Gusunɔ, mbɑn sɔ̃nɑ ɑ sun yinɑ.

Mbɑn sɔ̃nɑ ɑ kɑ sun mɔru mɔ̀

bɛsɛ be ɑ kpɑre nɡe yɑ̃ɑ ɡɔ̃ɔ.

2 A bɛsɛ wunɛn tɔmbu yɑɑyo,

bɛsɛ be ɑ yɑkiɑ sɑɑ yellun di.

A bɛsɛn bwese kɛri yɑɑyo

yi yi kuɑ wunɛɡii.

A Siɔnin ɡuu te yɑɑyo

tèn mi wunɛn wɑ̃ɑ yerɑ rɑɑ wɑ̃ɑ.

3 A doo ɑ wɑ nɡe mɛ yɑm mi, n bɑnsu kuɑ mɑm mɑm.

Yibɛrɛbɑ bɑ ɡɑ̃ɑnu kpuro sɑnkɑ sɑ̃ɑ yee te sɔɔ.

4 Wunɛn yibɛrɛbɑ bɑ kukurɑ sɑ̃ɑ yeru mi nɡe ɡbee sinɑnsu

mɑ bɑ ben ɡidi bɔrɑ ɡirɑ mi.

5 Bɑ sɑ̃ɑre nɡe dɑ̃ɑ buro be bɑ ɡbɑ̃ɑ yiiyɑmɔ dɑ̃ɑ sɔ̃ɔwɔ.

6 Mɑ bɑ sɑ̃ɑ yee ten burɑ yɑ̃nu kpuro kɔsukɑ kɑ ɡbɛ̃ɛ kɑ mɑtɑlɑkɑ.

7 Bɑ wunɛn sɑ̃ɑ yee te dɔ̃ɔ mɛni.

Bɑ tu disi doke te, te tɑ wunɛn yĩsiru sɔɔwɑ.

8 Mɑ bɑ ɡerumɔ ben ɡɔ̃ruɔ bɑ mɔ̀, su bu nɔni sɔ̃ kɑ dɑm.

Mɑ bɑ bɛsɛn sɑ̃ɑ yenu kpuro dɔ̃ɔ mɛni tem mɛ sɔɔ.

9 Yinni, sɑ ǹ mɑɑ yĩreru ɡɑru wɑɑmɔ

te tɑ sun sɔ̃ɔsimɔ mɑ ɑ wɑ̃ɑ bɛsɛn suunu sɔɔ.

Wunɛn sɔmɔbu bɑ ǹ mɑɑ wɑ̃ɑ.

Bɛsɛn ɡoo kun mɑɑ yɛ̃ sere sɑɑ yerɑ̀ kɑɑ n sun deri mɛ.

10 Sere sɑɑ yerɑ̀ kɑɑ n mɑrɑ

yibɛrɛ u n nun nɔɔ kuurimɔ.

Sere sɑɑ yerɑ̀ kɑɑ n nɔɔ mɑɑri

yibɛrɛ u n wunɛn yĩsiru kɑm mɛɛrɑ.

11 Mbɑn sɔ̃nɑ ɑ wunɛn nɔmu kuruɑ.

A ɡu dɛmiɔ kpɑ ɑ bu kɑm koosiɑ.

12 Gusunɔ, sɑɑ yellun di wunɑ ɑ sɑ̃ɑ nɛn sunɔ.

Wunɑ ɑ sun fɑɑbɑ kuɑ nɔn dɑbinu.

13 Wunɑ ɑ nim wɔ̃ku burɑnɑ kɑ wunɛn dɑm

mɑ ɑ yɛɛ ɡɔbi wiru kɔsukɑ.

14 Wunɑ ɑ kɑrɑku wiru kɔrɑ,

mɑ ɑ derɑ be bɑ wɑ̃ɑ mi ɡɑ̃ɑnu ku rɑ kpi bɑ ɡu temɑ.

15 A derɑ bwiɑ kɑ dɑɑrɑ yɑrɑ,

mɑ ɑ dɑɑnu ɡberɑsiɑ ni nu ku rɑ nim kpe.

16 Wunɑ ɑ wɔ̃kuru kɑ sɔ̃ɔ sɔɔ kuɑ.

Wunɑ ɑ yɑm bururɑm kɑ sɔ̃ɔ kuɑ.

17 Mɑ ɑ tem nɔɔ burɑ yenu kuɑ.

Mɑ ɑ yɑm susuru kɑ purɑn sɑɑbɑ yi.

18 Yinni Gusunɔ, ɑ yɑɑyo mɑ yibɛrɛ u nun yɛ̃ɛmɔ.

Bwese te tɑ ǹ bwisi mɔ, tɑ wunɛn yĩsiru ɡɛmɑ.

19 A ku wunɛn tɔn be ɑ kĩ mi ɡbeeku yɛɛ deriɑ.

A ku bu duɑri be, be bɑ sɑ̃ɑ wɔnwɔndobu.

20 A wunɛn ɑrukɑwɑni yɑɑyo.

Domi dɑm diobu bɑ yibɑ bɑ kukuɑ mi bɑ ǹ bu wɑsi tem mɛ sɔɔ.

21 A ku de wi bɑ dɑm dɔre u sekuru wɑ.

A de wɔnwɔndo kɑ sɑ̃ɑro bu nun siɑrɑ.

22 Yinni Gusunɔ, ɑ seewo ɑ kɑ tii yinɑ.

A yɑɑyo wɔmɑ ye ɡɑri bɑkɑsu rɑ n nun mɔ̀.

23 A ku wunɛn yibɛrɛbɑn wɔkinu duɑri.

A be bɑ nun seesimɔ bɑɑdommɑn wɔkinu nɔɔwɔ.