Yinni Gusunɔ, be bɑ mɑn wɔrim wee,

ɑ bu wɔrio.

Be bɑ kɑ mɑn sɑnnɑmɔ, ɑ kɑ bu sɑnnɔ.

2 A tɛrɛ piibu kɑ bɑkɑru suo,

kpɑ ɑ nɑ ɑ mɑn somi.

3 A wunɛn yɑɑsɑ suo ɑ be bɑ mɑn nɔni sɔ̃ɔmɔ sɔ̃ɔsi,

kpɑ nɑ n yɛ̃ mɑ wunɑ ɑ sɑ̃ɑ nɛn fɑɑbɑ kowo.

4 A de be bɑ mɑn kɑsu bu ɡo bu sekuru wɑ.

A de be bɑ kĩ n kɑm ko bu biti soorɑ

kpɑ bu biru wurɑ.

5 A de bɑ n sɑ̃ɑ nɡe yɑkɑ si woo ɡɑ kɑ doonɔ,

kpɑ Yinni Gusunɔn ɡɔrɑdo u bu ɡirɑ.

6 A de ben swɑɑ yu wɔriɑ,

kpɑ yɑm wɔ̃kuru tu ye wukiri.

Kpɑ Yinni Gusunɔn ɡɔrɑdo u bu nɑɑ swĩi.

7 Wee nɑ ǹ ɡɑ̃ɑnu kue bɑ kɑ mɑn suurɑ bɛriɑmmɛ.

8 A de bu kɑm ko subɑru sɔɔ,

bu wɔri ben suurɑ ye sɔɔ, bu ɡbi.

9 Kpɑ nɑ n nuku dobu mɔ̀ wunɛn sɔ̃ Yinni Gusunɔ,

fɑɑbɑ ye ɑ mɑn kuɑn sɔ̃.

10 Kpɑ sɑɑ nɛn ɡɔ̃ru sɔɔn di, n nɛɛ,

ɡoo sɑri wi u dɑm mɔ nɡe wunɛ.

Domi ɑ nɛ wɔnwɔndo yɑrɑ

sɑɑ wi u mɑn dɑm keren nɔmɑn di.

11 Wee, wee kowobu bɑ seewɑ bɑ mɑn ɡɑri mɑnimɔ yi nɑ ǹ yɛ̃.

12 Nɑ̀ n bu ɡeɑ kuɑ, kɔ̃sɑ bɑ rɑ mɑn kɔsie,

kpɑ bu mɑn deri nɛ turo.

13 Adɑmɑ sɑnɑm mɛ nɛn yibɛrɛ be, bɑ bɑrɔ,

nɑ sɑɑkin yɑberu sebuɑ nuku sɑnkirɑrun sɔ̃.

Mɑ nɑ tii tɔ̃yɑ mɔ̀ kɑ nɔɔ bɔkuru.

Nɑ rɑ n yiirewɑ nɑ n kɑnɑru mɔ̀,

14 nɑ n sɑ̃ɑ nɡe ben kpɑɑsi, ǹ kun mɛ nɡe ben mɛro bisi.

Nɑ nuki sɑnkire nɡe wi u win mɛro biɑ.

15 Adɑmɑ be, bɑ rɑ mɛnnɛwɑ bu nuku dobu ko,

sɑnɑm mɛ nɑ sokurɑ.

Bɑ rɑ mɛnnɛwɑ nɛn biru bu kɑ mɑn kɔ̃sɑ bwisikusi,

kpɑ bɑ n mɑn yɑɑ kɑsikimɔ bɑɑdommɑ.

16 Bɑɑ kɑ be bɑ ǹ Gusunɔ yɛ̃ bɑ mɑn yɛ̃ɛmɔwɑ.

Bɑ mɑn kɔ̃rusi, bɑ nɔɔ dɔnnɛ ɡbɑm ɡbɑm.

17 Yinni, sere dommɑ kɑɑ n yenibɑ mɛɛrɑ.

A ku de bu mɑn wɔri,

domi bɑ sɑ̃ɑwɑ nɡe ɡbee sinɑ kpɛnsu.

18 Wunɑ kon siɑrɑ mi wunɛn tɔmbɑ mɛnnɛ,

kpɑ n nun bɛɛrɛ wɛ̃ tɔn dɑbinun suunu sɔɔ.

19 A ku de be bɑ sɑ̃ɑ nɛn yibɛrɛbɑ bɑ n mɑn yɛ̃ɛmɔ kɑm sɔɔ,

kpɑ be bɑ mɑn tusɑ kɑm sɔɔ bɑ n mɑn wɔmmɔ kɑ ɡɔnibu.

20 Domi ben ɡɑri ɡerubu kun do.

Kɔ̃sɑ bɑ rɑ n tɔmbu mɑnimɔ,

be bɑ wɑ̃ɑ bɔri yɛndu sɔɔ tem mɛ sɔɔ.

21 Bɑ rɑ n mɑn nɔɔ ɡɛ̃ɛwɑ bɑ n mɔ̀, bɑ mɑn wɑ.

22 Yinni Gusunɔ, wunɑ ɑ ye kpuro wɑɑmɔ.

Yen sɔ̃, ɑ ku nɔɔ mɑri,

ɑ ku mɑɑ kɑ mɑn tondɑ.

23 Gusunɔ, nɛn Yinni, ɑ seewo ɑ mɑn siriɑ.

A kɑ mɑn yinɔ.

24 Gusunɔ nɛn Yinni, ɑ sɑ̃ɑwɑ ɡemɡii, ɑ mɑn sirio,

kpɑ bu ku rɑɑ mɑɑ nuku dobu ko nɛn sɔ̃,

25 bu ɡere ben ɡɔ̃ruɔ bu nɛɛ,

wee, ye bɑ kĩ, yɑ koorɑ, bɑ mɑn kɑmiɑ.

26 A de be, be bɑ nuku dobu mɔ̀ nɛn wɑhɑlɑn sɔ̃,

be kpuro bu sekuru wɑ sɑnnu sɑnnu.

A de be, be bɑ mɑn seesimɔ,

bu sekuru wɑ tɑ n kpɑ̃.

27 Adɑmɑ ɑ de be bɑ nuku dobu mɔ nɛn tɑɑrɛ sɑrirun sɔ̃ bu yɛ̃ɛri,

kpɑ bɑ n wunɛ Yinni Gusunɔ siɑrɑmɔ bɑɑdommɑ,

wunɛ, wi ɑ kĩ nɛ, wunɛn sɔm kowo nɑ n wɑ̃ɑ bɔri yɛndu sɔɔ.

28 Yinni, nɑ kon wunɛn ɡem ɡɑri kpɑrɑ.

Kon mɑɑ nun tɔmɑ bɑɑdommɑ.