Bibeli Gusunɔn Gari Gɔrobun Kookoosu 1
GƆROBUN KOOKOOSU
Tire te, tɑ sɑ̃ɑwɑ Lukun ɡɑrin sukum mɛ u mɑɑ Teofiru yoruɑ. Ye u sɔ̃ɔsimɔ tire te sɔɔ, yerɑ nɡe mɛ Hunde Dɛɛro u Yesun bwɑ̃ɑbu kpɑrɑ, kɑ nɡe mɛ Lɑbɑɑri Geɑ yɑ kɑ nɔɔrɑ Yerusɑlɛmuɔ n kɑ dɑ Yudeɑɔ kɑ Sɑmɑriɔ kɑ tem kpuro sɔɔ mɛ Romuɡibɑ mɔ wɑɑti ye sɔɔ, kɑ sere Gɛrɛkibɑn tem sɔɔ.
Tire te, tɑ mɑɑ sun sɔ̃ɔsimɔ nɡe mɛ Piɛɛ kɑ Pɔlu bɑ sɔmburu kuɑ. Tɑ mɑɑ sun sɔ̃ɔsimɔ mɑ Yesun ɡɑri yi ǹ nɛ yi kɑ tem yɛ̃robu seesi kpɑ yi ben woodɑbɑ ɡo. Aɑwo, yi nɑwɑ yi kɑ Gusunɔn kĩru yibiɑ, wiru 13:7-12 kɑ wiru 16:35-40 kɑ wiru 19:31. Ye yɑ mɑɑ sɑ̃ɑ ɡɑ̃ɑ ɡirinu tire te sɔɔ, yerɑ Hunde Dɛɛron nɑɑru tɔmbu sɔɔ Pɑntikotin tɔ̃ru sɔɔ. Sɑɑ dɔmɑ ten diyɑ Hunde Dɛɛro wi, u nɑɑnɛ dokeobu kpɑre mɑ u Yesun yiɡbɛru tɑ̃sisiɑmɔ.
Tire ten kpunɑɑ
1. Seedɑ dibun sɔɔru, wiru 1:1-26.
2. Seedɑ dibu Yerusɑlɛmuɔ, wiru 2n di sere wiru 8:3.
3. Seedɑ dibu Yudeɑɔ kɑ Sɑmɑriɔ, wiru 8:4n di sere wiru 12:25.
4. Pɔlun wɑɑsu dɑɑbu, wiru 13n di sere wiru 20.
5. Pɔlun siribu, wiru 21n di sere wiru 28.
1
Bɑ ɡɔrobu Hunde Dɛɛro
nɔɔ mwɛɛru kuɑ
Teofiru nɛɡii, nɛn tire ɡbiikiru sɔɔ nɑ kpuro yoruɑ ye Yesu u kuɑ kɑ ye u keu koosiɑ sɑɑ mìn di u win sɔmburu toruɑ sere u kɑ wurɑ Gusunɔ wɔllɔ, ye u win ɡɔro be u ɡɔsɑ woodɑ wɛ̃ u kpɑ kɑ Hunde Dɛɛron dɑm. Sɔ̃ɔ weeru win tiin ɡɔɔn biru, u win tii bu sɔ̃ɔsi nɔn dɑbiru. Sɔ̃ɔsi bi, bu sɑ̃ɑ seedɑ ye yɑ kun sikɑ mɔ mɑ u wɑsi. Bɑ nùn wɑ, u mɑɑ bu Gusunɔn bɑndun ɡɑri tubusiɑ. Sɔ̃ɔ teeru, sɑnɑm mɛ Yesu u kɑ bu dimɔ sɑnnu, u bu sɔ̃ɔwɑ bu ku rɑɑ doonɑ Yerusɑlɛmun di, ɑdɑmɑ bu sinɑ bu win Bɑɑbɑn nɔɔ mwɛɛru mɑ, tèn ɡɑri u rɑɑ bu sɔ̃ɔwɑ u nɛɛ, Yohɑnu u rɑɑ tɔmbu bɑtɛmu kuɑ kɑ nim, ɑdɑmɑ sɔ̃ɔ mɛɛ te sɔɔ, Hunde Dɛɛrowɑ bɑ koo kɑ bɛɛ bɑtɛmu ko.
Yesu u dɑ Gusunɔ wɔllɔ
Mɑ be bɑ mɛnnɛ mi, bɑ nùn bikiɑ bɑ nɛɛ, Yinni sɑɑ yeni sɔɔrɑ kɑɑ wunɛn bɑndu swĩi Isireliɔ?
U bu sɔ̃ɔwɑ u nɛɛ, n ǹ bɛɛn bɑɑ i n kɑ tɔ̃ru yɛ̃ ǹ kun mɛ sɑɑ ye Gusunɔ Bɑɑbɑ u yii kɑ win tiin yiiko. Adɑmɑ i ko i dɑm mwɑ sɑnɑm mɛ Hunde Dɛɛro u duɑ bɛɛ sɔɔ. I ko n sɑ̃ɑ nɛn seedɑ diobu Yerusɑlɛmuɔ, kɑ Yudeɑ kpuro sɔɔ, kɑ mɑɑ Sɑmɑriɔ, kɑ sere sere tem nɔrɔ.
Ye Yesu u ɡɑri yi ɡeruɑ u kpɑ, bɑ nùn mɛɛrɑ u suɑrɑ wɔllɔ, mɑ ɡuru wirɑ nùn beruɑ ben wuswɑɑɔ.
