12
1 Yinni Gusunɔ, ɑ sɑ̃ɑwɑ ɡemɡii bɑɑdommɑ,
nɑ ǹ kpɛ̃ n nun siribu soku.
Adɑmɑ kɑ mɛ, nɑ kĩ n nun ɡɑ̃ɑnu bikiɑ
wunɛn ɡem mɛ sɔɔ.
Ye nɑ bikiɑmɔ wee.
Mbɑn sɔ̃nɑ durumɡiin wɑ̃ɑru tɑ rɑ n kuurɑmɔ.
Mbɑn sɔ̃nɑ ɑ rɑ de be bɑ ǹ nun nɑɑnɛ sɑ̃ɑ
bɑ n wɑ̃ɑ bɔri yɛndu sɔɔ.
2 Wunɑ ɑ bu duurɑ nɡe dɑ̃ru, mɑ bɑ nuuru kuɑ,
bɑ kpɛ̃ɑ bɑ binu mɑrumɔ.
Mɛyɑ wunɛn ɡɑri rɑ n wɑ̃ɑ ben nɔɔwɔ.
Adɑmɑ yi ǹ wɑ̃ɑ ben ɡɔ̃ruɔ.
3 Yinni Gusunɔ, ɑ mɑn yɛ̃.
A mɑn wɑɑmɔ mɑ ɑ nɛn ɡɔ̃ru wɛ̃ɛrɑ,
ɑ wɑ mɑ ɡɑ wɑ̃ɑ kɑ wunɛ.
A tɔn kɔ̃so be wunɔ nɡe yɑ̃ɑ ni bɑ rɑ mwɛ bu sɑke.
A bu sɔɔru koowo ɑ yi
tɔ̃ɔ te bɑ koo tɔmbu ɡon sɔ̃.
4 Sere sɑɑ yerɑ̀ kɑɑ n derɑ bɛsɛn tem mu n wɑ̃ɑ nuku sɑnkirɑnu sɔɔ. Wee yɑkɑsu kpuro ɡberɑmɔ, mɑ ɡbeeku yɛɛ kɑ ɡunɔsu ɡbimɔ bɛsɛn tem mɛn tɔn kɔ̃sobun sɔ̃. Domi bɑ ɡerumɔ bɑ mɔ̀, ɑ ǹ ben sɑnu sɑnusu wɑɑmɔ.
5 Yinni Gusunɔ u nɛɛ,
Yeremi,
ɑ̀ n kɑ nɑɑsuɡibu dukɑ mɔ̀,
mɑ ɑ bu kpɑnɑ, ɑ wɑsirɑ,
ɑmɔnɑ kɑɑ kɑ kpĩ ɑ kɑ dumiɡibu dukɑ dɑ.
À n bɔri yɛndu mɔ sɑnɑm mɛ tem mu ɑlɑfiɑ mɔ tɔnɑ,
ɑmɔnɑ kɑɑ ko Yuudɛnin dɑɑru tɑ̀ n nim yibɑ tɑ yɑrimɔ.
6 Domi wunɛn mɛro bisibu kɑ wunɛn yɛnuɡibu bɑ nun nɑɑnɛ sɑrirun kom kuɑmmɛ. Wee bɑ nun nɔɔɡiru suemɔ biruɔ. A ku bu nɑɑnɛ ko, bɑɑ bɑ̀ n nun ɡɑri dori sɔ̃ɔmɔ.
Yinni Gusunɔ
u win tɔmbu deri
7 Yinni Gusunɔ u nɛɛ,
nɑ nɛn sɑ̃ɑ yeru deri. Nɑ nɛn tɔmbu biru kisi,
be, be bɑ sɑ̃ɑ nɛn ɑrumɑni.
Wee be, be nɑ kĩ mi, nɑ bu yibɛrɛbɑ nɔmu sɔndiɑ.
