36
1 Womu ɡe Dɑfidi Gusunɔn sɔm kowo u wom kowobun wiruɡii kuɑ. U nɛɛ,
2 tɔn kɔ̃so wi u ǹ kɑ Gusunɔ yɔ̃n ɡɑri mɑn sɔkumɔ nɛn ɡɔ̃ruɔ,
domi u ǹ bwisikumɔ mɑ n weenɛ u Gusunɔ nɑsiɑ.
3 U win tii sue too.
Yen sɔ̃nɑ u ǹ win torɑru wurɑmɔ,
kpɑ u tu tusi.
4 Win ɡɑri kpuro, weesɑ yi sɑ̃ɑ.
U ku rɑ wure u ɡɑ̃ɑnu ko kɑ lɑɑkɑri u sere ɡeɑ ko.
5 Kɔ̃sɑ u rɑ n bwisikumɔ win kpin yerɔ.
Yen swɑɑ sɔɔrɑ u rɑ n mɑɑ wɑ̃ɑ.
U ku rɑ ye dukɑ suuri.
6 Adɑmɑ Yinni Gusunɔ, wunɛn durom mu wɑ̃ɑwɑ sere kɑ wɔllɔ.
Wunɛn bɔrɔkiniru tɑ mɑɑ sɔ̃ɔsire sere kɑ ɡuru winɔ.
7 Mɛyɑ mɑɑ wunɛn ɡem mu kpɑ̃ nɡe ɡuu bɑkɑnu.
Wunɛn siribu bu duku nɡe nim wɔ̃kun bweru.
Yinni Gusunɔ, wunɑ ɑ rɑ tɔmbu kɑ yɛɛ nɔɔri,
8 domi wunɛn kĩru tɑ kpɑ̃.
Wunɛn kɑsenun kɔkɔrɔwɑ tɔmbɑ kuku yenu kɑsu.
9 A rɑ wunɛn durom yibie nɡe be bɑ di bɑ debɑ.
A rɑ bu nuku dobu wɛ̃ nɡe be bɑ nim ɡem wɑ bɑ nɔrɑ.
10 Domi wunɑ ɑ sɑ̃ɑ wɑ̃ɑrun nuuru.
Wunɛn yɑm bururɑm sɑɑbuwɑ sɑ kɑ wɑ̃ɑrun ɑsɑnsi tubumɔ.
11 A be bɑ nun yɛ̃ durom kuo.
A bèn ɡɔ̃ru ɡɑ dɛɛre bɔrɔkiniru sɔ̃ɔsio.
12 A ku de tii suobu bu mɑn nɑɑ turi,
kpɑ tɔn kɔ̃sobu bu de n dukɑ yɑkurɑ.
13 Wee be bɑ kɔ̃sɑ mɔ̀, bɑ wɔrukumɔ,
mɑ bɑ kpɑnɛ bu se.