1 ✡Ais 65:17; 2Pi 3:13Ioxe eni emaisou mimii ne mukalu la emaisou loxotolo ilou lia alavua. Loxotolo ilou lia tei ne tasiauxu avile mo luaki kalumo uxolu la uasi. 2 ✡Ais 52:1; 61:10; Eva 11:16; 12:22; Pal 3:12Mo emaisou tuala Tavuna tatila noxou Lataua anu Ielusalemu alavua molu noxou Lataua teitexi no loxotolo ululuꞌe. Anu tokolomoxu ne lailaixe manina loxo sema itokolomo no anu tokolomo lailaixe sou taulaꞌi mo ixolu ilooxu mulue sou uneꞌe. 3 ✡Liv 26:11-12; Ese 37:27; Sek 2:10; 2Ko 6:16Mo elomusou ꞌava vile tatila molu no anu puloulou noxou Lataua muꞌava aloxo ꞌo, “Namaisou, tani alelaxu noxou Lataua a muneꞌe muxolu no taineꞌi ta mitema no lia ꞌo mo iloꞌa ixolu. Mo aneꞌi ixali ta mitema noxou xe Anu uxali Lataua noxiꞌa. 4 ✡Ais 35:10; 65:19; Pal 7:17Anu uiasou ieꞌi lexaxu mo soli ilou opo tuꞌutuꞌumaxu mo tama xe navunavu la uasi, xo anu mimii sou tei ne anu mukalu avile.”

5 ✡2Ko 5:17Mo itema e muxolu no puloulou ne muvikala aloxo ꞌo, “Namaisou, eni aꞌoxonu mimii alavua mukalusi.” Xe mukalu la muvikalaleli la lexe, “Nakaukavunu vaivaikala ane ꞌo xo vaivaikala ane ꞌo ne maninasou mo umomomo sou itema umuxaxu tanu no anu.” 6 ✡Ais 55:1; Iel 2:13; Ioa 7:37; Pal 1:8, 17; 22:17Mo Anu muvikalaleli la aloxo ꞌo “Eni ekalusou xaixai noxilo, xo eni tei mo kaluxusou. Mo eni sokoꞌu mimii xe eni kaluxusou mimii. La sou anu ane usoliu lexa sou uiexu la eni alosou lexa no anu pupulu sou mauli la anu uiexu la ulotonu uasi. 7 ✡2Sa 7:14; 1Aꞌa 17:13; Lex 89:26-27La sou lexe anu ane uaꞌulixu ꞌotoꞌoto la anu unoꞌu mimii ane ꞌo mo eni axali Lataua noxou xe anu uxali ꞌalixeni. 8 ✡Mat 25:41; Pal 20:15; 22:15Ia aneꞌi ane iꞌumekea iloꞌa aneꞌi ane imuxaxu taneꞌi uasi mo aneꞌi ane iꞌoxonu ꞌiliꞌilixo e masumasua manina mo aneꞌi ane iveꞌa ta mitema isoli ilou iꞌoxonu ꞌiliꞌilixo masumasua sou voteꞌi mo aneꞌi ane iꞌoxoꞌoxonu saa masumasua iouiou mo aneꞌi ilotu noxiꞌa ta mimii vulaulau mo aneꞌi ane ivikala la ikalakalavoi ne tualasiꞌa ane navu kupaxu e navu uꞌaniꞌani mo taupea. Anu soli ta tameisou ane.”

9 Ioxe vile noxiꞌa ta angelo muxatele tamei e minoꞌu tavulu sou tuꞌutuꞌumaxu noxou Lataua kaluxusou muxatele tamei ne muneꞌe la muvikalaleli aloxo ꞌo, “Naneꞌe mo alosienixe Sipsip ꞌOlu semau sou uꞌuluxe.” 10 ✡Ese 40:2Eni eꞌanaꞌana no anu xaviinu Uleenu Tavuna la elai no anu Uleenu la angelo ne mukasi noxilo la noxou telai no laxaꞌilu tatila vile kisou teitexi. La mulosielixu Ielusalemu Tuala Tavuna tatila molu noxou Lataua teitexi no loxotolo ululuꞌe. 11 ✡Ais 60:1-2, 19La lamanaxu Lataua mukakaa no tuala tatila ne la lamanaxu e uieiei ne iouvilemo manina loxo lavoꞌo vile lailaixe manina mo ilotonu la lamolisou toxoxaꞌa mo loxo lavoꞌo vile lailaixe ilemo lexe iasupa malemalenga xe ulamilami loxo ꞌo latitilo. 12 ✡Ese 48:30-35Mo vimelu toxoxaꞌa mo veveeni mulai teitexi muxoxosou tuala tatila ne mo aitengaxu mavulovexa mo muluꞌe no lia tamei xe ta angelo vilevilesi mitulu mimomoxu aiaitenga ne. Mo mikaukavunu ualasiꞌa ta matamata mavulovexa mo muluꞌe no lia tamei noxiꞌa ta Isilaeli no anu aitenga ne. 13 No xalee vimelu telo ꞌole la aitengaxu tatalu mo luꞌe ꞌole aitengaxu tatalu mo no xaleenu toꞌo ꞌole la aitengaxu tatalu xe no xaleenu vaxa ꞌole la aitengaxu tatalu kalumo. 