8
1 Wee ye Yinni Gusunɔ u mɑɑ mɑn sɔ̃ɔsi kɑ̃si teni sɔɔ. Nɑ dɑ̃ɑ mɑrum wɑ bireru sɔɔ mɛ mu ye. 2 Mɑ Yinni Gusunɔ u nɛɛ, mbɑ nɑ wɑɑmɔ mi.
Nɑ nùn wisɑ nɑ nɛɛ, dɑ̃ɑ mɑrumɑ nɑ wɑ mɛ mu ye.
Yerɑ u mɑɑ mɑn sɔ̃ɔwɑ u nɛɛ,
sɑɑ yɑ turɑ u kɑ win tɔmbu Isirelibɑ sɛɛyɑsiɑ.
U ǹ mɑɑ bu suuru kuɑmmɛ.
3 U mɑɑ nɛɛ, yen tɔ̃ɔ te,
sinɑ kpɑɑrun womusu koo ɡɔsiɑ nuku sɑnkirɑnun womusu.
Kpɑ tɔn dɑbinun ɡonu nu n tɛrie bɑɑmɑ.
Kpɑ yɑm mu n mɑɑri sɔ̃ɔ sɔ̃ɔ.
Bɑ koo Isirelibɑ sɛɛyɑsiɑ
4 Yinni Gusunɔ u nɛɛ,
i swɑɑ dɑkio bɛɛ be i sɑ̃ɑrobu dɑm dɔremɔ.
Mɑ i bwɛ̃ɛbwɛ̃ɛbu kɑm koosiɑmɔ.
5 I mɔ̀, dommɑ suru kpɑon tɔ̃ɔ bɑkɑrɑ koo kpe.
Kpɑ su wɑ su bɛsɛn ɑlikɑmɑ dɔrɑ.
Dommɑ tɔ̃ɔ wɛ̃rɑruɡirɑ koo kpe,
kpɑ su wɑ su bɛsɛn birɑnu wukiɑ.
Sɑ ko sɑkɑku kɑwɑ,
kpɑ su yen ɡobi sosi.
Sɑ ko kilo ɡɔsiɑ su kɑ tɔmbu ɡbɛni.
Kpɑ su doo sĩinu dɔrɑ.
6 Sɑ ko wɔnwɔndobu dwe kɑ ɡobi,
kpɑ su sɑ̃ɑrobu kɑ bɑrɑnun ɡobi kɔsinɑ.
7 Nɛ, Yinni Gusunɔ, nɑ bɔ̃ruɑ kɑ nɛn tiin yĩsiru nɑ nɛɛ,
nɑ ǹ bɛɛ Isirelibɑ kɔ̃sɑ ye i kuɑ duɑrimɔ.
8 Bɛɛn tem mu koo yĩiri,
kpɑ bɛɛ nɛn tɔmbu i n ɡɔɔ wooru sɔ̃.
Tem mɛ kpuro mu koo kuke
kpɑ mu sure nɡe Eɡibitin dɑɑrun nim.
9 Yen tɔ̃ɔ te, nɛ, Yinni Gusunɔ kon de sɔ̃ɔ u du sɔ̃ɔ sɔɔ ɡbɑ̃ɑrɑ
kpɑ yɑm mu tĩrɑ.
10 Kon bɛɛn tɔ̃ɔ bɑkɑnu ɡɔsiɑ nuku sɑnkirɑnu,
kpɑ bɛɛn womusu su n sɑ̃ɑ weeweenu.
Kpɑ bɛɛn bɑɑwure u sɑɑkibɑ doke u n wii pɔɔru pote nuku sɑnkirɑnun sɔ̃.
Kon de tɔmbu bɑ n nuki sɑnkire tem mɛ sɔɔ
nɡe be bɑ ben bii teereru bie.
Tɔ̃ɔ te, tɑ ko n sɑ̃ɑwɑ nɔni swɑ̃ɑruɡiru.
11 Wee ye nɛ, Yinni Gusunɔ nɑ ɡeruɑ.
Nɑ nɛɛ, kon de ɡɔ̃ɔru tu du tem mɛ sɔɔ.
N ǹ mɔ dĩɑnun ɡɔ̃ɔru, n ǹ mɑɑ mɔ nim nɔru.
Adɑmɑ nɛn ɡɑrin ɡɔ̃ɔru kɑ yin nim nɔruwɑ i ko i n mɔ.
12 I ko i n yɑrinɛwɑ sɑɑ sɔ̃ɔ yɛ̃sɑn nɔm dwɑru ɡiɑn di n kɑ dɑ sɔ̃ɔ duu yerɔ,
sɑɑ mɑɑ sɔ̃ɔ yɛ̃sɑn nɔm ɡeu ɡiɑn di n kɑ dɑ sɔ̃ɔ yɑri yerɔ,
i n bɔsu bɑɑmɑ, i n kɑsu i nɛn ɡɑri nɔ.
Adɑmɑ i ǹ wɑsi i yi nɔ.
13 Sɑɑ ye sɔɔ, bɛɛn wɔndiɑ burɔbu kɑ bɛɛn ɑluwɑɑsibɑ bɑ koo ɡbi nim nɔrun sɑɑbu.
14 Be bɑ bɔ̃rumɔ kɑ Sɑmɑriɡibun bũnun yĩsiru bɑ mɔ̀,
kɑ bũu wi u wɑ̃ɑ Dɑnuɔn wɑ̃ɑru,
ǹ kun mɛ kɑ sɑ̃ɑ te bɑ mɔ̀ Beri Sebɑɔ,
be kpurowɑ kon de bu wɔruku,
kpɑ bu kpɑnɑ bu se.
Yinni Gusunɔ
u koo tɔmbu siri