1-2 Ndrô nã ꞌbá yî sĩ, kúmú ạ́ngı̣́ Rómã kâ ãzâ rĩꞌá kúmú ãzí drı̣̃ı̣̂ sĩ ndrĩ, rú lâ rĩꞌá Ạ̃gúsũtũ. Kúmú ạ́ngı̣́ ꞌdĩ drí tã ꞌbãzó õjílã drí ndrĩ kĩ nĩ rî, 3 õjílã õgõ tílílí ꞌbạ̃drı̣̃ ĩyî ạ́ꞌbı̣́yạ́ yî tı̣̃zó rî ꞌásĩ, nĩꞌá ĩyî rú îgĩlí ꞌbã-tı̣̂ ĩyíkâ vó ró bélé-bélé tãsĩ.*2.3 Ãnyî ꞌbạ̃drı̣̃ gólâ Yũdạ́yạ̃ ꞌdĩ lạ̃gạ́tı̣́ ꞌbạ̃drı̣̃ ãzâ rú bê Sírĩyã ꞌdĩ kúmú lâ íyíkâ Kĩrínyã ĩꞌdî.

4-5 Ạ̃kû ró rî, Yõsépã rî ạ́ꞌbı̣́yạ́ rî trá ꞌbạ̃drı̣̃ mvá gólâ zı̣̃lı̣́ Bẽtẽlémẽ ꞌdĩ ꞌá, gólâ ꞌbạ̃súrú kúmú Dạ̃wúdı̣̃ yí kâ rî ꞌásĩ. Gõꞌdá nĩngá sĩ rî, Yõsépã yî ngâ ĩyî trá Mãríyã bê, Nãzãrétã ꞌásĩ nĩlí Bẽtẽlémẽ ꞌálâ ĩyî rú îgĩlí bélé-bélé tãsĩ. Mãríyã ꞌbã rû trá ꞌâ bê mbârâkã Ôvârí kâ sĩ. 6 Gólĩyî õtírĩ rĩî Bẽtẽlémẽ ꞌálâ rî, kậyı̣̂ Mãríyã drí ꞌẽzó mvá tı̣̃lı̣́ rî câ trá, ûsû gólâ trá tólâ.

7 Mãríyã drí gõzó mvá sı̣́sı̣́ íyíkâ tı̣̃lı̣́ ágó ró. Drílâ mvá ꞌdĩ gõzó ítá sĩ ngóló-ngóló gólâ rî lãlé õmã ꞌãꞌí drı̣̃ı̣̂. Gólĩyî rĩꞌá jó gólâ kạ́bı̣̃lı̣́kı̣̃ drí rĩzó ꞌá lâ rî ꞌá, tãlâ võ yûꞌdạ́wạ́ drílĩyî ậyı̣́zó jó ũmú kâ rî ꞌálâ.

8 Kậyı̣̂ ꞌdĩ ꞌbá yî ꞌá rî, õjílã ãzâ ꞌbá yî kpá rĩꞌá ĩyî kạ́bı̣̃lı̣́kı̣̃ ĩyíkâ lôkíꞌá ngạ́cı̣̂ sĩ õmã ꞌálâ. 9 Mãlãyíkã Ôvârí kâ ãzâ drí ânĩzó gólĩyî ngálâ. Gõꞌdá ı̣́nı̣́rı̣́kúwạ́ ãmbá ngạ́cı̣̂ kâ ꞌdĩ drí gõzó ꞌbãlé õzõ ı̣̃tú-ạ̃yı̣́ kâtí, kãngbê-kãngbê, lậgû-lậgû ró. Lôkí ꞌbá ꞌdĩ ꞌbá yî lârô ĩyî trá ũrı̣̃ bê.

