1 I Yinni Gusunɔ siɑro. I win yĩsiru sokuo.

I win ɡeɑ ye u kuɑ kpɑro.

2 I nùn womu kuo.

I win sɔm mɑɑmɑɑkiɡinu kpɑro.

3 I nuki doro wi, Yinni Gusunɔn yĩsi dɛɛrɑrun sɔ̃.

Be bɑ nùn kɑsu bu nukuru doro.

4 I Yinni Gusunɔn dɑm kɑsuo.

I kɑsuo i n kɑ nùn wɑ̃ɑ.

5-6 Bɛɛ Aburɑhɑmu Gusunɔn sɔm kowon bweseru,

bɛɛ Yɑkɔbun bweseru, bɛɛ be u ɡɔsɑ,

i win sɔm mɑɑmɑɑkiɡii ni yɑɑyo.

I siribu yɑɑyo bi u bɛɛ kuɑ.

7 Wiyɑ Gusunɔ bɛsɛn Yinni wi u koo hɑnduniɑ kpuro siriɑ.

8 U ku rɑ win ɑrukɑwɑni ye u kɑ tɔmbu bɔkuɑ duɑri sere kɑ bɑɑdommɑɔ.

U rɑ n ye yɑɑyewɑ sere kɑ ben bibun bibun wɑɑtiɔ.

9 Arukɑwɑni yerɑ u kɑ Aburɑhɑmu kɑ Isɑki bɔkuɑ.

10 U kɑ Yɑkɔbu wi bɑ mɔ̀ Isireli ɑrukɑwɑni ye bɔkuɑ

ye yɑ ko n wɑ̃ɑ sere kɑ bɑɑdommɑɔ.

11 U nɛɛ, kon nun Kɑnɑnin tem wɛ̃.

Mɛyɑ mu ko n sɑ̃ɑ wunɛn tubi wunɛ kɑ wunɛn bibun bweseru.

12 Sɑɑ ye sɔɔ, bɑ ǹ dɑbi. Bɑ sɑ̃ɑwɑ sɔbu mi.

13 Bɑ rɑ n bɔsuwɑ tem kɑ tem sɔɔ.

Bɑ̀ n dɑ bwese tenin mi, bu wurɑ teɔnɔn mi.

14 Adɑmɑ Gusunɔ kun dere bweseru ɡɑru tu bu dɑm dɔre.

U sinɑmbu sɛɛyɑsiɑwɑ ben sɔ̃.

15 U nɛɛ, i ku be nɑ ɡɔsɑ bɑbɑ.

I ku be, nɛn sɔmɔbu kɔ̃sɑ kuɑ.

16 U derɑ ɡɔ̃ɔrɑ nɑ tem mɛ sɔɔ.

Mɑ bɑ dĩɑnu biɑ bu di.

17 Mɑ u derɑ ɡoo ɡbiɑ u dɑ tem mi ben sɔ̃.

Wiyɑ Yosɛfu wi bɑ dɔrɑ nɡe yoo.

18 Bɑ kɑ nùn yɔni bɔkuɑ nɑɑsɔ.

Mɑ bɑ nùn sisun ɡɑndɑru dokeɑ wĩirɔ.

19 Bɑ win lɑɑkɑri mɛɛrɑ

sere yu kɑ koorɑ ye u rɑɑ ɡeruɑ.

20 Sɑɑ ye sɔɔrɑ sinɑ boko u woodɑ wɛ̃

u nɛɛ, bu nùn yɑrɑmɑ.

Mɑ u derɑ bɑ nùn kusiɑ.

21 Mɑ u nùn kuɑ win yɛnu kɑ win ye u mɔ kpuron wiruɡii,

22 kpɑ u wɑ u kɑ win sinɑ ɑsɑkpɔbu kpɑrɑ nɡe mɛ u kĩ.

Kpɑ u sinɑ bokon bwisi kɛ̃ɔbu bwisi kɛ̃.

23 Sɑɑ yerɑ Yɑkɔbu kɑ wiɡibu bɑ nɑ bɑ sinɑ Eɡibitiɔ Kɑmun bweserun temɔ.

24 Mɑ Gusunɔ u derɑ bɑ mɑrurɑ too.

Bɑ dɑm kuɑ bɑ ben yibɛrɛbɑ Eɡibitiɡibu kerɑ.

