7
Wee ye Yinni Gusunɔ u derɑ nɑ wɑ kɑ̃siru sɔɔ. Tweeyɑ u derɑ yi kɔwɑrɑ dɑbi dɑbinu sɑnɑm mɛ yɑkɑsu kpɑrɑm wee si sinɑ boko u rɑɑ bɔɔrɑ win yɑɑ sɑbenun sɔ̃. Sɑnɑm mɛ yi tem min yɑkɑ si kpuro di, yerɑ nɑ nɛɛ, Yinni Gusunɔ, ɑ suuru koowo. Amɔnɑ Yɑkɔbun bweseru tɑ ko n kɑ wɑ̃ɑ. Domi tɑ ǹ mɑɑ dɑm mɔ.
Mɑ Yinni Gusunɔ u ɡɔ̃ru ɡɔsiɑ kɔ̃sɑ yen di. U nɛɛ, yeni yɑ ǹ mɑɑ koorɑmɔ.
Amɔsu u mɑɑ dɔ̃ɔ wɑ
win kɑ̃siru sɔɔ
Wee ye Yinni Gusunɔ u mɑɑ derɑ nɑ wɑ kɑ̃siru ɡɑru sɔɔ. U nɛɛ, u koo tɔmbu sɛɛyɑsiɑ kɑ dɔ̃ɔ. Kpɑ u de dɔ̃ɔ wi, u nim mɛ mu wɑ̃ɑ tem sɔɔwɔ ɡberɑsiɑ kpɑ u Isirelibɑn tem kpuro di. Mɑ nɑ nɛɛ, Yinni Gusunɔ, ɑ ye yɔ̃rɑsio. Amɔnɑ Yɑkɔbun bweseru tɑ ko n kɑ wɑ̃ɑ. Domi tɑ ǹ dɑm mɔ.
Mɑ Yinni Gusunɔ u ɡɔ̃ru ɡɔsiɑ kɔ̃sɑ yen di u nɛɛ, yenin tii yɑ ǹ mɑɑ koorɑmɔ.
Amɔsu u nifoo wɑ
win kɑ̃siru sɔɔ
Wee ye nɑ mɑɑ wɑ kɑ̃siru ɡɑru sɔɔ. Nɑ Yinni Gusunɔ wɑ u yɔ̃ ɡɑnɑɔ mɑ u nifoo nɛni. Mɑ u mɑn bikiɑ u nɛɛ, mbɑ nɑ wɑɑmɔ mi.
Nɑ nùn wisɑ nɑ nɛɛ, nifoo.
Mɑ u mɑn sɔ̃ɔwɑ u nɛɛ, nifoowɑ kon kɑ nɛn tɔmbu Isirelibɑ yĩire nɡe ɡɑnɑ. Nɑ ǹ mɑɑ bu suuru kuɑmmɛ.
Kon ben sikɑdo Isɑkin bũu turɑnu kɔsuku,
kpɑ n Isirelin sɑ̃ɑ yenu suriri,
kpɑ n Yeroboɑmun bɑndu surɑ kɑ tɑkobi
n tu kpeerɑsiɑ.
Amɔsu kɑ yɑ̃ku kowo Amɑsiɑ
10 Yerɑ Amɑsiɑ Betɛlin yɑ̃ku kowo u Yeroboɑmu Isirelibɑn sinɑ boko ɡɔriɑ u nɛɛ, wee Amɔsu u nun seesimɔ Isirelibɑn suunu sɔɔ. Win ɡɑri yi u mɑɑ ɡeruɑ mi, yi tɔmbu kpuro burisinɑ. 11 Domi u nɛɛ,
wunɛ Yeroboɑmu, bɑ koo nun ɡowɑ tɑbu sɔɔ kɑ tɑkobi.
Kpɑ bu Isirelibɑ yoru mwɛɛri ben tem di
bu kɑ dɑ mi n tomɑ.
12 Yen biruwɑ Amɑsiɑ u nɑ Amɔsun mi, u nùn sɔ̃ɔwɑ u nɛɛ, Gusunɔn sɔmɔ wunɛ, ɑ doo Yudɑn tem ɡiɑ, kpɑ ɑ n wunɛn ɡɑri yi mɔ̀ mi, ɑ kɑ wɑ ɑ n dimɔ. 13 Adɑmɑ ɑ ku mɑɑ Gusunɔn ɡɑri ɡere Betɛli mi, domi yɑ sɑ̃ɑwɑ sinɑ boko kɑ Isirelibɑ kpuron sɑ̃ɑ yeru.
14 Mɑ Amɔsu u nùn wisɑ u nɛɛ, nɑ ǹ sɑ̃ɑ Gusunɔn sɔmɔ. Nɑ ǹ mɑɑ Gusunɔn sɔmɔn bɔ̃ɔ. Nɛ, yɑ̃ɑ kpɑrowɑ. Sikɑmɔrewɑ * sikɑmɔre - Yɑ sɑ̃ɑ dɑ̃ɑ tèn binu bɑ rɑ di. nɑ rɑ yewe. 15 Yerɑ Yinni Gusunɔ u mɑn ɡɔsɑ sɑnɑm mɛ nɑ yɑ̃ɑnu kpɑrɑmɔ. U mɑn sɔ̃ɔwɑ u nɛɛ, n doo n win tɔmbu Isirelibɑ win ɡɑri sɔ̃. 16 Tɛ̃, ɑ swɑɑ dɑkio ɑ Yinni Gusunɔn ɡɑri nɔ. Wunɛ Amɑsiɑ, wunɛ wi ɑ nɛɛ, n ku Isirelibɑ Gusunɔn ɡɑri sɔ̃. 17 Wee ye Yinni Gusunɔ u ɡeruɑ. U nɛɛ,
wunɛn kurɔ u koo sɑkɑrɑru ko wuu sɔɔ,
kpɑ bu wunɛn bibu ɡo tɑbu sɔɔ,
kpɑ bu wunɛn ɡberu bɔnu ko,
domi wunɛn tii kɑɑ ɡbi tem tukumɔ mi n tomɑ,
mi bɑ koo kɑ Isirelibɑ dɑ bu yoru di.
Amɔsu u bireru wɑ win
kɑ̃siru sɔɔ tɑ dɑ̃ɑ mɑrum yibɑ

*7:14 sikɑmɔre - Yɑ sɑ̃ɑ dɑ̃ɑ tèn binu bɑ rɑ di.