13
1 Yinni Gusunɔ u nɛɛ, nɛ, Yeremi, n doo n kpɑkɑ dwe kpɑ n ye sɛ̃kɑ pɔrɑɔ, ɑdɑmɑ n ku ye doke nim sɔɔ. 2 Mɑ nɑ kpɑkɑ ye dwɑ nɑ sɛ̃kɑ pɔrɑɔ nɡe mɛ u mɑn sɔ̃ɔwɑ. 3 Mɑ Yinni Gusunɔ u kpɑm nɛɛ, 4 n kpɑkɑ ye suo kpɑ n se n dɑ dɑɑ te bɑ mɔ̀ Efɑrɑtiɔ kpɑ n ye bere mi, kpee wɔru ɡɑɡu sɔɔ. 5 Mɑ nɑ seewɑ nɑ dɑ nɑ ye beruɑ mi, nɡe mɛ u ɡeruɑ. 6 Ye n tɛ, u mɑɑ nɛɛ, n wuro Efɑrɑti mi, kpɑ n kpɑkɑ ye suɑmɑ ye u rɑɑ nɛɛ, n bere mi. 7 Mɑ nɑ seewɑ nɑ dɑ nɑ kpɑkɑ ye suɑ mi yɑ rɑɑ beruɑn di. Adɑmɑ nɑ deemɑ wee, yɑ sɑnkirɑ yɑ ǹ mɑɑ ɡɑru koorɔ.
8 Yerɑ Yinni Gusunɔ u mɑn sɔ̃ɔwɑ u nɛɛ, 9 nɡe mɛyɑ u koo Yudɑbɑ kɑ Yerusɑlɛmuɡibun tii suɑbu kpeerɑsiɑ. 10 U nɛɛ, bɑ sɑ̃ɑwɑ tɔn kɔ̃sobu, bɑ ku rɑ wure bu win ɡɑri nɔ. Ben ɡɔ̃ru kĩrun ɡɑriyɑ bɑ rɑ n yɔ̃rɑri, kpɑ bɑ n bũnu yiirɑmmɛ bɑ n sɑ̃ɑmɔ. Bɑ koo kowɑ nɡe kpɑkɑ ye, ye yɑ ǹ mɑɑ ɡɑru koorɔ mi. 11 Nɡe mɛ bɑ rɑ kpɑkɑ sɛ̃ke pɔrɑɔ, nɡe mɛyɑ u rɑɑ Isirelibɑ kɑ Yudɑbɑ kpuro suɑ u tii sɛ̃ke bɑ n kɑ sɑ̃ɑ win tɔmbu, bɑ n win yĩsiru sɔɔwɑ, bɑ n sɑ̃ɑ win burɑru, kpɑ tɔmbɑ n nùn siɑrɑmɔ ben sɔ̃. Adɑmɑ bɑ ǹ win ɡɑri wure. Wi, Yinni Gusunɔwɑ u yeni ɡeruɑ.
Yinni Gusunɔn mɔru
12 Yinni Gusunɔ u nɛ, Yeremi sɔ̃ɔwɑ u nɛɛ, n doo n nɛn tɔmbu Isirelibɑ sɔ̃ mɑ wi, ben Yinni, u ɡeruɑ u nɛɛ, tɑm bwɑ̃ɑrɑ wɑ̃ɑwɑ tɑm sɔ̃. Adɑmɑ bɑ̀ n wisɑ bɑ nɛɛ, bɑ yɛ̃ mɛ, 13 sɑɑ yerɑ kon bu sɔ̃ n nɛɛ, mɛsumɑ wi, Yinni Gusunɔ u ɡeruɑ. U nɛɛ, u koo de win mɔru yu ko nɡe tɑm mɛ mu koo Yerusɑlɛmun tɔmbu kpuro ɡo, kɑ sinɑm be bɑ sɔ̃ Dɑfidin sinɑ ɡɔnɑ sɔɔ, kɑ yɑ̃ku kowobu, kɑ win sɔmɔbu, tem mɛn tɔmbu kpuro ɡesi. 14 Kpɑ bu soonɑ bu kɔsukunɑ, bɑɑbɑ kɑ bii, u ǹ ben ɡoon wɔnwɔndu mɔ̀. Gɑ̃ɑnu mɑɑ sɑri ni nu koo nùn yɔ̃rɑsiɑ sere u kɑ be kpuro ɡo.
Yinni Gusunɔ u tɔmbu
kirɔ mɔ̀ ben tii suɑbun sɔ̃
15 Bɛɛ, Isirelibɑ,
i swɑɑ dɑkio i nɔ, ye nɑ ɡerumɔ.
I ku mɑɑ tii suɑ,
domi Yinni Gusunɔ u kɑ bɛɛ ɡɑri mɔ̀.
