Geemɑ, Gusunɔ u sɑ̃ɑwɑ tɔn ɡeo Isirelibɑn sɔ̃ kɑ mɑɑ bèn ɡɔ̃rusu dɛɛre.

2 Nɑ rɑɑ wɔrumɑɑ dɔɔ, n tie fiiko n kɑ tem turi.

3 Domi nɑ rɑɑ kɑ ɡɑri bɑkɑsu nisinu kuɑ

yèn sɔ̃ nɑ wɑɑmɔ tɔn kɔ̃sobu bɑ nuku dobu mɔ̀.

4 Gɑ̃ɑnu ɡɑnu kun bu nɔni sɔ̃ɔmɔ ben wɑ̃ɑrun tɔ̃ru kpuro sɔɔ.

Mɛyɑ ben wɑsi yi bwɑ̃ɑ do mɑ yi bɑllimɔ.

5 Bɑ ǹ duniɑn wɑ̃ɑrun wɑhɑlɑ ɡɑɑ yɛ̃.

Mɛyɑ bɑ ǹ mɑɑ yɛ̃ nɔni swɑ̃ɑ te tɔn be bɑ tie bɑ kɑ wɑ̃ɑ.

6 Bɑ tii suɑbu sebuɑ nɡe sɑbɑ ye bɑ rɑ sebe wĩirɔ.

Mɑ bɑ dɑɑ bɔɔbɔyɑ sebuɑ nɡe yɑberu.

7 Ben nuku kɔ̃surun kom mu yɑrimɔ sɑɑ ben nukurun di,

mɑ ben ɡɔ̃run bwisikunu nu sɔ̃ɔsirɑmɔ tɔɔwɔ.

8 Bɑ rɑ n tɔnu yɛ̃ɛmɔwɑ bɑ n mɔ̀,

bɑ koo nùn dɑm dɔre kɑ nuku kɔ̃suru.

Kpɑ bɑ n tii suɑ ɡɑri ɡerumɔ,

9 bɑ n Gusunɔ wɔllu wɔmmɔ.

Mɛyɑ mɑɑ ben yɑrɑ ku rɑ ɡoo deri hɑnduniɑ mi.

10 Yen sɔ̃nɑ tɔmbu kpuro bɑ wurɑmɔ ben mi ɡiɑ.

Mɑ bɑ ben ɡɑri nɔrumɔ nɡe nim,

11 bɑ mɔ̀, Gusunɔ kun ɡɑ̃ɑnu yɛ̃.

Wi, Wɔrukoo, u ǹ yɛ̃ru mɔ.

12 Nɡe mɛyɑ tɔn kɔ̃sobun wɑ̃ɑrɑ sɑ̃ɑ.

Bɑ ku rɑ n wurure. Bɑ rɑ n ben dukiɑ kuurɑsiɑmɔwɑ.

13 Mɑ nɑ tii sɔ̃ɔwɑ nɑ nɛɛ, ǹ n mɛn nɑ,

kɑm sɔɔrɑ nɑ nɛn ɡɔ̃ru dɛɛrɑsiɑ,

mɑ nɑ niɑ n kɑ sɔ̃ɔsi mɑ nɑ dɛɛre.

14 Yinni, tɔ̃ru bɑɑtere ɑ rɑ mɑn sɛɛyɑsiewɑ,

kpɑ ɑ mɑn nɔni sɔ̃ bururu bɑɑtere.

15 Nɑ̀ n nɛɛ, kon ko nɡe tɔn kɔ̃so be,

ko nɑ n kĩ n nɛn bweseru siki te ɑ ɡɔsɑ.

16 Ye nɑ ɡɑri yin ɑsɑnsi kɑsu n kɑ yi tubu,

mɑ nɑ wɑ yi mɑn sɛ̃sie too.

17 Adɑmɑ dɔmɑ te nɑ duɑ wunɛ Gusunɔn sɑ̃ɑ yerɔ,

sɑɑ yerɑ nɑ ɡiɑ ye yɑ tɔn kɔ̃sobu mɑrɑ.

18 Geemɑ, Yinni Gusunɔ, ɑ bu surewɑ

swɑɑ yè sɔɔ bɑ koo sɛllɑ,

kpɑ bu wɔrumɑ bu ɡbi.

19 Kɑɑ de bu kɑm ko mii mii,

kpɑ ben wɑ̃ɑru tu nɔru ko subɑru sɔɔ.

20 Yinni, ɑ rɑ bu kpeerɑsiewɑ,

kpɑ bu ben ɡɑri duɑri

nɡe mɛ tɔnu u rɑ dosu duɑri.

21 Ye nɛn ɡɔ̃ru ɡɑ sɑnkirɑ,

n sɑ̃ɑwɑ nɡe ɡɑ̃ɑnu sɔkɑ nɛn nukurɔ.

22 Mɑ nɑ kuɑ nɡe ɡɑri bɔkɔ,

nɑ ǹ ɡɑ̃ɑnu tubɑ nɡe ɡbeeku yɑɑ.

23 Adɑmɑ kɑ mɛ, nɑ wɑ̃ɑ kɑ wunɛ.

Mɑ ɑ mɑn mwɑ kɑ wunɛn nɔm ɡeu.

24 Kɑɑ mɑn kpɑrɑ kɑ wunɛn bwisi.

Yen biru, kɑɑ mɑn mwɑ wunɛn yiiko sɔɔ.

25 Wɑrɑ nɑ mɔ wɔllɔ, wunɛ bɑɑsi.

Mɛyɑ nɑ ǹ mɑɑ ɡoo yĩiyɔ hɑnduniɑ yeni sɔɔ.

26 Nɛn wɑsi kɑ nɛn bwisikunu kpuro koo doonɑ.

Adɑmɑ wunɛ Yinni Gusunɔ, wunɑ ɑ rɑ mɑn dɑm kɛ̃.

A sɑ̃ɑwɑ nɛn dukiɑ sere kɑ bɑɑdommɑɔ.

27 Wee be bɑ kɑ nun tondɑ bɑ ɡbimɔ.

Mɛyɑ ɑ be bɑ nun deri ɡo.

28 Adɑmɑ nɛ, n mɑn wɛ̃re nɑ n wɑ̃ɑ wunɛn bɔkuɔ Yinni Gusunɔ.

Domi nɑ kuku yee nɑɑnɛɡiru wɑ wunɛ sɔɔ.

Kon kpɑrɑ ye ɑ mɑn kuɑ kpuro.