10 Nɡe mɛ bɑ nùn mɛɛrɑ swee u doonɔ wɔllɔ, yerɑ suɑru sɔɔ tɔn durɔbu yiru ɡɑbu be bɑ yɑbe kpikinu sebuɑ, bɑ bu kure. 11 Bɑ nɛɛ, bɛɛ Gɑlileɡibu mbɑn sɔ̃nɑ i yɔ̃ i wɔllu mɛɛrɑ. Yesu wi, wi u suɑrɑ wɔllɔ bɛɛn min di, u koo kpɑm wurɑmɑ nɡe mɛ i wɑ u dɔɔ wɔllɔ.
Yudɑsin kɔsire
12 Sɑnɑm mɛyɑ ɡɔro be, bɑ ɡɔsirɑmɑ Yerusɑlɛmuɔ sɑɑ ɡuu ten wɔllun di te bɑ rɑ soku Olifi, te tɑ wɑ̃ɑ kilo tiɑn sɑkɑ wuu bɔkɔ ɡen min di. 13 Ye bɑ Yerusɑlɛmu duɑ, bɑ dɑ ɡidɑmbisɑ yen wɔllɔ, mi bɑ rɑɑ wɑ̃ɑ. Piɛɛ wɑ̃ɑ mi, kɑ Yohɑnu kɑ Yɑkɔbu kɑ Andere kɑ Filipu kɑ Tomɑɑ kɑ Bɑɑtelemi kɑ Mɑteu kɑ Yɑkɔbu Alufen bii kɑ Simɔɔ wi u win tem ɡɑri kĩ kɑ Yudu Yɑkɔbun bii. 14 Kɑ ɡɔ̃ru teuwɑ tɔn be kpuro bɑ rɑ n mɛnnɛ bɑ n kɑnɑru mɔ̀ kɑ tɛmɑnɑbu kɑ kurɔbu ɡɑbu kɑ Mɑɑri Yesun mɛro kɑ mɑɑ Yesun wɔnɔbu.
15 Sɔ̃ɔ mɛɛrun biru nɑɑnɛ dokeobɑ kpɑm mɛnnɑ. Ben ɡeerɑ dɔɔ nɡe wunɑɑ teeru, mɑ Piɛɛ u seewɑ u yɔ̃rɑ ben suunu sɔɔ u nɛɛ, 16 nɛɡibu, Gusunɔn ɡɑri yi ǹ koo ko yi kun koore, yi Hunde Dɛɛro u ɡeruɑ sɑɑ Dɑfidin nɔɔ sɔɔn di Yudɑsin sɔ̃, wi u kuɑ durɔ ben swɑɑ ɡbio be bɑ Yesu mwɑ. 17 Yudɑsi wi, u rɑɑ sɑ̃ɑ bɛsɛn turo, u rɑɑ mɑɑ nɔmu mɔ bɛsɛn sɔmburu sɔɔ.
18 Gobi yi u wɑ win kom kɔ̃sum sɔ̃ mi, u kɑ yi tem dwɑ, mɑ u wɔrumɑ u kibɑri u kurɑ, mɑ win nuki kpuro yɑrɑ. 19 Tɔmbu kpuro be bɑ wɑ̃ɑ Yerusɑlɛmuɔ bɑ ɡɑri yi nuɑ. Yen sɔ̃, ben bɑrum sɔɔ bɑ tem mɛ sokɑ Akedɑmɑ. Yĩsi ten tubusiɑnɑ, tem yɛmɡim.
20 Domi bɑ yoruɑ Dɑfidin womusun tirerɔ bɑ nɛɛ,
“A de win wɑ̃ɑ yeru tu ko bɑnsu.
Goo u ku mɑɑ sinɑ mi.”
Bɑ mɑɑ yoruɑ,
“A de ɡoo u ko win kɔsire sɔmburu sɔɔ.”
21-22 Ǹ n mɛn nɑ, n weenɛ su Yudɑsin kɔsire ɡɔsi, u n sɑ̃ɑ Yinni Yesun seebu ɡɔrin din seedɑ dio kɑ bɛsɛ sɑnnu. N weenɛ yɛ̃ro wi, u n sɑ̃ɑ ben turo be bɑ sun swĩi sɑnɑm mɛ Yesu u kɑ sun wɑ̃ɑ, sɑɑ mìn di Yohɑnu u nùn bɑtɛmu kuɑ sere u kɑ wurɑ wɔllɔ.
23 Mɑ bɑ durɔbu yiru ɡɑbu ɡɔsɑ, ben turon yĩsirɑ Yosɛfu, wi bɑ mɔ̀ Bɑɑsɑbɑ, ǹ kun mɛ Yusitu, yirusen yĩsirɑ Mɑtiɑsi. 24-25 Mɑ bɑ kɑnɑru kuɑ bɑ nɛɛ, Yinni wunɛ wi ɑ tɔmbu kpuron ɡɔ̃rusu yɛ̃, ɑ sun sɔ̃ɔsio wi ɑ ɡɔsɑ wunɛn ɡɔro be yiru ye sɔɔ u kɑ sɔmbu te suɑ te Yudɑsi u deri u wiɡiru doonɑ.
26 Mɑ bɑ tɛtɛ tobɑ mɑ Mɑtiɑsi u tɛtɛ di mɑ bɑ nùn doke ɡɔrobu wɔkurɑ tiɑ yen wuuru sɔɔ.