106
1 I Yinni Gusunɔ siɑro.
I Yinni Gusunɔ siɑro, domi u sɑ̃ɑwɑ tɔn ɡeo.
Win kĩru tɑ rɑ n wɑ̃ɑwɑ sere kɑ bɑɑdommɑɔ.
2 Wɑrɑ u koo Yinni Gusunɔn sɔm mɑɑmɑɑkiɡinu ɡere.
Wɑrɑ u koo kpĩ u nùn tɔmɑ u nɑɑmwɛ.
3 Doo nɔɔruɡibɑ be bɑ win woodɑbɑ mɛm nɔɔwɛ.
Doo nɔɔruɡibɑ be bɑ ɡem swĩi bɑɑdommɑ.
4 Yinni Gusunɔ, ɑ mɑn yɑɑyo durom mɛ ɑ rɑ wunɛn tɔmbu kuen sɔ̃.
A mɑn yɑɑyo kpɑ ɑ bu somi.
5 Kpɑ n ben nuku dobu wɑ be, be ɑ ɡɔsɑ.
Kpɑ n nuku dobu ko ben nuku doo bin sɔ̃.
Kpɑ n yɛ̃ɛri kɑ be sɑnnu be, be bɑ sɑ̃ɑ wunɛn ɑrumɑni.
6 Wee sɑ torɑ nɡe bɛsɛn bɑɑbɑbɑ, sɑ kɔ̃sɑ kuɑ.
7 Sɑnɑm mɛ bɛsɛn sikɑdo be, bɑ wɑ̃ɑ Eɡibitiɔ,
bɑ ǹ wunɛn sɔm mɑɑmɑɑkiɡii ni ɡɑrisi.
Bɑ ǹ wunɛn durom mɛ yɑɑye mɛ ɑ bu sɔ̃ɔsi nɔn dɑbi dɑbinu.
Mɑ bɑ nun seesi nim wɔ̃kuɔ ɡe bɑ mɔ̀ Nɑɑ yɑri.
8 Adɑmɑ ɑ bu fɑɑbɑ kuɑ wunɛn yĩsirun sɔ̃,
ɑ kɑ wunɛn dɑm sɔ̃ɔsi.
9 A nim wɔ̃ku ɡe bɑ mɔ̀ Nɑɑ yɑri ɡbɑ̃re mɑ ɡɑ ɡberɑ.
A derɑ bɑ sĩɑ ɡen suunu sɔɔ ɡbebum nɡe tem sɑɑrɑmɔ.
10 A bu yɑkiɑ sɑɑ wi u bu tusɑn nɔmɑn di.
A bu wɔrɑ yibɛrɛbɑn nɔmɑn di.
11 Nim mu ben yibɛrɛbɑ wukiri, bɑɑ ben turo u ǹ kisire.
12 Mɑ bɑ wunɛ Yinni Gusunɔn ɡɑri nɑɑnɛ kuɑ.
Mɑ bɑ nun siɑrɑmɔ kɑ womusu.
13 Adɑmɑ mii mii, bɑ wunɛn sɔm mɑɑmɑɑkiɡii ni duɑri.
Bɑ ǹ mɑɑ mɑrɑ ɑ wunɛn himbɑ yibiɑ.
14 Ben binɛ yɑ seewɑ ɡbɑburɔ,
mɑ bɑ wunɛ Gusunɔn lɑɑkɑri mɛɛrɑ mi.
15 A bu yɑɑ wɛ̃ ye bɑ bikiɑ, mɑ bɑ di bɑ debɑ too.
16 Yerɑ bɑ kɑ Mɔwisi kɑ Aroni wi bɑ yi nɛnɛm wunɛn sɔmburun sɔ̃ nisinu seewɑ sɑnsɑniɔ.
17 Mɑ tem mu nɔɔ wukiɑ mu Dɑtɑni mwɛ.
Mɑ mu mɑɑ Abirɑmu kɑ win tɔmbu wukiri.
18 Dɔ̃ɔ u ben tɔmbu kpuro di.
Dɔ̃ɔ yɑrɑ yɑ tɔn kɔ̃sobu di.
19 Bɑ nɑɑ buu sii ɡɑnduɡuu kuɑ Horɛbuɔ.
Mɑ bɑ yiirɑ bɑ ɡu sɑ̃wɑ.
20 Bɑ wunɛ Gusunɔ wi ɑ sɑ̃ɑ ben bɛɛrɛ kɔsinɑ kɑ kɛtɛ ye yɑ rɑ yɑkɑsu di.
21-22 Bɑ wunɛ Gusunɔ ben fɑɑbɑ kowo duɑri,
wunɛ wi ɑ bu ɡɑ̃ɑ bɑkɑnu kuɑ Eɡibitiɔ Kɑmun temɔ.
A sɔm mɑɑmɑɑkiɡinu kuɑ mi.
A sɔm mɑɑmɑɑkiɡinu kuɑ nim wɔ̃kuɔ ɡe bɑ mɔ̀ Nɑɑ yɑri.