10 Mãlãyíkã ꞌdî drí tã âtázó drílĩyî kĩ nĩ rî, “Nĩ ꞌê ũrı̣̃ kô, tãlâ Ôvârí âjô mâ trá tã tãndí pẽlé ãnî drí. Tã tãndí má drí ânĩzó ĩꞌdí bê lâ nõ âꞌdô õjílã ndrĩ ꞌẽꞌá ãyĩkõ ró, 11 tãlâ ãndrõ nô rî ꞌdíyî pã ꞌbá tíbê Ôvârí drí tã lâ âtálé kĩꞌá nĩ rî, áâꞌdô âjóꞌá lâ õjílã pãlé rî, útı̣̂ trá Bẽtẽlémẽ ꞌálâ. 12 Nĩ âꞌdô ûsúꞌá lâ ꞌwãâ. Tã pạ̃tı̣́ı̣̃ ró rî, õzõ nĩ õcâ trá Bẽtẽlémẽ ꞌálâ rî, nĩ âꞌdô mvá õdé ûsúꞌá ógõ trá ítá sĩ ngóló-ngóló jó kạ́bı̣̃lı̣́kı̣̃ drí rĩzó rî ꞌá. Ândrê lâ lã trá õmã ꞌãꞌí drı̣̃ı̣̂.”

13 Kôrô ꞌdĩî rî vósĩ rî, mãlãyíkã Ôvârí kâ údúgúꞌbı̣́ drí rĩzó ĩyî ânĩlí ûrú lésĩ lôngó ngõ bê Ôvârí rî lûyı̣̂-lûyı̣̂ bê kĩ nĩ rî,

15 Mãlãyíkã údúgúꞌbı̣́ Ôvârí kâ ꞌdĩ ꞌbá yî drí gõzó ûrú ꞌálâ.

Gõꞌdá lôkí ꞌbá ꞌdĩ ꞌbá yî drí tã ı̣̂ꞌbı̣̃zó kĩ nĩ rî, yĩ õnĩ drẽ Bẽtẽlémẽ ꞌálâ tã gólâ mãlãyíkã ꞌdî ꞌbá yî drí rĩꞌá pẽlâ ĩyî drí ꞌdĩ ndrẽlé. 16 Gólĩyî râ ĩyî trá ꞌwãâꞌwâ, nĩꞌá tã nã ndrẽlé, drílĩyî mvá õdé ꞌdĩ ûsúzó ândrê lâ bê, mvá õdé ꞌdĩ ólã trá vũdrı̣́ õmã ꞌãꞌí drı̣̃ı̣̂.

17-20 Gõꞌdá nĩngá sĩ rî, drílĩyî nĩzó gõlé vólé lôngó Ôvârí rî lûyı̣̂-lûyı̣̂ kâ bê. Tã tíbê drílĩyî ârílí gõꞌdá kpá drílĩyî ndrẽzó lâ rĩꞌá kpá té õzõ mãlãyíkã ꞌdî ꞌbá yî drí âtálé drílĩyî rî tí. Õjílã gólĩyî tíbê tã kạ́bı̣̃lı̣́kı̣̃ lôkí ꞌbá yî drí âtálé nõ ârí ꞌbá lâ ĩyî rî, gólĩyî trá ꞌdó ndrĩ lârõ-lârõ ró tã ꞌdî ârírĩ ꞌá.

Gõꞌdá nĩngá sĩ rî, tákõ tã tíbê sı̣́sı̣́ Ôvârí drí rĩꞌá âtálâ Mãríyã drí mãlãyíkã íyíkâ sĩ rî âgâ trá ndrĩ gólâ ꞌá. Drílâ rĩzó tı̣́tı̣́ dĩyí rĩꞌá tã ꞌdî ĩtõ lâ ı̣̂sũlı̣́.

21 Kậyı̣̂ njı̣̂-drı̣̃-lâ-rı̣̃ vósĩ rî, óꞌbê mvá ꞌdĩ trá bãsã ꞌá, gõꞌdá átá lâ zı̣̂ rú lâ trá Yésũ, té õzõ Gãbẽrélẽ drí âtálé ândrê lâ Mãríyã drí rî kâtí.

