23
1-2 Gusunɔ Isirelibɑn Yinni u nɛɛ, bɔ̃rurobɑ kpɑro be bɑ nɛn tɔmbu ɡoomɔ, mɑ bɑ bu yɑrinɑsiɑmɔ nɡe yɑ̃ɑ kpɑro kɔ̃sobu. Nɑ mɑɑ nɛɛ, wee bɑ nɛn tɔmbu ɡirɑ, bɑ bu yɑrinɑsiɑ bɑ yinɑ bu bu nɔɔri. Yen sɔ̃, kon bu sɛɛyɑsiɑ ben nuku kɔ̃su ten sɑɑbu.
3 Kpɑ n nɛn tɔn be bɑ tie mwɛɛrimɑ tem kpuron di, mi nɑ rɑɑ derɑ bɑ yɑrinɛ, n kɑ bu wurɑmɑ ben temɔ, kpɑ bu mɑrurɑ bu dɑbiɑ. 4 Nɛ, Yinni Gusunɔ kon bu kpɑro kpɑobu wɛ̃ be bɑ koo bu kpɑrɑ. Bɑ ǹ mɑɑ nɑndɑmɔ bɛrum sɔ̃. Bɑɑ ben turo kun mɑɑ biɑrɑmɔ.
5 Wee sɑɑ yɑ sisi
yè sɔɔ kon ɡemɡii ɡoo seeyɑ Dɑfidin bweserun di
nɡe dɑ̃ɑ kpii pɔturɑ,
kpɑ u n bɑndu dii kɑ bɑɑdommɑɔ.
U koo tɔn be kpɑrɑwɑ kɑ bwisi ɡee.
Kpɑ u ɡem sɔ̃ɔsi tem mɛ sɔɔ.
6 Win wɑɑti ye sɔɔ,
Yudɑbɑ bɑ koo fɑɑbɑ wɑ.
Kpɑ u de Isirelibɑ bɑ n wɑ̃ɑ bɔri yɛndu sɔɔ.
Kpɑ bɑ n nùn sokumɔ bɑ n mɔ̀,
Yinni Gusunɔwɑ u sɑ̃ɑ ben fɑɑbɑ kowo.
7 Yen sɔ̃nɑ nɑ nɛɛ, wee sɑɑ yɑ mɑɑ sisi yè sɔɔ bɑ ǹ mɑɑ bɔ̃rumɔ bu nɛɛ, kɑ Yinni Gusunɔn wɑ̃ɑru wi u bu yɑrɑmɑ sɑɑ Eɡibitin tem di. 8 Adɑmɑ bɑ ko n dɑ ɡerewɑ bu nɛɛ, kɑ Yinni Gusunɔn wɑ̃ɑru wi u bu yɑrinɑsiɑ sɔ̃ɔ yɛ̃sɑn nɔm ɡeu ɡiɑ kɑ wusu ɡɑsu sɔɔ, mɑ u mɑɑ kɑ bu wurɑmɑ min di, bu kɑ sinɑ ben temɔ.
Gɑri yi Yeremi
u sɔmɔ weesuɡibu sɔ̃ɔwɑ
9 Ǹ n sɔmɔbun sɔ̃n nɑ,
nɛn ɡɔ̃ru ɡɑ sɑnkirɑ too,
mɑ nɑ diirimɔ sere kɑ nɛn kukunɔ.
Nɑ sɑ̃ɑ nɡe wi tɑm mu ɡoomɔ
Yinni Gusunɔ kɑ win ɡɑri dɛɛrin sɔ̃,
yi u mɑn sɔ̃ɔwɑ u nɛɛ,
10 tɔmbɑ yibɑ tem mɛ sɔɔ,
be bɑ sɑkɑrɑru mɔ̀.
Kɔ̃sɑ bɑ nɑɑ ɡire.
Miyɑ ben dɑm mu wɑ̃ɑ.
Yen sɔ̃nɑ tem mɛ, mu sɑnkire,
mɑ mɛn kpɑrɑ yee ni nu wɑ̃ɑ ɡbɑburun berɑ ɡiɑ nu ɡberɑ.
Domi u mu bɔ̃rusi.
11 Gusunɔn sɔmɔbu kɑ yɑ̃ku kowobu bɑ sɑnkire,
u wɑ mɑ bɑ nuku kɔ̃su kom mɔ̀
sere kɑ win sɑ̃ɑ yerɔ.
12 Yen sɔ̃nɑ ben swɑɑ yɑ koo wɔriɑ,
kpɑ yu bu yɑm tĩre.
U koo de bu bu bɔriɑ,
kpɑ bu wɔruku sɑɑ ye u koo bu sɛɛyɑsiɑ
u de wɑhɑlɑ yu bu deemɑ.
Wi, Yinni Gusunɔwɑ u yeni ɡeruɑ.
Yudɑn Gusunɔn sɔmɔbun
kɔ̃sɑn kpɑ̃ɑru
13 Yinni Gusunɔ u nɛɛ,
kɔ̃sɑ ye nɑ wɑ nɛn sɔmɔbu bɑ mɔ̀ Sɑmɑriɔ,
yɑ ǹ kɑ nɔɔ ɡerurɔ.