23 Yen biru, ɑ ɡɔ̃ru doke ɑ bu kpeerɑsiɑ.
Adɑmɑ Mɔwisi wunɛn sɔm kowo u nun suuru kɑnɑ
ɑ kɑ wunɛn mɔru suresiɑ,
kpɑ ɑ ku mɑɑ bu kɑm koosiɑ.
24 Bɑ tem durom mɛ ɡɛmɑ.
Bɑ ǹ wunɛ Yinni Gusunɔn ɡɑri nɑɑnɛ kue.
25 Bɑ wɔkiwɑ ben kunɔ.
Bɑ ǹ wunɛn ɡɑri mɛm nɔɔwɛ.
26 Mɑ ɑ nɔmɑ suɑ wɔllɔ ɑ bɔ̃ruɑ mɑ kɑɑ bu kɑm koosiɑ ɡbɑburɔ.
27 Kpɑ ɑ ben bibu yɑrinɑsiɑ tem kpuro sɔɔ bwese tukunun suunu sɔɔ.
28 Bɑ tii bũu wi bɑ mɔ̀ Bɑɑli Peori wɛ̃.
Mɑ bɑ yɑ̃kunu di ni bɑ ɡɔribu kuɑ.
29 Mɑ bɑ wunɛ Yinni Gusunɔn mɔru seeyɑ kɑ ben kookoosu.
Yerɑ kɛsi kɛsi ɡɔɔ u duɑ ben suunu sɔɔ.
30 Mɑ Finɛɛsi u wunɛ Gusunɔ kɑnɑ, mɑ ɡɔɔ wi, u yɔ̃rɑ.
31 Mɑ ɑ nùn ɡɑrisi ɡemɡii sere kɑ win bibun bweserɔ kɑ bɑɑdommɑɔ.
32 Bɑ mɑɑ wunɛ Yinni Gusunɔn mɔru seeyɑ nim mɛ bɑ rɑ soku Mɛribɑn bɔkuɔ.
Mɑ ɑ Mɔwisi sɛɛyɑsiɑ ben sɔ̃.
33 Domi bɑ nùn nuki sɑnkɑ.
Mɑ u ǹ bwisikɑ u kɑ ɡɑri ɡeruɑ.
34 Bɑ ǹ Kɑnɑnin bwese ni ɡo ni ɑ nɛɛ, bu ɡo.
35 Bɑ kɑ nu burinɑwɑ, mɑ nu bu nin kookoosu tie.
36 Mɑ bɑ nin bũnu sɑ̃wɑ. Mɑ nu kuɑ ben yinɑ.
37 Bɑ kɑ ben bii tɔn durɔbu kɑ tɔn kurɔbu bũu yɑ̃kunu kuɑ.
38 Nɡe mɛyɑ bɑ ɡemɡibun yɛm yɑri.
Bɑ kɑ ben bibu Kɑnɑnin bũnu yɑ̃kuru kuɑ.
Mɑ tem mɛ kpuro mu disi duurɑ tɔn ɡobe ten sɔ̃.
39 Bɑ disi duurɑ ben kookoosun sɔ̃.
Domi su derɑ bɑ rɑ n bũnu ɡɑsirimɔ.
40 Mɑ wunɛ Yinni Gusunɔ ɑ kɑ wunɛn tɔmbu mɔru bɛsirɑ,
ɑ bu tusɑ be, be bɑ sɑ̃ɑ wunɛn ɑrumɑni.
41 A bu bwese tukunu nɔmu sɔndiɑ ni nu bu tusɑ nu tɑɑre.
42 Ben yibɛrɛbɑ bɑ bu dɑm dɔre. Mɑ bɑ bu sekuru doke.
43 Nɔn dɑbinɑ ɑ bu yɑkiɑ.
Adɑmɑ bɑ yɔ̃rɑriwɑ bɑ n nun seesi.
Mɑ bɑ kuɑ wɔnwɔndobu ben durum sɔ̃.
44 A ben nɔni swɑ̃ɑru wɑ sɑnɑm mɛ ɑ ben weeweenu nuɑ.
45 A wunɛn ɑrukɑwɑni yɑɑyɑ.
Mɑ ɑ ben wɔnwɔndu wɑ wunɛn durom bɑkɑm sɔ̃.
46 A derɑ be bɑ bu yoru nɛni bɑ ben wɔnwɔndu wɑ.
47 Gusunɔ bɛsɛn Yinni, ɑ sun fɑɑbɑ koowo.
A sun wunɔ bwese tukunun suunu sɔɔn di,
kpɑ ɑ sun mɛnnɑ, su wɑ su wunɛn yĩsi dɛɛrɑru tɔmɑ,
kpɑ sɑ n yɛ̃ɛrimɔ su kɑ nun sɑ̃.
48 Gusunɔ bɛsɛ Isirelibɑn Yinni,
sɑ ko n nun siɑrɑmɔwɑ sere kɑ bɑɑdommɑɔ.
Kpɑ tɔmbu kpuro bu nɛɛ, ɑmi!
I Yinni Gusunɔ siɑro.