22-24 Mvá ꞌdĩ tı̣̃tı̣̃ lâ vósĩ rî, Mãríyã drí ꞌẽzó lâ kậyı̣̂ nyâꞌdî-rı̣̃, drílĩyî gõzó ngãlé nĩlí Yõsépã bê Yẽrõsãlémã ꞌálâ. Gólĩyî câ bê rî, nĩ ĩyî trá fĩlí jó ạ́ngı̣́ Ôvârí kâ rî ꞌálâ mvá ꞌdĩ âꞌdálé Ôvârí drí kpá ngá fẽfẽ ĩyíkâ fẽlé Ôvârí drí. Ngá fẽfẽ drílĩyî fẽlé ꞌdĩ rĩꞌá ãmámõ rı̣̃, âꞌdô tã ꞌbãꞌbã Ôvârí drí ꞌbãlé Músạ̃ sĩ rî vó ró, tãlâ ꞌdĩî rĩꞌá mvá sı̣́sı̣́ ꞌî.

25 ꞌDĩî vósĩ rî, ãgô ãzâ bê rĩꞌá Yẽrõsãlémã ꞌá tólâ, rú lâ rĩꞌá Sĩmónã. Gólâ rĩꞌá ãgô tãndí ꞌî. Gólâ ꞌê lãꞌbí ꞌdĩ ꞌbá yî trá ndrĩ bê rî, gólâ drí tã gólâ Líndrí Tãndí Ôvârí kâ drí rĩꞌá âtálâ drílâ rî rõzó. 26 Líndrí Tãndí Ôvârí kâ ꞌbã tã trá gólâ drí kĩ, gólâ õdrãá kô té gólâ drí ꞌdíyî pã ꞌbá ndrẽzó zãlô. 27 Líndrí Tãndí Ôvârí kâ drí tã âtázó drílâ õnĩ ró bê jó ạ́ngı̣́ Ôvârí kâ nã ꞌá tólâ. Gõꞌdá ꞌdĩî rî kpá trá té kậyı̣̂ gólâ Mãríyã yî drí nĩzó ágó lâ Yõsépã bê fĩlí jó ạ́ngı̣́ ꞌdĩ ꞌálâ ngá fẽfẽ ĩyíkâ fẽlé Ôvârí drí rî ĩꞌdî. Sĩmónã drí drı̣̃ ꞌbẽzó gólĩyí bê jó ạ́ngı̣́ nã ꞌá tólâ. 28 Gõꞌdá gólâ ndrê mvá nã bê rî, nı̣̃ trá, yí trõ mvá ꞌdĩ trá yí rú ândré lâ rú sĩ. Gólâ kĩ, “ꞌDĩî rî ꞌdíyî pã ꞌbá Ôvârí drí tã lâ âtálé rî ĩꞌdî.” Gõꞌdá drílâ gõzó Ôvârí rî lûyı̣́lı̣́ kĩ nĩ rî,

33 ꞌDĩî vósĩ rî, Mãríyã yî Yõsépã bê trá ĩyî lârõ-lârõ ró úlı̣́ Sĩmónã drí âtálé ꞌdĩ ꞌá. 34-35 Sĩmónã drí gõzó õrẽ fẽlé gólĩyî drí, gõꞌdá Sĩmónã drí tã âtázó Mãríyã drí kĩ nĩ rî, “Ní ârî drẽ, õjílã ãzâ ꞌbá yî âꞌdô ĩyî âtálâ kĩ, ãwô, tã pạ̃tı̣́ı̣̃ ró, Ôvârí âjô gólâ nĩ ãngó ꞌá nõngá, gõꞌdá õjílã ꞌdî ꞌbá yî, Ôvârí âꞌdô gólĩyî pãꞌá. Gõꞌdá õjílã ãzâ ꞌbá yî âꞌdô ĩyî âtálâ kĩ, ꞌéꞌẽ, Ôvârí âjó gólâ nĩ kô, gõꞌdá õjílã gólĩyî ĩtí ꞌdĩ ꞌbá yî Ôvârí âꞌdô gólĩyî îzãꞌá. Óõ Mãríyã, nî gólâ rî ândrê, ní âꞌdô ꞌbãꞌá ĩzã kõkõ bê rõô lâŋõ ꞌẽ ꞌbá gólâ rî ꞌẽlé rî sĩ.”