16 I Gusunɔ bɛɛn Yinni bɛɛrɛ wɛ̃ɛyɔ
u sere kɑ yɑm wɔ̃kuru nɑ
te tɑ koo de i sokukirɑ ɡuunu wɔllɔ.
Mɛyɑ i yɑm bururɑm mɑrɑ,
ɑdɑmɑ u koo de mu tĩrɑ mɑm mɑm
kpɑ mu ɡɔsiɑ yɑm wɔ̃ku bɑkɑru
nɡe te tɑ wɑ̃ɑ ɡɔribun wɑ̃ɑ yerɔ.
17 Ì kun ɡɑri yi swɑɑ dɑki,
kon dɑ n swĩ bɔkuɔ bɛɛn tii suɑ bin sɔ̃.
Kon nɔni yĩresu yɑri n bɑndɑ.
Domi bɑ koo bɛɛ Yinni Gusunɔn tɔmbu yoru mwɛɛri
bu kɑ dɑ tem tukumɔ.
18 Yinni Gusunɔ u mɑn sɔ̃ɔwɑ u nɛɛ,
n sinɑ boko kɑ win mɛro sɔ̃ɔwɔ n nɛɛ,
bu sinɔ temɔ domi ben sinɑ furɔsu wɔrukɑ
si su sɑ̃ɑ ben burɑru.
19 Wee, wuu si su wɑ̃ɑ sɔ̃ɔ yɛ̃sɑn nɔm dwɑru ɡiɑ Nɛɡɛbuɔ,
sin tɔmbɑ doonɑ kpuro,
mɑ wuu si, su kɛnuɑ.
Goo sɑri wi u koo mɑɑ su kɛniɑ,
domi bɑ sin tɔmbu Yudɑbɑ ɡurɑ kpuro sem
bɑ kɑ doonɑ tem tukumɔ.
Bɑ Yerusɑlɛmun bɛɛrɛ wunɑ
20 Wunɛ Yerusɑlɛmu, ɑ nɔni seeyo ɑ wɑ,
wee, wunɛn yibɛrɛbɑ bɑ wee sɔ̃ɔ yɛ̃sɑn nɔm ɡeu ɡiɑn di.
Mɑnɑ tɔn be nɑ rɑɑ nun nɔmu sɔndiɑ bɑ wɑ̃ɑ,
bèn sɔ̃ ɑ rɑɑ bɛɛrɛ mɔ.
21 Be bɑ rɑɑ nun sokumɔ yinni,
bɑ̀ n nun sɛɛyɑsiɑbu nɑ, mbɑ kɑɑ ɡere.
Sɑɑ ye sɔɔrɑ wuriribu bu koo nun deemɑ
nɡe tɔn kurɔ wi u yiire u kĩ u mɑ.
22 Kɑɑ tii bikiɑ ɡɔ̃ruɔ ɑ nɛɛ, mbɑn sɔ̃nɑ yeni yɑ nun deemɑ.
Wunɛn torɑ dɑbinun sɔ̃nɑ bɑ wunɛn bekuru potɑ kɑ dɑm
bɑ nun sekuru doke.
23 Etiopiɡii u koo kpĩ u win wɑsin ɡɔnɑ kɔsi?
Musuku ɡbeeku ɡɑ koo mɑɑ kpĩ ɡu ɡen sɑnsun bɑusu kɔsi?
Aɑwo.
Nɡe mɛyɑ bɛɛ be i kɔ̃sɑn dɔɔnɛ mɔ,
i ǹ kpɛ̃ i ɡeɑ ko.
24 Yen sɔ̃, kon bɛɛ yɑrinɑsiɑwɑ
nɡe mɛ woo ɡɑ rɑ yɑkɑsu yɑrinɑsie ɡbɑburɔ.
25 Wunɛ, Yerusɑlɛmu,
yèn sɔ̃ ɑ nɛ, Yinni Gusunɔ duɑri,
mɑ ɑ wunɛn nɑɑnɛ doke weesu sɔɔ,
wee ye nɑ nun yiiye.
26 Kon wunɛn bekuru ɡbɑbiɑ
kpɑ bu wunɛn tereru wɑ.
27 Nɑ wɑɑmɔ sɑkɑrɑru kɑ kuuki yi ɑ mɔ̀,
sɑnɑm mɛ ɑ bũnu ɡɑsirimɔ ɑ sɑ̃ɑmɔ ɡuunu wɔllɔ kɑ yɑkɑsɔ.
Yɑ sɑ̃ɑwɑ ɡɑ̃ɑ kɔ̃sunu nɛn nɔni sɔɔ.
Yen sɔ̃, wunɛ Yerusɑlɛmu, kɑɑ kɑm ko ɑ̀ kun tii dɛɛrɑsie.
Sɑɑ yerɑ̀ ɑ mɑrɑ, ɑ kɑ tii dɛɛrɑsiɑ.
Nim ɡɔ̃ɔ bɑkɑru