Domi bũu wi bɑ mɔ̀ Bɑɑlin yĩsirɑ bɑ kɑ ɡɑri mɔ̀.
Mɑ bɑ nɛn tɔmbu Isirelibɑ ɡɛrɑsiɑ nɛn swɑɑn di.
14 Adɑmɑ kom kɔ̃sum mɛ nɑ wɑ Gusunɔn sɔmɔbun suunu sɔɔ Yerusɑlɛmuɔ,
mu beɔnɔɡim kere.
Bɑ sɑ̃ɑwɑ sɑkɑrɑ kowobu,
mɑ bɑ weesu mɔ̀,
bɑ tɔn kɔ̃sobu dɑm kɛ̃mɔ bu ku kɑ ben kom kɔ̃sum deri,
mɑ nɑ be kpuro ɡɑrisi nɡe Sodomu kɑ Gomɔrɑn tɔmbu.
15 Yen sɔ̃nɑ nɛ Gusunɔ, wɔllu kɑ tem Yinni,
nɑ nɛn sɔmɔbu Yerusɑlɛmuɔ sɔ̃ɔmɔ
mɑ wee kon de bu dɑ̃ɑ kiku ɡɑɡu *dɑ̃ɑ kiku ɡɑɡu - A mɛɛrio 9:14. ɡe ɡɑ sosu di,
kpɑ bu nim mɛ mu dɛ̃ɛ mɔ nɔ.
Domi beyɑ bɑ derɑ tem mɛn tɔmbu kpuro bɑ ǹ mɑɑ mɑn bɛɛrɛ wɛ̃ɛmɔ.
Sɔmɔ weesuɡibu
16 Amɛniwɑ nɛ Gusunɔ, wɔllu kɑ tem Yinni nɑ ɡeruɑ. Nɑ nɛɛ,
i ku mɑɑ nɛn sɔmɔ ben ɡɑri swɑɑ dɑki.
Domi bɑ derɑ i yĩiyɔ ye i ǹ wɑsi.
Ben tiin ɡɔ̃run bwisikunɑ bɑ ɡerumɔ,
n ǹ mɔ yi yi wee nɛn nɔɔn di.
17 Bɑ rɑ mɑm be bɑ mɑn ɡɛmɑ sɔ̃ bu nɛɛ,
nɑ be ɡeruɑ nɑ nɛɛ,
bɑ koo bɔri yɛndu wɑ.
Kpɑ bɑ n be bɑ ben tii tiin ɡɔ̃ru kĩru mɔ̀ sɔ̃ɔmɔ bɑ n mɔ̀,
bɑ ǹ kɔ̃sɑ ɡɑɑ wɑsi.
18 Yeremi u nɛɛ,
ben wɑrɑ u kɑ Yinni Gusunɔ wesiɑnɑ.
Nɡe ben wɑrɑ u win ɡɑri nuɑ u yi lɑɑkɑri kuɑ.
19 Wee Yinni Gusunɔn mɔru yɑ koo nɑ nɡe ɡuru woo bɔkɔ
kpɑ yu tɔn kɔ̃sobu wɔri.
20 Win mɔru ye, yɑ ǹ suremɔ,
mɑ n kun mɔ u win himbɑ yibiɑ.
Amɛn biru, yɑ koo bɛɛ nɛn tɔmbu yeeri.
21 Yinni Gusunɔ u nɛɛ,
sɔmɔ be, bɑ duki dɑ, bɑɑ mɛ nɑ ǹ bu ɡɔre.
Bɑ mɑɑ ɡɑri ɡeruɑ, bɑɑ mɛ nɑ ǹ kɑ bu ɡɑri kue.
22 Bɑ̀ n dɑɑ nɛn ɡɑri swɑɑ dɑki,
nɛn ɡɑriyɑ bɑ koo rɑɑ kpɑrɑ nɛn tɔmbun suunu sɔɔ.
Kpɑ bu wɑ bu ɡɔ̃ru ɡɔsiɑ bu ben kom kɔ̃sum deri.
Yinni Gusunɔ
u wɑ̃ɑ yɑm kpuro
23 Nɛ Gusunɔ, nɑ wɑ̃ɑwɑ yɑm kpuro,
turuku kɑ tontondeɔ.
24 Goo u koo kpĩ u kuke nɑ kun nùn wɑ?
Nɑ wɑ̃ɑwɑ yɑm kpuro, wɔllɔ kɑ temɔ.