36-37 Gõꞌdá kôrô ꞌdĩî rî vósĩ rî, õkó ãzâ drí kpá âfízó jó ạ́ngı̣́ Ôvârí kâ ꞌdĩ ꞌá, rú lâ Ánã, Fạ̃nũwélẽ rî mvá ꞌî, ꞌbạ̃súrú Ãsérã yí kâ. Gólâ tã ậngũ ꞌbá ꞌî. Gólâ rĩꞌá õkó ãdrá ꞌî, ndrô lâ trá nyâꞌdî-sû-drı̣̃-lâ-sû. Ágó lâ gî gólâ bê rî, ꞌê ĩyî trá ndrô njı̣̂-drı̣̃-lâ-rı̣̃, ágó lâ drí gõzó drãlé. Gólâ rî gõꞌdá trá ạ̃yı̣́zı̣́ ró ágó lâ rî vólé drı̣̃ ꞌásĩ zãâ ágó ãkó. Gólâ rĩꞌá kậyı̣̂ vósĩ cé jó ạ́ngı̣́ Ôvârí kâ ꞌdĩ ꞌálâ rãtáã ꞌẽꞌá Ôvârí drí, gõꞌdá rí kậyı̣̂ ãlô tã ı̣̂sũlı̣́ nõtí kĩꞌá nĩ rî, ngá nyãnyã ꞌẽzó yí drí rî kô, cé rĩzó rãtáã ꞌẽlé ĩꞌdî Ôvârí drí. 38 Gõꞌdá gólâ ndrê mvá ꞌdĩ bê rî, gólâ nı̣̃ trá kĩ nĩ rî, ꞌdĩî rî ꞌdíyî pã ꞌbá ꞌî Ôvârí ngá lésĩ. Gólâ lûyı̣̂ Ôvârí trá, gõꞌdá lânjî tã lâ trá gólĩyî rĩ ꞌbá ꞌdíyî pã ꞌbá tẽlé Yẽrõsãlémã ꞌálâ ânĩlí Ôvârí ngá lésĩ ãngó ꞌá nõngá õjílã íyíkâ pãlé rî yî drí.

39 Gõꞌdá nĩngá sĩ, Yõsépã yî Mãríyã bê Yésũ rî õdẽ yí bê nĩ ĩyî trá rĩlí Nãzãrétã ꞌá ꞌbạ̃drı̣̃ zı̣̃lı̣́ Gãlĩláyã rî ꞌálâ.

40 Mvá Yésũ ꞌdĩ mbâ trá tólâ mbârâkã bê. Gólâ trá tã nı̣̃nı̣̃ bê ãmbá. Ôvârí pâ gólâ trá. 41 Ndrô vósĩ cé, gólâ rî átá yî ândrê lâ bê rî ĩyî trá nĩlí Yẽrõsãlémã ꞌálâ kãrámã lậvũ-lậvũ kôrô kâ ꞌẽlé. 42 Gõꞌdá gólâ õtírĩ ꞌbãâ ndrô bê mûdrı̣́-drı̣̃-lâ-ngâ-rı̣̃ rî gólâ nĩ trá lậmúlı̣́ íyî átá yî íyî ândrê bê Yẽrõsãlémã ꞌálâ kãrámã ꞌdî ꞌẽlé. Áró lâ yî dũû nĩ ĩyî trá ꞌdó gólĩyí bê.

