136
1 I Yinni Gusunɔ siɑro domi u sɑ̃ɑ tɔn ɡeo.
Win wɔnwɔndu tɑ ku rɑ kpe.
2 I Gusunɔ siɑro, u bũnu kpuro kere.
Win wɔnwɔndu tɑ ku rɑ kpe.
3 I yinnibun Yinni siɑro.
Win wɔnwɔndu tɑ ku rɑ kpe.
4 Wi turowɑ u rɑ sɔm mɑɑmɑɑkiɡii bɑkɑnu ko.
Win wɔnwɔndu tɑ ku rɑ kpe.
5 Wiyɑ u wɔllu kɑ tem tɑkɑ kuɑ kɑ win bwisi.
Win wɔnwɔndu tɑ ku rɑ kpe.
6-9 U tem tɛriɑ nim wɔllɔ, mɑ u sɔ̃ɔ kɑ suru kuɑ.
U sɔ̃ɔ kuɑwɑ u kɑ yɑm bururɑsiɑ sɔ̃ɔ sɔɔ,
mɑ u suru kɑ kperi kuɑ ye kpuro yu kɑ yɑm bururɑsiɑ wɔ̃kuru.
Win wɔnwɔndu tɑ ku rɑ kpe.
10-11 Wiyɑ u Eɡibitiɡibun bii ɡbiikobu ɡo.
Mɑ u Isirelibɑ yɑrɑ Eɡibitiɡii ben suunu sɔɔn di.
Win wɔnwɔndu tɑ ku rɑ kpe.
12-15 Kɑ win dɑmɑ u kɑ nim wɔ̃ku ɡe bɑ mɔ̀ Nɑɑ yɑri burɑnɑ yiru,
mɑ u derɑ Isirelibɑ bɑ tɔburɑ ɡen suunu sɔɔn di.
Mɑ u Eɡibitin sinɑ boko kɑ win tɑbu kowobu sure nim wɔ̃ku ɡe sɔɔ.
Win wɔnwɔndu tɑ ku rɑ kpe.
16 Wiyɑ u win tɔmbu kpɑrɑ ɡbɑburɔ.
Win wɔnwɔndu tɑ ku rɑ kpe.
17-20 Wiyɑ u sinɑmbu ɡo be bɑ dɑm mɔ.
Beyɑ, Sihoni Amɔrebɑn sunɔ kɑ Oɡu Bɑsɑnin sunɔ.
Win wɔnwɔndu tɑ ku rɑ kpe.
21-22 Wiyɑ u tɔn ben tem win sɔm kowobu Isirelibɑ wɛ̃ bɑ tubi di.
Win wɔnwɔndu tɑ ku rɑ kpe.
23-24 Wiyɑ u sun yɑɑyɑ sɑnɑm mɛ sɑ wɑ̃ɑ sekuru sɔɔ.
Mɑ u sun wɔrɑ be bɑ sun dɑm dɔremɔn nɔmɑn di.
Win wɔnwɔndu tɑ ku rɑ kpe.
25 Wiyɑ u rɑ hunde koni bɑɑyere dĩɑnu wɛ̃.
Win wɔnwɔndu tɑ ku rɑ kpe.
26 I Wɔrukoo siɑro.
Win wɔnwɔndu tɑ ku rɑ kpe.