Mbɑ yɑkɑsu kɑ dobi
yi mɔɔsinɛ
25 Nɑ nɔɔmɔ ye sɔmɔbu bɑ ɡerumɔ. Be bɑ ɡɑri weesuɡii mɔ̀ kɑ nɛn yĩsiru bɑ mɔ̀, nɑ kɑ bu ɡɑri kuɑ dosu sɔɔ, 26 sere sɑɑ yerɑ̀ sɔmɔ beni bɑ ko n ɡɑri weesuɡii mɔ̀, kpɑ bɑ n nɛn tɔmbu nɔni wɔ̃kumɔ kɑ ben ɡɔ̃run ɡɑri. 27 Bɑ kĩwɑ ben dosu weesuɡisun ɡɑri yi de nɛn tɔmbu bu nɛn yĩsiru duɑri nɡe mɛ ben bɑɑbɑbɑ bɑ rɑɑ mɑn duɑri bũu wi bɑ mɔ̀ Bɑɑlin sɔ̃. 28 Sɔmɔ wi u dosɑ u ɡeruo mɑ u dosɑ. Wi nɑ mɑɑ kɑ ɡɑri kuɑ u yi tusio dee dee.
Nɛ, Yinni Gusunɔ nɑ nɛɛ,
mbɑ yɑkɑsu kɑ dobi yi mɔɔsinɛ.
29 Nɛn ɡɑri kun sɑ̃ɑ nɡe dɔ̃ɔ ro?
Yi ǹ sɑ̃ɑ nɡe mɑtɑlɑkɑ ye yɑ rɑ kperu kɔre ro?
30 Yen sɔ̃nɑ nɛ, Yinni Gusunɔ, kon sɔmɔ be sɛɛyɑsiɑ, be, be bɑ ben winsim ɡɑri suɑmɔ bɑ kɑ ɡɑri weesuɡii mɔ̀. 31 Kon bu sɛɛyɑsiɑ be bɑ ben tii tiin ɡɑri suɑmɔ bɑ ɡerumɔ kɑ nɛn yĩsiru. 32 Kon bu sɛɛyɑsiɑ be bɑ ben dosu weesuɡisu tɔmbu sɔ̃ɔmɔ. Mɑ bɑ derɑ nɛn tɔmbɑ kɔ̃ɔrɑmɔ ben wee si kɑ ben tɔn biɑrun sɔ̃. Nɑ ǹ bu ɡɔre, nɑ ǹ mɑɑ bu woodɑ wɛ̃. Mɛyɑ bɑ ǹ mɑɑ ɑrufɑɑni ɡɑɑ mɔ tɔn ben suunu sɔɔ.
Yinni Gusunɔn ɡɑri
yi sɑ̃ɑwɑ sɔmunu
33 Yinni Gusunɔ u Yeremi sɔ̃ɔwɑ u nɛɛ, tɔn ben ɡoo, ǹ kun mɛ nɛn sɔmɔ ɡoo, ǹ kun mɛ yɑ̃ku kowo ɡoo ù n nun bikiɑ u nɛɛ, mbɑ nɛ, Yinni Gusunɔ nɑ ɡeruɑ, sɔmu nirɑ̀ nɑ bu sɔbi, kɑɑ nùn wisiwɑ ɑ nɛɛ, berɑ bɑ sɑ̃ɑ nɛn sɔmunu. Adɑmɑ kon bu biru kisi. 34 Ben wi u ɡesi nɔɔ wukiɑ u nɛɛ, nɛ, Yinni Gusunɔ nɑ bu sɔmunu sɔbi, kon yɛ̃ro sɛɛyɑsiɑwɑ wi kɑ win yɛnuɡibu. 35 Ye bɑɑwure u koo kpĩ u win winsim bikiɑ, yerɑ, u nɛɛ, mbɑ Yinni Gusunɔ u ɡeruɑ, mbɑ u wisɑ. 36 Adɑmɑ bu ku rɑɑ mɑɑ ɡere bu nɛɛ, nɑ bu sɔmunu sɔbi. Wi u ye ɡeruɑ, win ɡɑri koo wɔri win tii sɔɔ. Domi bɑ nɛn ɡɑri tɛmɑmɔwɑ nɛ wi nɑ sɑ̃ɑ ben Yinni wi u rɑ n wɑ̃ɑ, u dɑm kpuro mɔ. 37 Kɑɑ mɑɑ sɔmɔ be bikiɑ ɑ nɛɛ, mbɑ nɛ, Yinni Gusunɔ nɑ bu sɔ̃ɔwɑ. Mbɑ nɑ bu wisɑ. 38 Bɑ̀ n mɑɑ nun wisɑ bɑ nɛɛ, nɛ, Yinni Gusunɔ nɑ bu sɔmunu sɔbi, bɑɑ mɛ nɑ nɛɛ, bu ku mɑɑ yen ɡɑri ko, ɑ bu wisio ɑ nɛɛ, ɑmɛniwɑ nɛ, Yinni Gusunɔ nɑ ɡeruɑ. Nɑ nɛɛ, 39 kon bu biru kisi kpɑ n bu duɑri, be kɑ ben wuu ɡe nɑ rɑɑ be kɑ ben bɑɑbɑbɑ wɛ̃. 40 Kon mɑɑ bu seku bɑkɑru doke te tɑ ǹ duɑrirɔ sere kɑ bɑɑdommɑɔ. Kpɑ bɑ kun mɑɑ bɛɛrɛ mɔ tɔmbun nɔni sɔɔ.
Fiɡie bii
ni nu wɑ̃ɑ birenu yiru sɔɔn ɡɑri