3
IJesu ọ fu dọsẹ iMosisi
1 Irarighọ, inyọghuo-mhẹ ni Ẹshinẹgba ọ zẹ ni e khi ẹgbọ ni e pfuasẹ eyọli, a sa ingme oyi iJesu ni awa lui aghiusomhi na kẹẹ, ali Ọga ọyi ekpodalo ugamhi nya. 2 Eri ọ ri igẹsikia deba Ẹshinẹgba, ni ọ zẹ ọli ọ ke gbe akanya eyọli, ẹzẹzẹ abi iMosisi ọni ọọ ga ọ li ri igẹsikia gbe akanya elemhi Owa oyi Ẹshinẹgba.*Li zẹ iNọba 12.7 3 A she mẹ khi iJesu ọ mhuẹ imuẹloe ni o fu dọsẹ oyi iMosisi, ẹzẹzẹ abi atsọna ọ liẹ mhọli imuẹloe ni o fu dọsẹ owa ni ọ tọ. 4 A kie kpẹ lẹsẹ khi ọgbọ ọọ tọ owa kpa, Ẹshinẹgba ọ ma emhikpa. 5 IMosisi ọ khi ọgbọ igẹsikia elemhi Owa oyi Ẹshinẹgba abi ọni ọọ ga. Akanya ni ọ gbe o khi ọtsẹlẹ oyi igẹsikia oyi emini a ya ngme ogbe na akọ. 6 Ama iKirisiti ọ khi Omi Ẹshinẹgba ni ọ mhẹsẹ ẹ shi Owa ugamhi oyọli. Owa oyọli awa khi ini awa da kie mu igbedu ali irudushi oyawa ni awa regbenga mhuẹ ne.
Iyẹmhẹa ni a rọ na Ẹgbọ eyi Ẹshinẹgba
7 Irarighọ, abi Ayẹmhẹ-nọ-pfuasẹ ọ ngme, ni ọọ,
“A kha suọ uruli
oyi Ẹshinẹgba amo,
8 a khi zese udu-a,
abi eni e bia ẹ e li
ẹghẹghẹ ni e rọ ọ riẹlẹ
umha-suesọ deba Ẹshinẹgba.
Ẹghẹghẹ ni a rọ la
ọdagbe ifufu mu wẹ fẹ,
9 ikhi obini ita ẹ e la
mu mhẹ fẹ, mhẹsẹ mhẹ bino,
e mẹ emini mhi riẹlẹ
elemhi ikpe egbhuẹva
10 Lọli o zẹ ni elemhi e rọ bi mhẹ
deba oni agbhotu oghọ,
ni mhi rọ liẹ, ‘Ẹghẹghẹ kpa
udu oyẹwẹ o rọ rẹwẹ lo ebuli,
ẹa lẹsẹ odẹ eyẹmhẹ.’
11 Irarighọ, mhi rọ ri
elemhi-ibibi shi-ẹmuẹ liẹ,
‘Ẹa ya tigbe lo
iyẹmhẹa oyẹmhẹ.’ ”†Li zẹ Iwolo 95.7-11
12 Inyọghuo, a mu egbe ẹ ini ọngẹ ẹ ọ khi mhọli udu umha-miesuọ, ni ọ ya lase odẹ oyi Ẹshinẹgba ni ọ la ọ le. 13 Ochoghọ a ke ye egbe ẹ ude, itobọ khi, “Amo.” Oni ẹghẹghẹ o kie la ọ, ni a rọ ọ mu pfi, ini udimhi ni olamhẹ ọọ di ọgbọ o khi ri ọngẹ ẹ zese udu-a. 14 Eni e kuma iKirisiti ọ awa khi ini awa lolo mu igbedu ni awa rọte ekẹ mhọli mhuẹ ya ramhi ukpẹsẹ. 15 Abi Ebe-no-pfuasẹ o ngme.
“Ini u suọ uruli
oyi Ẹshinẹgba amo,
a khi zese udu-a,
abi eni e bia ẹ e li
ẹghẹghẹ ni e rọ ọ riẹlẹ
umha-suesọ deba Ẹshinẹgba.”‡Li zẹ Iwolo 95.7-8
16 Eghuo e khi eni ẹgbọ ni e suọ uruli oyi Ẹshinẹgba ni e riẹlẹ umha suọ esọ deba li? Ọa khi eni iMosisi ọ rọte ekẹ iJipiti rue lasele? 17 Eghuo ọ biselemhi deba ikpe egbhuẹva? Ọa khi eni e lamhẹ, ni e ghuloa shi ọdagbe ifufu? 18 Eghuo Ẹshinẹgba ọ shi ẹmuẹ deba khi ẹa ya tigbe lo iyẹmhẹa, ọa khi eni ẹa suọ esọ na li?§Li zẹ iNọba 14.1-35 19 Irarighọ, awa mẹ khi itobọ umha-miesuọ oyẹwẹ ẹa rọ dobẹ lo.