43 Kãrámã ꞌdî vósĩ rî, Yõsépã yî Mãríyã bê ngâ ĩyî trá gõlé Nãzãrétã ꞌálâ, gõꞌdá mvá Yésũ ꞌdĩ ꞌbê íyîngá võ trá ãkpãkãꞌdã Yẽrõsãlémã ꞌálâ cú ĩtí, ândré lâ yî átá bê drí nı̣̃ ãkó. 44 Átá lâ yî nı̣̃ı̣́ ĩyî ândrê lâ bê kĩꞌá nĩ rî, gólâ ãꞌdô ãkpã vólé rî kô. Gólĩyî kĩ ĩyíkâ rî, gólâ õlậvũ trá áró lâ ãzâ ꞌbá yí bê sı̣́sı̣́ ꞌálâ. Kậyı̣̂ drílĩyî ngãzó ĩyîngá nĩlí rî sĩ, lạ̃njạ́túlı̣́ bê, ı̣̃tú drí fĩrĩ ꞌá, Yõsépã Mãríyã bê gõꞌdá drílĩyî rĩzó gólâ rî ndãlé. 45 Gõꞌdá gólĩyî ndã gólâ trá kpı̣̃ı̣̂, ûsú ĩyî gólâ kô ãzí-ãzí lâ yî lãfálé sĩ. Gõꞌdá gólĩyî drí gõzó vólé Yẽrõsãlémã ꞌálâ gólâ rî ndãlé kpá óꞌdí. 46 Ndã ĩyî gólâ trá kậyı̣̂ rı̣̃ sĩ, drílĩyî gõzó nĩlí gólâ rî ûsúlı̣́ jó ạ́ngı̣́ Ôvârí kâ ꞌdĩ ꞌálâ, íyîngá rĩꞌá lãꞌbí îmbá ꞌbá rî ꞌbá yî lãfálé, rĩꞌá úlı̣́ gólĩyíkâ âríꞌá, kpá rĩꞌá gólĩyî îjíꞌá tã îjî-îjî ãzâ ꞌbá yî sĩ. 47 Õjílã rĩ ꞌbá ĩyî tã gólâ drí âtálé rî ꞌbá yî ârílí rî, tı̣̂ lâ ĩyî ậꞌdı̣̂ trá tã gólâ drí rĩꞌá âtálâ rî ꞌá kpá tã îjî gólâkâ rî ꞌá, tãlâ gólâ nı̣̃ tã trá kôrô.

48 Gõꞌdá ândrê lâ Mãríyã âtâ tã trá gólâ drí nõtí kĩ nĩ rî, “Ãmâ mvá, ní ꞌê ãmâ drí nõ ãꞌdô tã ꞌî yã? Ãmâ ánî átá bê gõꞌdá trá ũrı̣̃ ró, tãlâ mã ndã nî trá kpı̣̃ı̣̂.” 49 Gõꞌdá gólâ lôgõ úlı̣́ võ trá gólĩyî drí nõtí, “Nĩ rî ámâ ndãlé ãmbá võ ãzâ ꞌbá yî ꞌásĩ nõ ãꞌdô tãsĩ yã? Nĩ nı̣̃ı̣́ kô kĩꞌá nĩ rî, bê má drí ꞌẽꞌá rĩlí jó ámâ átá Ôvârí kâ rî ꞌá tã gólâkâ rî ꞌẽlé yã?” 50 Mãríyã yî Yõsépã bê nı̣̃ı̣́ ĩyî tã ífí gólâ drí âtálé ꞌdĩ kô. 51 Drílĩyî gõzó ândrê lâ yí bê átá lâ yí bê ꞌdũwạ̃ Nãzãrétã ꞌálâ. Gólâ rô íyî átá yî trá ândrê lâ bê tã ãmbá ꞌdĩ ꞌbá yî ꞌásĩ ndrĩ. Ândrê lâ ı̣̂sũ tã gólâ kó rû ꞌẽ ꞌbá gólâ rî tı̣̃rı̣̃ ꞌá rî trá gõꞌdá âgâ trá ꞌá lâ, rî trá tã ı̣̂sũlı̣́ ãmbá tã lâ sĩ. 52 Gólâ mbâ trá mbârâkã bê, gólâ îcî íyî lı̣̃fı̣́ trá tã nı̣̃nı̣̃ ãzâ ꞌbá yî sĩ. Ôvârí trá ãyĩkõ ró ãmbá gólâ bê. Gõꞌdá kpá õjílã gólâ rî nı̣̃ ꞌbá rî yî, gólĩyî kpá trá ãyĩkõ ró gólâ bê.