25 Mɑ u yibɛrɛ ben ɡɔ̃ru ɡɔsiɑ.

Bɑ wi, Gusunɔn tɔn be tusɑ.

Mɑ bɑ bu nɔni sɔ̃ɔwɑ be, be bɑ sɑ̃ɑ win sɔm kowobu mi.

26 Mɑ u Mɔwisi kɑ Aroni ɡɔsɑ bɑ kuɑ win sɔm kowobu,

mɑ u bu ɡɔrɑ.

27 Mɑ bɑ mɑɑmɑɑki kuɑ kɑ win dɑm tɔn ben suunu sɔɔ Kɑmun tem mi.

28 U derɑ yɑm wɔ̃ku sinumɡiru tɑ nɑ.

Kɑ mɛ, Eɡibitiɡii be, bɑ ǹ wi, Gusunɔn ɡere wure.

29 U ben nim ɡɔsiɑ yɛm mɑ swɛ̃ɛ kpuro yi ɡu.

30 U mɑɑ derɑ surenu nu yibɑ ben tem sɔɔ

sere kɑ sinɑ bokon kpin yerɔ.

31 U derɑ ɡbɑbu swɛ̃ɛ kɑ ɡɑɑnikunu nu nɑ ben tem kpuro sɔɔ.

32 Mɑ u derɑ ɡuru kpenu kɑ dɔ̃ɔ nɑ tem mɛ sɔɔ.

33 Mɑ yɑ ben dɑ̃ɑ ɡbɑɑnu kɑ dɑ̃ɑ ni nu tie ben tem mɛ sɔɔ kpuro kɑm koosiɑ.

34 Yen biru, u derɑ twee yi nɑ dɑbi dɑbinu.

35 Mɑ yi tem min yɑkɑsu kɑ mɛn ɡbeɑn dĩɑnu kpuro di.

36 U mɑɑ Eɡibitiɡibun bii ɡbiikobu ɡo,

be, be bɑ mɑrɑ ben ɑluwɑɑsiru sɔɔ.

37 Mɑ u win tɔmbu yɑrɑ Eɡibitin di

bɑ wurɑ kɑ sii ɡeesu wɑ bɑ sɔɔwɑ.

Ben ɡoo kun mɑɑ sɑnum kpɑnɛ swɑɑ sɔɔ.

38 Sɑɑ ye sɔɔrɑ Eɡibitiɡibun nukurɑ dorɑ

yèn sɔ̃ Isirelibɑ bɑ doonɑ.

Domi bɑ rɑɑ ben bɛrum mɔ too.

39 Mɑ Gusunɔ u Isirelibɑ ɡuru wii wuronu wukiri,

mɑ u bu yɑm bururɑsie wɔ̃kuru bu kɑ yɑm wɑ.

40 Ye bɑ turɑ ɡbɑburɔ,

yerɑ bɑ Yinni Gusunɔ nɔɔɡiru sue bɑ dĩɑnu kɑnɑ,

mɑ u bu kusunu wɛ̃.

Mɛyɑ u derɑ pɛ̃ɛ yɑ nɑ wɔllun di bɑ di bɑ debɑ.

41 U kperu wukiɑ mɑ nim mu kurɑmɑ mu tɛriɑ nɡe dɑɑru tem dirɑɔ.

42 Domi u win nɔɔ mwɛɛ dɛɛrɑ te yɑɑye te u win sɔm kowo Aburɑhɑmu kuɑ.

43 U win tɔn be u ɡɔsɑ yɑrɑ kɑ nuku dobu.

Mɑ bɑ nuku dobun kuuki mɔ̀.

44 Mɑ u bu bwesenu ɡɑnun tem wɛ̃.

Mɑ bɑ bwese nin ɡberun ɑre tubi di,

45 bu wɑ bu kɑ wi, Gusunɔn woodɑbɑ mɛm nɔɔwɑ.

Ǹ n mɛn nɑ, i Yinni Gusunɔ siɑro!