14 Mo mimuxaxu lavoꞌo kulu sou vimelu tavaꞌu mavulovexa mo muluꞌe no lia tamei sou vimelu sou tuala tatila ne uai utelo la usiatoto no anu. Lavoꞌo kulu mavulovexa mo muluꞌe no lia tamei ne ualaualasiꞌa ta mitema sou xaixai noxou Sipsip ꞌOlu mavulovexa mo muluꞌe no lia tamei muxolu no anu. 15 ✡Ese 40:3; Pal 11:1Mo angelo e uvivikalaleli ne munoꞌu tilovo vile miꞌoxonu no anu xoulu sou utilovosou tuala tatila ne no anu ilou aiaitengaxu mo vimelusou. 16 Mo no anu tuala tatila ne la no xalee tamiꞌa mo ne mitilovosou la lovaxu iouvilesisi. Veveeninu mo toxoxaꞌa no anu ne mo veveeni utelai teitexi ne anu mulovaxu la itiitisou lova ne iouvilesisi mumomomo loxo lova 2,220 (kilomita). 17 Mo mulovaxu komuko no anu vimelu ne la lovaxu mumomomo loxo mita itemaxu tatalu mo taꞌuve (65 mita). Angelo munoꞌu lova ne loxo noxiꞌa ta mitema inonoꞌu sou ilovaxu mimii no anu. 18 ✡Ais 54:11-12Vimelu ne miꞌoxonu no anu lavoꞌo vile lailaixe ilemolu lexe iasupa xe tuala tatila ne miꞌoxonu no anu xoulu la ulamilami loxo latitilo. 19 Mo no tavaꞌu vimelu ne la mitokolomonu no anu lavoꞌo seꞌi lailaixe manina. Lavoꞌo ane mimuxaxu tei manina ane ilemolu lexe iasupa mo ta tameisou ne lavoꞌo vile ꞌelaꞌela ilemolu lexe sapaia mo lavoꞌo tatalusou ilemolu lexe xalukedoni mo lavoꞌo tamiꞌasou ne kaukavuxu vevesinu ilemolu lexe emeralu. 20 Mo lavoꞌo taꞌuvesou ne lavoꞌo kaukavuxu lauolauoinu xe kea muꞌumuꞌunalaxu ilemolu lexe saludoni mo muxatele vilesou anu lavoꞌo lauolauoinu ilemolu lexe koniliani mo muxatele tameisou ne lavoꞌo vile poonu ilemolu lexe kulisolite mo muxatele tatalusou ne anu lavoꞌo vile la kaukavuxu vevesinu ilemolu lexe velili mo muxatele tamiꞌasou ne anu lavoꞌo vile poonu la ilemolu lexe topasi mo mavulovexasou ne anu lavoꞌo vevesinu ne ilemolu lexe kulisopulasi mo mavulovexa mo muluꞌe no lia vile ne lavoꞌo ꞌelaꞌela ilemolu lexe aiasine xe mavulovexa mo muluꞌe no lia ta tameisou ne anu lavoꞌo malivololoonu ilemolu lexe ametisi. 21 Mo aitenga mavulovexa mo muluꞌe no lia tamei ne miꞌoxo no anu lasala mukalusi mo voteꞌi sou tuala tatila ne miꞌoxonu no anu xoulu e mivile uꞌunalaxu uasi la ulamilami mo tamalei ulai xalee vile loxo atitilo. 22 Xe eni amaisou taasou lalotu vile uxolu no nano no tuala tatila ne uasi xo taasou lalotu ane anu Tila Lataua xaviinu musuku ilou Sipsip ꞌOlu nesi. 23 ✡Ais 60:19-20; Pal 22:5Mo no nano no tuala tatila ne la umomomo sou aso ilou soꞌio ukaa la uasi xo lamanaxu Lataua ukakaa no anu mo Sipsip ꞌOlu anu telusou. 24 ✡Ais 60:3, 5Ta mitema tavuꞌalo no xalexalee tuatuala ukalusi ꞌo imuamuaꞌi no anu lamanaxu ne mo ta tatanaanu tuatuala no lia ꞌo inoꞌu mimii lailaixe noxiꞌa la inoꞌu ineꞌenu. 25 ✡Ais 60:11Mo aitengaxu tuala tatila ne voxo vile utatu uasi ukisi uxoxolu aloxo ne xo ꞌolovoxo la uasi aso uulualesi. 26 Mo tokolomo iouiou ilou lamoli noxiꞌa ta mitema no xalexalee tuatuala no lia ꞌo ukalusi ne inoꞌu uꞌunalai no anu. 27 ✡Ais 52:1; Ese 44:9; 1Ko 6:9-10Mo susu vile uxolu no nano ne uasi iloꞌa ta mitema e iꞌoxoꞌoxonu ꞌilixo sou maela loxo pakali mo ꞌilixo sou voteꞌi mo to seꞌi la xe aneꞌi ane iꞌoxoꞌoxonu vaikala kalakalavoi ne umomomo sou iꞌunalai uasisi manina. Ia aneꞌi ane ualasiꞌa uai no nano no anu lavuku sou mauli noxou Sipsip ꞌOlu aneꞌisisi iꞌunalai.