli mutulutulu. Ovu ne ulavusou uneneꞌa alaxu mavulovexa mo muluꞌe no lia tamei no anu tauu ie vile momoxu soꞌisoꞌio xe voloxu ne sou uꞌoxoneꞌi ta mitema no xalexaleenu lia ukalusi ꞌo inoꞌu mauli no anu. 3 Mo mimii e Lataua umasaxau uasi manina mo ulevetesou lexe uxexee umomomo sou uxolu no nano ne la uasi. Mo puloulou noxou Lataua mo Sipsip ꞌOlu uxolu no nano no tuala tatila ne la ta mitema sou xaixai noxou ixaxai noxou. 4 ✡Mat 5:8; Pal 3:12La aneꞌi imaisou iou xe ikaukavunu ualasou no ꞌalaieꞌi. 5 ✡Tan 7:18, 27; Pal 5:10; 20:6; 21:23, 25La ꞌolovoxo uasi. Xo anu tila Lataua ulosiꞌa lamana, la sou aneꞌi imomomo sou ixolu no anu lamanaxu telu mo lamanaxu aso uasi. Aneꞌi ixali ta tatanaanu tuala no voxovoxo mo kaluxu uasi. 6 ✡Pal 1:1Mo angelo ne muvikalaleli aloxo ꞌo, “Vaivaikala ane ꞌo ne manina misevile umomomo sou ta mitema imuxaxu taneꞌi no anu. Tila anu Lataua no anu Uleenu la muavutilixaꞌa ta mitema sou palomatana la miaꞌalo no anu vaivaikala noxou. Anu mupalusiꞌa ta angelo noxou sou ineꞌe ilosieꞌi ta mitema sou xaixai noxou no anu mimii e ꞌalaꞌalai sou uxali.”

7 ✡Pal 1:3Mo angelo ne musolonu vaivaikala noxou la aloxo ꞌo, “Ngalomu, eni ꞌalaꞌalai sou alivu aneꞌe. La sou ꞌenaꞌei aneꞌi umulinu vaivaikala palopalomatana uai no nano no anu uoli voloxu e misakii ꞌo, anu uꞌosa xo Lataua ualusou.” 8 ✡Pal 19:10Eni Ioanesi, enisisi ane emaisou mimii ne xe elomusou vaivaikala ne. Ia no mine eni elomusou xe elomusou mukalu la elapau muluꞌe no tavaꞌu angelo e ulolosielixu mimii ne sou lexe alotu noxou. 9 Ia anu muavuti la muvikalaleli aloxo ꞌo, “Mamu, nalotu noxilo uasi, nalotu noxou Lataua anusisi. Xo eni amitema sou xaixai noxou Lataua aloxo nininesi mo ta vivine ta mitema sou palomatana xe aneꞌi ane imulinu vaivaikala no anu uoli voloxu e misakii ꞌo. Nalotu Lataua!” 10 Mo muavuti la muvikalaleli la aloxo ꞌo, “Mamu sou natatusou vaivaikala palopalomatana muai no nano no anu uoli voloxu e misakii ꞌo xo voxo a ꞌalaꞌalai ukalu. 11 ✡Tan 12:10La sou ꞌenaꞌei uꞌoxoꞌoxonu susu la anu laixe lexe anu ulai mo usolonu uꞌoxoꞌoxonu susu mo ꞌenaꞌei ane uꞌoxoꞌoxonu ꞌiliꞌilixo e iou maemaela no anu la anu laixe lexe ulai mo usolonu uꞌoxoꞌoxonu ꞌiliꞌilixo ane ne. Mo ꞌenaꞌei ane umulimulinu ꞌiliꞌilixo mulapu la laixe lexe anu usolonu uꞌoxonu ꞌilixo mulapu xe ꞌenaꞌei ane umasaxa lexe uxolu vaꞌaxu no anu ꞌiliꞌilixo masumasua la anu laixe lexe anu usolonu sou uxolu vaꞌaxu no anu ꞌiliꞌilixo masumasua ne.” 12 ✡Ais 40:10; Iel 17:10; Pal 2:23 “Ngalomu, eni ꞌalaꞌalai sou alivu aneꞌe la alosiꞌa ta mitema latala lakolisou ꞌiliꞌilixo maꞌia aneꞌi vilevilesi miꞌoxonu. 13 ✡Ais 44:6; Pal 1:8, 17; 21:6Eni tei xe eni kaluxu mo eni sokoꞌu mimii xe eni kaluxusou mimii.” 14 ✡Tav 2:9; 3:22Aneꞌi ane miꞌuinu tokolomoiꞌa la iꞌosa xo Lataua ualusiꞌa la aneꞌi umomomo sou iꞌani no anu ovu sou mauli mo uꞌunalai no aitenga no tuala tatila ne. 15 Ia aneꞌi ane umomomo sou iꞌuna no tuala tatila ne uasi ane ta aꞌaa mo aneꞌi ane iꞌoxoꞌoxonu sasaa kalakalavoi mo ꞌiliꞌilixo sou voteꞌi mo aneꞌi miveꞌa ta mitema misoisoli mo ilotu no anu mimii vulaulau xe aneꞌi latala e imasaxa iꞌoxoꞌoxonu vaikala kalakalavoisi. Aneꞌi ta mitema ne ixolu no ale no tuala tatila noxou Lataua ne. 16 ✡Iti 24:17; Ais 11:1, 10; Rom 1:3; Pal 2:28; 5:5 “Eni Iesu epalusou angelo noxilo sou muluꞌe muaꞌaloxu vaivaikala manina noxilo mulai nixiꞌa ta mitema sou lalotu. Xo eni ꞌilusuleli ane Deviti mo eni Deviti uliꞌu vile ane mo eni loxo xuae sou lamana ukea.” 17 ✡Ais 55:1; Pal 21:6Uleenu Tavuna ilee Sipsip ꞌOlu semau ivikala lexe, “Naneꞌe.” Mo anu ane ulomusou la anu uvikala lexe, “Naneꞌe.” ꞌEnaꞌei ane usoliu lexa la anu uneꞌe mo ꞌenaꞌei ane umasaxa manina lexe uie no anu lexa sou mauli ne la anu laixe lexe anu uneꞌe mo uie vitanisi ia ulotonu uasi.

18 ✡Lap 4:2; 12:32La sou eni apeletoto aloxo ꞌo lexe ꞌenaꞌei ane mulomusou vaikala palomatana muai no nano no lavuku ꞌo ia umuxaxu vaikala seꞌi utelo no latanu la, la Lataua umuxaxu tuꞌutuꞌumaxu utelo no lataanu noxou. 19 Xe anu ane uxexeenu vaivaikala palomatana e muai no nano no lavuku ꞌo, la anu umomomo sou uꞌani no anu ovu sou mauli uasi, mo umomomo sou uꞌunalai no anu Tuala Tavuna Tatila noxou Lataua e mulemolu no anu lavuku noxou uasi. Lataua uxexeenu mimii ane ne noxou. 20 ✡Mat 24:30-31; 1Ko 16:22Mo itema e muaꞌalo lamana no anu mimii ane ne uvikala lexe, “Ani, Eni ꞌalaꞌalai sou alivu aneꞌe.” Manina. Tila Iesu, naneꞌe. 21 Eni alinga lexe alauna noxou Tila Iesu uxolu noxiꞌa ta mitema noxou Lataua. Manina.