8 Domi bɑ mɑn seesi nɡe ɡbee sunɔ
ɡe ɡɑ kukirimɔ dɑ̃ɑ sɔ̃ɔwɔ.
Yen sɔ̃nɑ nɑ ǹ mɑɑ bu kĩ nɡe yellu.
9 Bɑ kuɑ nɡe ɡunɔ ɡe ɡunɔsu ɡɑsu su kɑsu su di.
Kon ɡbeeku yɛɛ kpuro soku yi nɑ yi di.
10 Yibɛrɛ dɑbiru bɑ nɑ nɛn tɔmbun temɔ bɑ mu sɑnkɑ,
nɡe mɛ yɑɑ sɑbenu nu rɑ ɡberun dĩɑnu sɑnku.
Tem mɛ, mu rɑɑ wɑ̃,
ɑdɑmɑ bɑ ǹ ɡɑ̃ɑnu deri mi.
11 Bɑ tem mɛ ɡɔsiɑ nɡe tem sɑɑrɑm.
Wee mu sɑ̃ɑre nɡe tɔnu wi u ɡɔɔ sumɔ u nuki sɑnkire.
Tem mɛ kpuro mu kɑm kuɑ.
Goo sɑri wi u mɛn weeweenu kuɑ.
12 Kɑ ɡuunun wii kpiirɔ kpuro yibɛrɛbɑ bɑ yɔɔwɑwɑ.
Nɑ derɑ tɑbu bu tem mɛ kpuro wukiri.
Goo sɑri wi u wɑ̃ɑ bɔri yɛndu sɔɔ.
13 Wee bɑ dĩɑnu duurɑ, mɑ sɑ̃ki kpiɑ.
Bɑ tii wɑhɑlɑ kuɑ kɑm.
Sekurɑ bɑ ɡɑ̃ nɛ, Yinni Gusunɔn mɔrun sɔ̃.
Nɔɔ mwɛɛ te Yinni Gusunɔ
u bwese ni nu kɑ Isirelibɑ sikerenɛ kuɑ
14 Yinni Gusunɔ u nɛɛ, bwese ni nu kɑ Isirelibɑ sikerenɛ, nu sɑ̃ɑwɑ tɔn kɔ̃sobu. Nu tem mɛ mwɑ mɛ nɛ, Yinni Gusunɔ nɑ Isirelibɑ wɛ̃ mu n sɑ̃ɑ ben tubi. Wee ye nɑ ɡerumɔ bwese nin sɔ̃. Nɑ nɛɛ, kon nu wukɑ sɑɑ nin tem di, kpɑ n Yudɑbɑ wunɑ nin suunu sɔɔn di. 15 Adɑmɑ sɑnɑm mɛ nɑ nu wukɑ nɑ kpɑ, kon mɑɑ nin wɔnwɔndu ko kpɑ n de nin bɑɑtere tu wurɑ ten temɔ mɛ tɑ tubi di. 16 Geemɑ bɑ rɑɑ nɛn tɔmbu sɔ̃ɔsi bu bɔ̃re kɑ bũu wi bɑ mɔ̀ Bɑɑlin yĩsiru, ɑdɑmɑ bɑ̀ n ɡɔ̃ru ɡɔsiɑ, bɑ mɔ̀ nɡe mɛ n weenɛ nɛn tɔmbu bu ko, kpɑ bɑ n bɔ̃rumɔ bɑ n mɔ̀, kɑ nɛ, Yinni Gusunɔn wɑ̃ɑru. Sɑɑ yerɑ kon de bu sinɑ kɑ nuku dobu nɛn tɔmbun suunu sɔɔ. 17 Adɑmɑ bwese te tɑ yinɑ tu mɑn mɛm nɔɔwɑ, kon tu wukɑwɑ kpɑ n tu kpeerɑsiɑ. Nɛ, Yinni Gusunɔwɑ nɑ yeni ɡeruɑ.
Kpɑkɑ ye bɑ kuɑ
kɑ wɛ̃ɛ dɑmɡii