135
1 I Yinni Gusunɔ siɑro. I win yĩsiru tɔmɔ.
Bɛɛ win sɔm kowobu,
2 bɛɛ be i sɔmburu mɔ̀ win sɑ̃ɑ yerɔ, i nùn siɑro.
3 I nùn siɑro, u sɑ̃ɑwɑ tɔn ɡeo.
I kɑ win yĩsiru womu koowo, u sɑ̃ɑwɑ tɔn ɡeo.
4 Yinni Gusunɔ u tii Isirelibɑ Yɑkɔbun bweseru ɡɔsiɑ
bɑ n kɑ sɑ̃ɑ wiɡibu.
5 Nɑ yɛ̃ mɑ u kpɑ̃, mɛyɑ wi, bɛsɛn Yinni u bũnu kpuro kere.
6 Ye u kĩ, yerɑ u rɑ ko wɔllɔ kɑ temɔ kɑ nim wɔ̃kuɔ kɑ ɡen sɔɔwɔ.
7 U rɑ de ɡuru winu nu sɔ̃ɔsirɑ hɑnduniɑ kpuro sɔɔ.
U rɑ de ɡuru mɑɑkinu nu koorɑ kpɑ u de ɡurɑ yu nɛ.
Kpɑ u woo kusiɑmɑ ɡen wɑ̃ɑ yerun di.
8 U Eɡibitiɡibun bii ɡbiikobu ɡo sere kɑ ben yɑɑ sɑbenun bii ɡbiikinɔ.
9 U sɔm mɑɑmɑɑkiɡinu kuɑ Eɡibitiɔ u kɑ yen sinɑ boko
kɑ win sɔm kowobu kpuro sɛɛyɑsiɑ.
10 U bwese dɑbinu ɡo, mɑ u sinɑm dɑmɡibu ɡo.
11 Beyɑ, Sihoni Amɔrebɑn sunɔ kɑ Oɡu Bɑsɑnin sunɔ
kɑ sere mɑɑ Kɑnɑnibɑn sinɑmbu kpuro.
12 U sinɑm ben tem suɑ
u win tɔmbu Isirelibɑ wɛ̃ bɑ tubi di.
13 Yinni Gusunɔ, wunɛn yĩsiru tɑ ko n wɑ̃ɑwɑ sere kɑ bɑɑdommɑɔ.
Bɑ ko n nun yɑɑyewɑ wɑɑti bɑɑyere sɔɔ.
14 Yinni Gusunɔ u koo win tɔmbu siriɑ,
kpɑ u win sɔm kowobun wɔnwɔndu wɑ.
15 Bɑ bwesenun bũnun bwɑ̃ɑrokunu kuɑwɑ kɑ sii ɡeesu kɑ wurɑ.
Tɔmbun nɔmɑn sɔmburɑ.
16 Nu nɔsu mɔ, ɑdɑmɑ nu ku rɑ ɡɑri ɡere.
Nu nɔni mɔ, ɑdɑmɑ nu ku rɑ yɑm wɑ.
17 Nu swɑsu mɔ, ɑdɑmɑ nu ku rɑ ɡɑri nɔ.
Nu ǹ wɛ̃siɑru mɔ nin nɔɔwɔ.
18 Be bɑ nu sekumɔ kɑ be bɑ nu nɑɑnɛ sɑ̃ɑ,
be kpuro bɑ sɑ̃ɑwɑ nɡe ni.
19 Isirelibɑ, i Yinni Gusunɔ siɑro.
Aronin bweseru, i Yinni Gusunɔ siɑro.
20 Lefin yɛnuɡibu, i Yinni Gusunɔ siɑro.
Bɛɛ be i nùn nɑsie, i nùn siɑro.
21 Yinni Gusunɔ u wɑ̃ɑ Yerusɑlɛmuɔ.
I nùn siɑro sɑɑ Siɔnin di.
I Yinni Gusunɔ siɑro.